ISAIA 33 - OTSAO BAIBEL (BSI)

Asunhüile Zangjopkya

¹ Kem zanpabu a maxdaoa! Hwom to opupuechu papalole chichangba khohangle chichang khato, hwome papalole chang tamchu khohangle changle. Ikoxlechu hwome papalole lax angkya hia khohang angkya hwom hanpak ashukdaoüi, ilaxle hwom mix alüile ija papalole laxkya hia khohang mütkop ma ngoüi.

² Jowanpa, kwom to chingcha hüi. Kwome kwom mongong nang ma thompu. Nyixfokya to kwom kho-awale thom hüi ilaxle sikngün pongma kwom sünle kop hüi.

³ Chemtue nang kwom hanpakma azanpuix, chaxwannu nok a zanhok zing thoto paole.

⁴ Hwom tuinabu a athün-athünle danüi ilaxle tsui paoüi.

⁵ Jowanpa a chemkuxma chongpuix! Chixe pangnusa thakma apünle. Chixe Jerusalem a sukya kaxfün hia pangnu zongto sukyae awangüi

⁶ ilaxle tingnok a oting ma sütle shingmong ang tomüi. Chixe jento chix khünaknu kho-awale ilaxle hwom ang je-hwon hia tsing-wankya koxle. Hwome tuina tüichongpa aJowanpa achuak-achenkya changle.

⁷ Mong chongkyabu a asun ang sele. Tumüi apüi ang azongle ngokya wangnak-wangshembu a mongmaxle sople ngole.

⁸ Lomnutangbu a ibu ma owa ngaxchu chiahamle ipongpongle thama ang achangle. Muamüi zangwün hia tsaotsütbu a amadaoa. Athaxpi owachu achuakachenle chazakya müntüi.

⁹ Haxtok a owachu chingole ngat-to dantoxdaoa. Lebanon angkya faonu kohwon ang changdaoa. Haxzao füikya Sharon haxsha a sak-hax ang changdaoa, ilaxle Bashan ma tamchu Karmel Haxnu ma pün ang pünchakbu dütle.

Chix Zanpabu ang Jowanpa e Kaxkhün Kox

¹⁰ Chaxwannu nok ang Jowanpae thüi: “Athaxpi kue moküi. Ku chemtukux tsak-zongle tüipuix ija kue ahoüi.

¹¹ Tüta thakho chinguikya mwotlombu hünzome zingtsuak ilaxle hünzome mokkya mwot pangwüi laxli chitüi. Ku chasa a hünzom ama angkya hanpakma wün ningle changpu.

¹² Hünzom a thun ang lax ang long thuple akhixkya ningle akhixüi, wünjuak ang achangle huxpün zokle ashunkya ningle achangüi.

¹³ Kue chem mokdaopuix ija bama nuisox hia tsailo to ngokyabue naxatat ilaxle ku tsak-zong huanu wüi chang koxngünle nax-tik.”

¹⁴ Zaion angkya ochax khünakbu a zale abün ngole. Hwome thüile: “Zang kaxfün a othuithuima zokle ngokya wünchua ningle changle. Kem kha angkya owawae iningkya wünkham adu ang tho angchami?”

¹⁵ Nange kaxtsing zangwün tamchu sukyakya mokle jangchang nang chizile ngo ang tsuak. Nang tsak-zong a chitüi-chinang dyenla ang taxtwon ilaxle zuizun pongle taxkop. Mix mik amüt ang tungkya hia ochax mwot mok ang tungkyabu khato taxhak.

¹⁶ Ile jangchangba nang azangle ngoüi; nang a shingmongkya zanhunui ma ngole kopkya ningle chaza angkya chemchu müntüiüi. Sax angkya süt hia ling angkya ti hünzom ang tüile ngoüi.

Füichi ma Fuazang angkya

¹⁷ Tamchatle chu hünzome pangnu chito haxka khaole tüikya haxtok ma wanghom tuitae tüle zaxzangle apün-adakya ngünüi.

¹⁸ Mixnok süithat hia zyetmixbu bama hünzom zale ngokya ozang a mong lanlan ma ngoüi.

¹⁹ Hünzome tsing ang chitsuakkya zangwünkya khünak, mongngam füikya mixnok nange tamchatle ngün ang münkopüi.

²⁰ Zaion to hulax, keme zanglom pangpwonbu saxle ngokya tingnu a. Jerusalem to hulax! Ikha a chemningle chaza angkya chemchu chitüile ngo ang amüikya kha ang changüihex! Ija a otuechu chiachex, lakbu otuechu chisuk tamchu ija zubu otuechu chifünle jongta khama ajingle ngokya nyihom ningle changüi.

²¹ Jowanpae chix fuazang kem hato ahoüi. Kem a shuanu khaokyabu hia shuasabu zui ma ngoüi, ikoxlechu zan-nokbu khua ikhato münahamüi.

^22-23 Khua ibu angkya zu a laxli müntüi; ibu füi khua chei angkya nyi pün ang müntho! Zan-nok süpahibu angkya tuina keme komkaile tsuiüi, ija tuina a huanu changüi ilaxle chafaibue ngaxchu wüi hwom süntswon kopüi. Jowanpa chix jaojao kem wanghompa ang changüi; chixe kem thak ma apünüi ilaxle kem khosünle thomüi.

²⁴ Kem haxtok ma ngokya owaechu tamchatle kaklak bama kaxthup-ngaotünkya müntüiüi, ilaxle ochax pangwüi thailakkya tüiüi.