ISAIA 26 - OTSAO BAIBEL (BSI)

Zang-e Chix Khünaknu ang Lüt ang tomüi

¹ Khünaknue Judah haxtok ma ija tsai ngao angkya hanpak nyixta hüile ngole: Kem tingnu a tsak-zongle tüile! Zang chix jaoe ija long-katuk nyele thomle!

² Tingnu panbu daple laxkox ilaxle mongong chialekya nok ngui ang laxkox, chem supuix ijaja mokle tüikya nok tokya khünakbu a.

³ Jowanpa, nange okhonguikya mongsom fahüi hwom mongtex shingmongle thomkyabu ang a tamchu nang to mongongle tüikyabu ang a.

⁴ Jento Jowanpa to mongong tüilax; chixe jento kem kho-awale thomüi.

⁵ Ngamkya khünakbu chixe puinai ang tomle; hwom ngole tüikya tsak-zongkya tingnu chixe amale, ilaxle ija long katukbu haxbu ang achangle akhixle.

⁶ Ami afangle thomkyabue athax ija ding ma nakle ilaxle ija hwom chifa fang ma thomle.

⁷ Jowanpa, müikya khünakbu lyetlom nang zingle amüi; hwom ahamkya lomtang a ajitle tüile.

⁸ Kwome nang mongtex man topu ilaxle nang ma kwom monghom thompu; kwome sung-zaokya pangnu a nangtix changle.

⁹ Mong makhange zongbakle zangnak ma kue nang sung; chemtue nang ija chaxwannu hia ija khünaknu kaxfünle changpuix, hwom pange wüi sukya chem hex ija awanle laxüi.

¹⁰ Chichangchizangkyabu zongto nang chingchale tüikoxchu, hwome otuechu sukya mwot mok angkya awanle münlax. Ija otsao khünakbu haxtok ma ngaxchu hwome othaithai wüi mokle; hwome nang chongkya to changkox-ale thüise müntsu.

¹¹ Nang zanpabue nange hwom to sikangün angkya le müntik. Jowanpa, hwom ang zak akopkox ilaxle sikngün ang tomkox; nange hwom hanpak ang achwonle thomkya zothup ma hwom sikngün ang tomkox. Hwom hama nange nang khünaknu to chemtukux mongünpuix ahokox.

¹² Nange kwom ang ahak-aluakya fa angkya changle, Jowanpa; kwome chempangsa tholünle changpuix ibu a nange mokkya mwotza laipu.

¹³ Jowanpa kwom Zang, kwom to mixe apün laxle ngole hüipu, ikoxlechu kwom Jowanpa a nang tata wüi.

¹⁴ Athax a hwom zidaoa ilaxle chatle tam azangüi münchang; hwom chasabu a münzoüi, chemthüikoxle nange hwom to sikangün tamchu max ang tom. Hwom a owaechu texle chiatak.

¹⁵ Jowanpa, nange kwom jat-li tsong ang tomdaoa, pangnu chito ija longzi achenle a, ilaxle ijae nang hato chathua zakya apüi.

¹⁶ Nange nang khünaknu to sikangün, Jowanpa, ilaxle fuxtsüi chifün tokhange hwome nang to jop.

¹⁷ Jowanpa, nange kwom asop, sheko tuitae nao ngün ang sikngün pongma sopkya ningle.

¹⁸ Kem ang kakle zolit ngole, ikoxle keme chemchu puxle chialai. Keme ma haxtok bama zan to lükya chitüi; keme chemchu tho-lünkya kha chitüi.

¹⁹ Ziünkya kem khünakbu tamchatle azangüi! Hwom tsangtsa azangle chatüi. Hwom opang zukting ma jiple ngotüipuix ibu zolaxle mongmüile tsai ngaoüi. Nyenti atsitle saikyae chemle chaxwantok azün ang tompuix, ija ningle Jowanpae kaiwüi zile ngoünkyabu azün ang tomüi.

Kaxfün hia Zingle Achatkya

²⁰ Hünzom ma homkhabu to dongkox, ku khünakbu, ilaxle hünzom tokfüi ma kabu hakdao. Zang mongtsik akaile hünzom onox ma azwonle ngokox.

²¹ Jowanpa a chix ngwotnui zangkangting tokhange, hwom ochaxbu khoma chaxwannu angkya khünakbu to sikangün ang nguile ngole. Chaxwan tok ma zuile mix mik amütkyabu kotok to angaiüi, ilaxle mik amütdaokyabu chaxwantoke athax pyenle münthom.