ISAIA 38 - OTSAO BAIBEL (BSI)

Wanghompa Hezekiah Kakkya hia Chix Kak Müikya

¹ Ipongkhae Wanghompa Hezekiah zikox laxle jao kakle max. Amoz sasün ajepa Isaia chix to hu ang pao ilaxle chix ang thüi: “Jowanpa nang ang pangnu li müile zing-jaole tox angkya wüile akaxle chemthüikoxle nang kak a tammüitoxüi münchang. Nang a zi ang achwonlax.”

² Hezekiah-e chix thün katuk chito hu ilaxle zangjop:

³ “Texle ataklax, Jowanpa, kue mongong füi tamchu kax ma laxle nang thothale hüidaoa, ilaxle kue nang mong ma atsutsu mokle-ole azongle hüidaoa.” Ilaxle chix mongmaxle sop ang süt.

⁴ Ipongma Jowanpae Isaia ang kaxtom koxle

⁵ Hezekiah hato chatlaxle chix füi ija akax ang tom: “Ku, Jowanpa, hünzom putong Dawid Zang, kue nang zangjop atatdaoa ilaxle nang mikfi ngündaoa; kue nang zanglao bünba aga ozün ma ngo ang tomüi.

⁶ Kue nang tamchu ija tingnu Jerusalem a Asiria nok chongwangpa chak tokya sünüi, ilaxle kue chizakle ija tingnu ziakople thomüi.”

²¹ Isaia-e wanghompa ang chix tsom mak ma fupsa jum-e bapkox, ile jangchangba nang kak müiüile thüi.

²² Ifüima Wanghompa Hezekiah-e atüi: “Ku a Zangshwom-Hom to pao ang tho angkya bama münwan ang chem tüi?”

⁷ Isaia-e lan: “Chixe akaxkya otsing changpule aho angkya hanpakma Jowanpae nang ang münwan tuita koxüi.

⁸ Wanghompa Ahaz-e zingkya longdixtua ma, Jowanpae chaxba füichi to chikap bün chat ang tomüi.” Ilaxle chaxba füichi to chikap bün chat.

⁹ Hezekiah kak müile changkya füima, chixe ija tsai Zang achuakle za:

¹⁰ Kue thüt ku tsünto to wüi sheol to ka ang laikya chang, chatle ku ozün ma münngotoxüi ngün.

¹¹ Ija ozün ma ngokya chaxwannu ma tamchatle Jowanpa ngün ang münkopüi, chichangba ozün ma ngokyabu owachu ngün ang münkopüingün le kue thüt.

¹² Ku tsün a pak-ngün ilaxle ashuk-ngün, tuita nyihom pünle ajokya tamchu nyitak lya angkya nyi zütle laxkya ningle. Zang-e ku tsün iwüi ang achang ngünle kue thüt.

¹³ Mailang tuitae ku zabu shaole akhixkya tukuxle zang angaile ku tüle luakle sop. Zang-e ku tsün iwüi ang achang ngünle kue thüt.

¹⁴ Ku zangwün ngaxchu ashole nai, ilaxle su-o ngao ma ngaole ku sop. Zangkho to hukyakyae ku mik nale hüi. Jowanpa, ija zothup chak tokya ku azünhüi.

¹⁵ Kue chem wüntsuaküi? Ija a Jowanpa mwot changle. Ku mong max jao maxle, ilaxle ku a jip ang jao chitho.

¹⁶ Jowanpa, ku a nang hanpakma ngoüi, nang tata hanpakma; ku kak amüifa ilaxle ku ozün ma ngo ang tomfa.

¹⁷ Ku mongmüt a mongsom ang achangüi. Nange ku tsün thama pangnu chak tokya khosünle kop nange ku ochax pangwüi thailakkya tüi.

¹⁸ Sheol tokhange owaechu nang achuak ang müntho; ziünkyabue nang to aokya chitüile mongong thom ang müntho.

¹⁹ Athax kue nang achuakkya ningle, nang achuak angkya a ozün ma ngokyabue tix. Nu-pa hwome naosombu hama chialekya nang mongong bama wün.

²⁰ Jowanpa, nange ku kak amüidaoa. Kwome thuaput waxmaibu mütle nang achuakle tsai ngaoüi, kwom tsünlole ngokya kople nang Zangshwom-Hom ma nang achuaküi.