ISAIA 23 - OTSAO BAIBEL (BSI)

Foinesia Hanpakma Kaxho Tuita

¹ Ija a Tair nok hanpakma kaxho tuita changle. Mongmaxle wotlax, nang khuachei mix tinu khato! Tair angkya hünzom khuazaknui a amadaoa; ikha ma tüikya hom-hax hia ija khuazaknuibu a amadaoa. Hünzom khua Saipras tokya nguikya zuma hünzome ija kaxho kopüi.

² Mangsoplax, hünzom Sidon angkya thalex mixbu!

³ Ijip haxtok ma laikya sozam shak ilaxle hang tamchu chaxwannu nok füi thalexle chang angkya hanpakma hünzome tinu akaile khünakbu akat.

⁴ Sidon tingnu, nang ang zak akopdaoa! Tinu shinthuk hia molo tinu nang hato tok ahole thüi: “Ongaichu ku ang su-sa chitüi. Kue sasün hia sacha hwom otuechu tuxle chiatsün.”

⁵ Chemtue Tair nok amütdaoa tale atatkya zuma Ijip nok ngaxchu abütle khosamüi.

⁶ Mongmaxle wotlax, hünzom Foinesia khünakbu! Spain to paole azang ang azonglax!

⁷ Ija a kaiwüi zingle alaikya Tair angkya mongmüi tingnu ang changtsuak ang chami? Tinu talaxle onokbu zing angkya hanpakma tingkop-haxzingkya khünakbu apaokya tingnu changcha?

⁸ Ija pongwün tingnu Tair, owa nok thalex wanghombu zangfang pangnu thakma achuakachenle tüikya hex ija tingnu hato iningkya shoma apüi angkya owa mwot?

⁹ Ija a Jowanpa Khüthak Zang mwot changle. Hwome mokdaokya mwot bama tüikya hwom mongngam oshuk hato ahüi angkya hanpakma tamchu hwome achuak-achenle tüikyabu tha ajao angkya hanpakmale chixe ile mokkya changle.

¹⁰ Hünzom Spain nok angkya khünakbu, paokox üntoxle haxwan mo-zang kox! Athaxpi nang to awa angkya mix owachu müntüi.

¹¹ Jowanpae Tinu ding to chix chak thüidaoa ilaxle wangtingbu max ang tomdaoa. Chixe Foinesia nok angkya thalex nui otongbu max angkya kax koxdaoa.

¹² Sidon tingnu, hünzom mongmüi a ashukdaoa, ilaxle hünzom khünaknu to afangle thomdaoa. Hwome Saipras to paole azang koxlechu, ikhatochu hwom a khangkhosünle müntüiüi.

¹³ (Tair nok dingma faomüi füt ang tomkya a Babilon nok mwot changle, Asiria nok mwot münchang. Ikhato zanhumix pom zailaxle Tair noke ziakople thomkya pünle awüt laxle ija tingnu amale toxkya a Babilon nok changle.)

¹⁴ Mongmaxle awaolax, hünzom tinu mongto khuachei mixbu! Hünzome mongong-chalom ngokya tingnu a amüt-tsuakdaoa.

¹⁵ Zanglao puzom bün hanpak ang Tair tingnu alakle asam angkya hanpak hüile ngole, ija a wangtsün tuita hanpak changle. Chemtue ibu zanglao kaile leüihex, Tair a tsai ma ngaokya tsangtsa hangkya mixcha tuita ningle changüi:

¹⁶ Nang thuaput koplax, tinglong akhople ahamlax, alakle asamdaokya nang tsangtsa hangkya mixcha! Angao kox ilaxle nang tsai chatle ngaokox tamchatlechu mixsünbu ngui ang tom angkya hanpakma.

¹⁷ Chemtue ija zanglao puzom bün kaile paoüihex, Jowanpae Tair a amipongkya she thalex mwot to chat ang tomüi, ilaxle she a zangfang angkya wangtingbu pangnu khato hangle ahamüi.

¹⁸ Thalex laxle she-e kopkya ngun a Jowanpa hanpak ang atsaole danüi. She-e ija athünle münthomüi, ikoxle Jowanpa to shwomkya khünakbue hwom hanpakma laxsese süt hia nyizabu shak ang twonüi.