ISAIA 24 - OTSAO BAIBEL (BSI)

Chaxwannu to Jowanpa e Sikangünüi

¹ Jowanpae chaxwannu a ohua ang achangüi ilaxle ija chilaxli ang dantoxüi. Chixe chaxwan thün nongnong-püilüile achangüi ilaxle ikha angkya khünaknu chiakle asamüi.

² Pangnusae osho tuitata wüi apongüi — nguapabu hia khünakbu, da hia hopunubu, hangmix hia shakmixbu, thashe koxkya hia laxkyabu, tüi-nangkya hia chitüi-chinangkyabu pangwüi.

³ Chaxwannu a kohwon ang achangle tamchu owüiole amale dantoxüi. Jowanpae akaxdaoa ilaxle ija tsuak angkya changle.

⁴ Chaxwannu a zanle pao ilaxle zile paole; zangfang pangwüi ashole max; chaxwannu hia zangding pangnyi sumle pao.

⁵ Zang wanlombu hia jento ngo angkya hanpakmale zingkya chix kaxtsao amakya tokhange khünaknue chaxwannu oma ang achangle awüt.

⁶ Ikhoma Zang-e chaxwannu to othuak-ozom takdünle akax. Khünaknue a hwome mokdaokya tsangthomle ngopu. Ozün ma ngokya sühi-sühile hile pao.

⁷ Grep zubu zanle pao, ilaxle grepti-ju ma sütüi-sütüile tüi. Ami mongmüi atungle ngokyabu pangwüi ang athax a mongma,

⁸ ilaxle mongmüi atungle hwome mütkya thuaput-waxmai hia sam zing zakle pao.

⁹ Grep-ti bama mongmüile tsai ngaokya athax chitüi; ija saxkya to mongzom-müi angkya mix owachu chitüi.

¹⁰ Tingnu ma pangwüinu thamale hüi, ilaxle ma khang khom ang khünakbu a ma hom ma ka haklaxle kinle ngo.

¹¹ Grep-ti chitüikya khoma athaxpi tingjang lomnu to khünakbu akhong-akha. Othuithui hanpak ang mongmüi a samdaoa; ija a chaxwantok angkya jao maxdaoa.

¹² Tingnu a thama ma tüile, ilaxle ija zünkaibu a pünle amadoa.

¹³ Zangfang angkya pangnu haxtok towüi ija a ile chang angkya changle. Ija a olip tsang hongle tsuak tamchu grep ziak khaile tsuaklaxle puamün wünle tsuak füima changkya ningle changüi.

¹⁴ Ozün ma atale toxkyabue mongmüi tsai ngaoüi. Hannopchi tokyabue Jowanpa a tüle chongle le thüiüi,

¹⁵ ilaxle handün chito tüikyabue chix achuaküi. Molo-Tinu ajole tüikya khünakbue Jowanpa, Israel nok Zang achuakle changüi.

¹⁶ Otsao jat-li, Israel nok achuakle haxtua-zangnam tokyabue tsai ngaokya keme atatüi. Ikoxlechu ku hanpakma monghom angkya müntüi! Ku a ngat-to ngohomle! Khohang mixbue chizakle khohang ngole, ilaxle hwom huxtsing-loptsang mwot ozia süma-sümale male paole.

¹⁷ Ku kax apahüi, pangnusae wüi! Thama, tswomkha, tai, ibue nang tanle ngole.

¹⁸ Thama chak tokya azangle pao ang azongkya pangwüi tswomkha ma dütüi, ilaxle tswomkha chak tokya owa azangle paolaxpuix, ibu pangwüi tai ma amanüi. Ojao chithwonkya zangwat watnu zangdingkho tokya thokle adütüi, ilaxle chaxwannu nui-ting aloxle changüi.

¹⁹ Chaxwan kang laxle sumle chule pao ilaxle afile ozak laile changüi.

²⁰ Chaxwannu jaojao jutokmix ningle-khokhele changüi ilaxle zangchei thoto homsa sile aloxkya ningle sile aloxüi. Chaxwannu to ija ochaxbue sheple anguaküi ilaxle ija otuechu laoxle chizole changüi.

²¹ Jowanpae thakchi tokya tsak-zong hia zangfang angkya lompabu to sikangün angkya hanpak hüile ngole.

²² Zandabu tswomkha tuita ma athütle thomkya ningle Zang-e wanghombu athütle chang ang tomüi. Hwom zothup hanpak nguikya tan ang hwom a kun khato kople thomüi.

²³ Lyetnu a nakle paoüi, ilaxle zanghane nyankya zakle maxüi, chemthüikoxle Jowanpa Khüthak Zang a wanghom ang changüi. Chixe Jerusalem ma Zaion Haxnu dingma apün-awangle changüi, ilaxle khünaknu lompabue chix fuazangkya ngün ang kopüi.