ISAIA 39 - OTSAO BAIBEL (BSI)

Babilon tokya Kaxhomixbu

¹ Itukhae, Babilon nok wanghompa-e, Baladan sasün Merodak Baladan, chixe Wanghompa Hezekiah mik amütdaoa tale atat ang kop, ikhoma chixe chix hato laiza tuita hia hingho tuita akat.

² Hezekiah-e kaxhomixbu pongle kop ilaxle chix tuinabu aho — chix khop hia hun, chix ma tüikya ongan müikya müngabu, ilaxlechu chix süpahi khyepdibu pangwüi. Chix pungkha hia chix chaxwan ma tüikya ojongkhachu hwom hama chiaho homle chitox.

³ Ifüima ajepa Isaia Wanghompa Hezekiah hato ngui ilaxle atüi: “Hwom ojongkha tokya tamchu hwome chempangle akaxpu?” Hezekiah-e lan: “Hwom a tsailo tokya, Babilon nok tokya changpu.”

⁴ “Wanghom hom ma hwome chempang akax?” “Hwome pangwüi ngündaoa. Kue hwom hama chiahole chemchu müntox.”

⁵ Isaia-e wanghompa ang thüi: “Jowanpa Khüthak Zang-e ile thüile

⁶ nang homlo ma tüikya pangwüi, anyix kople tüikya hünpu hünpa hwome athünle toxkyabu, ibu pangwüi Babilon nok to tsui pao angkya hanpak tuita hüile ngole. Tutachu danle müntoxüi.

⁷ Hünzom putong hwom züizüi kople paoüi ilaxle Babilon nok wanghom khwa ma zwom züilaxle wangchabu nye ang tomüi.”

⁸ Wanghompa Hezekiah-e ija a chix din ma tumüi-lomkhaole ngo angkya kax changüile thütlaxle chixe lan: “Nange ku hato Jowanpa tokhange ahüikya kaxho a müihule.”