ISAIA 28 - OTSAO BAIBEL (BSI)

Shuakuxchi Wangting ang Koxkya kaxkhün Tuita

¹ Israel wangting a maxdaoa! Hwom lompahom jutok mixbu khangkho ma maipua khohom hüile paokya ningle hwom fuazang a samdaoa. Angamkya hwom khangbu a ongan müikya münga füi palaxle tüile, ikoxle hwom ikhama jutokle shui, omang ma pangle.

² Jowanpa ang hwom to sing angkya hanpakma achwonle ngokya tüile tsak-zong füikya owawa tüile; ija a tuita jundütkya ningle, tuita tamchu chithwonkya zangwat ningle, tüle asoxle fütle, pangnusa to lyemle hüikya tichen, ibu ningle hüilaxle chaxwan to u angkya changle.

³ Ibu jutok mix lompabu mongngam a cha füi nakle chifa fangto thomdao angkya changle.

⁴ Pongwang ma jumkya fupsa ziak, jumkya füi tomle khaile saxtsuakkya ningle mongngam füikya lompabu fuazang ang maxle samdao angkya changle.

⁵ Jowanpa a ozün ma toxkya chix khünaknu hanpakma maipuabu makhange zingkya fuazangkya khohom ang chang angkya hanpak tuita nguile ngole.

⁶ Kaxfün mwot mokle ngokyabu ang chixe kaxfün tutex sukya faüi, ilaxle zansing chak tokya tingnu pan kho-awale thomkyabu ang mongchen koxüi.

Isaia hia Judah angkya Jutok mix Ajebu

⁷ Jenu-shipa hia nguapabu ngaxchu juling-saxsax laxle tok-tok-ngale lomnong to paodaoa. Hwom chikho suale laxkya hia jepakya kople hwome okho-anguile jao juling-saxsaxle changle. Ajebu a Zang-e ahüikya mikngünohün ngaxchu tsingle lax ang chithole jue tok, ilaxle nguapabu chuwüi hwom hato apüikya tsetwon-zangwün fünle fa ang ngaxchu khosamle jutok ngo.

⁸ Hwom ngwotnui-tüntong pangwüi hwom fat füi awang, ile tsaokya onui ikuxsa chitoxle ama.

⁹ Hwome ku bama kaxthup-ngaotünle chang. Hwome thüi: “Khünak tuitae chixe owa hama anwot-anole ngopule texpu? Chix kaxho owae laxüi? Athax tsomsip dan tangkya naosa zongma wüi namchimüiba!

¹⁰ Chixe kem hama kaxhuak-kaxhuak ma, kaxzyen-kaxzyen ma tamchu kax olom-olom ma anole kox ang azongle.”

¹¹ Hünzome ku kax to chiapa jangthüiba, hünzome chitsingkya kax makhange hünzom ang olom-olom apuale kox angkya hanpakma Zang-e mixnokbu twonüi.

¹² Chixe hünzom pangwüi ang nazak hia mongsom koxle, ikoxle hünzome mix chix kax to mün-apapule angamle.

¹³ Ikhoma Jowanpae hünzom hama kaxhua-kaxhuak ma, kaxzyen-kaxzyen ma, olom-olom ma anole kox ang azongpu. Ifüima hünzom a chitswon fo to asuale laxüi. Hünzom a thomzünüi, tsünle amanüi, ilaxle zanda ang kople paoüi.

Zaion hanpakma Homnuk Longnu Tuita

¹⁴ Hünzom Jerusalem ma tüikya khünak ibu thakma apünkya ajao-adale tüikyabu, Jowanpae chem akaxpuix ija to apalax.

¹⁵ Hünzom a zikmüt-mangkho füi muamüi laxle amalum füi zangwün azutle tsuakdaoale ngamtüi. Thama hüikya tuk ma hünzom a ijae tsiakle toxüile mong chongtüi; ija a hünzome ma khangkhom man angkya bama kaxthai zangwün hia dyen-ngankya to onglaxle ngokya khoma changpu.

¹⁶ Athax, ija a Jowanpa khüthak Zang-e akaxkya kax changle: “Kue Zaion ma othong mongkya tamchu oshing mongkya nui-ting tuita hanpak ang kue homkom-longnu tuita küile ngopu; ikhama ile zakya tüile, ‘Mongong shingmongkya a okuilole adukya chu changpu.’

¹⁷ Sukya kaxfün fakya a ija homting othüt tuita changpu, ilaxle otsao a ija othüt zu fünkya long ang changüi.” Hünzome mongongle tüikya oli pangwüi jun-long füi züile awütüi, ilaxle thaikya azwonle ngokya nui pangwüi tichene u ang tomüi.

¹⁸ Hünzome oja zangwün zikmüt-mangkho füi tsuakle tüipuix, ija a oman chitoxle amütüi. Chemtue thama zutle hüiüihex, ijae hünzom to lüt ang tomüi.

¹⁹ Ijae hünzom nopfo-nopfo to chatchatnaole chakmokle ngoüi. Hünzome ija zangnak zangngai adule hün angkya wüi. Zang-e tokhange kaxho hozün tuita hüikyae thama hozün apüi angkya changle!

²⁰ Wanwün-kax Lai ma tüikya khünak tuita, owa lya moxkya ma chix tsangtsa to chitokya nyi awunlaxle jipkya mo wünle tüipuix, nang a ija mixsün ningle changüi.

²¹ Chix mwot tuita za-dünle chang koxlechu: chix mongto thütkya mwot mok angkya hanpakma Perazim Haxnu angkya Gibeon haxsha ma azankya ningle Jowanpa chix jao azanüi. Chixe chix mwot, ohünotün mo tsuaküi.

²² Kue hünzom ang kaxkhün koxle ngokya cha taxnyi! Hünzome nyile jangchang, hünzom khangkhom hanpak tamtaitaikya mwottsak ang achangle paoüi. Jowanpa Khüthak Zang-e chaxwan pangwüi amüt angkya zangwün tsuakkya kue atatdaoa.

Zang Hwon-je

²³ Kue chem akaxpuix ija to apalax; kue nang füi akaxkya to mongkoxlax.

²⁴ Manzaimix owae chix haxtok jento tsax thwom angkya hanpakmale khutle akhixle münngo.

²⁵ Tam chixe hax akhixle jangchangdaoba, chixe suingan ningkya suitsangbu tamchu chumin ibu saile. Chixe tsyenthuile wonglai hia tsaxsa tula saxbu saile, ilaxle chix haxtok chamzüizüi ma chixe mama tsaxsangbu saile.

²⁶ Hwome hwom mwot chemle moküi hex awanle, chemthüikoxle Zang-e hwom hama anwot-anole koxdaoa.

²⁷ Chixe dill hia chumin tsangbu to fit ang kiatua lixkya münlax; ikoxle chixe asukhakkya kiatua twonle.

²⁸ Chixe chizakle jutle ngokyae wonglai tsax münama, ilaxle saxtsang chiakhix homle ija ding ma maihue linkya zyen ahamle chemle nak angkya hex awanle.

²⁹ Je ibu pangwüi Jowanpa Khüthak Zang tokhange hüile. Zang-e zingkya mwot a je-mwotbu changle, ilaxle ibu jento oza laile tsuakle!