ISAIA 35 - OTSAO BAIBEL (BSI)

Otsao Lomtang

¹ Sak-haxe mongmüiüi, ilaxle khünak chingokya faokha to maipuabu puaüi.

² Mongmüi atungle sak-haxe tsai ngaole akhongüi; ija a Lebanon Haxnu tukuxle osün müiüi Karmel hia Sharon nyi haxtok ningle haxzao füi tüiüi. Jowanpa ahak-aluakya noknusae ngünle laxüi, chix chuak-chongkya hia tsak-zong ngünle laxüi.

³ Na-juale tüikya chak ang janzüi koxle chikuxkho ma zong chitüikyabu ang zong koxle.

⁴ Mong athole ngokya pangnusa ang thüikox, “Mong chonglax ilaxle taxza! Hünzom khose ang Zang nguingole, hünzom zanpabu to sikangün ang a.”

⁵ Mik-pwompae ngün ang kopüi, ilaxle naba mixe atat ang kopüi.

⁶ Cha faikyabu fütle azüiüi, ilaxle zangwün ang chithokyabue mongmüile akhongüi. Sak-hax makhange ti chizopkya shuajenbu jenüi;

⁷ Wün lailaile khamle ngokya sak-hax a tinukha ang achangüi, ilaxle haxkozanbu a shuajene awangle changüi. Ojongkha to shwonbu ngopuix, ikhato fum-hing hia achabu nyemüi.

⁸ Ikhato afithole lomnutang tüiüi, ija ang “Otsao Lomnu”, le nyaküi. Ochax khünak owachu ija lom ma münahamüi; ikhama ahamkyabu owa ongatechu ochei to münpaoüi.

⁹ Ikhato mailang münngoüi; ija makhange müima-nyaxshix chemchu münleüi. Jowanpae opang khosünle thompuix ibu ma hom to ija lom makhange nguiüi.

¹⁰ Hwome Jerusalem mongmüi atungle alopüi, pwonla dongle tsai ngaole akhongle-a. Hwom a jento mongmüi-pwonlale ngoüi, othuithui hanpak ang künthang-mongdang füi atsaile a.