ISAIA 16 - OTSAO BAIBEL (BSI)

Max angkya Chifün ma Moab

¹ Sela tingnu makhange sak-hax to Moab angkya khünaknue hingho-chaktwon tuita ningle Jerusalem ma apün-adale ngokya mix hato ahüi.

² Hwome Arnon Shuanu kax ma tanle nui ilaxle, athax ile otswon kha angkya daple alaikya osa tuita ningle nong-tsax to khosam ma ahamle ngo.

³ Hwome Judah angkya khünaknu füi akax: “Kwome chem moküihex kwom hama apuahüi. Senu zatzongle changpongma zangkhung fakya pünnu tuita ningle kwom kho awa kop hüi, ilaxle kwom hünzom lox-o fang ma nazak ang tomhüi. Kwom a pünpaobu changle; owaechu atak ang chitsuak angkya khato kwom zuile thomfa.

⁴ Kwom hünzom haxtok ma ngo ang tomhüi. Kwom amüt ang tungle ngokyabu chak tokya kwom azünhüi.” (Zothup hia thama ashukdaoüi, ilaxle haxtok thomjole ngokyabu paole samdaoüi.

⁵ Ifüima Dawid sasün hwomkha angkya tütapu wanghom ang achangüi, chixe mongong füi tamchu mongkün füi khünaknu thakma apün-awangle changüi. Chem supuix ija mok ang chix tüle momüi, ilaxle sukya kaxfün fa angkya to chixe khile huüi.)

⁶ Judah angkya khünakbue thüi: “Moab nok a tüle ngamkya nok ta kwome atatdaoa. Hwom a mongngam hia mix ajao adakya khünakbu changpule kwome awanle, ikoxlechu hwom tsaichong-kaxbongkya chem angchu münchang.”

⁷ Hwome apongle ngokya sikngün khoma Moab nokbu sopüi. Hwome Kir Heres tingnu ma saxle ngohomkya sütmüi-lingmabu texle atak pongma hwom a sopüi. Hwom a khosam ashukkya zangwin-zanghan hato apaoüi.

⁸ Heshbon zui angkya haxtok ilaxle Sibmah angkya grep haxtok, ibu pangwüi amadaoa — oja haxtok ma zaile alaikya grepti-ju füi tingpün-nokwangle ngokyabu tok ang koxhomkya hex. Hanpak tuita ma grep zubu a Jazar alople jao tsale pao, handün chikao ma sak-hax alople, ilaxle hannop chikao ma Omang Tinu tachi alople.

⁹ Jazar angkya grep zubu mangsop pongma ku Sibmah angkya grep zubu mangchu soppu. Heshbon hia Elialeh nyi hanpakma ku mikfi dütle, chemthüikoxle athax khünaknu mong amüi angkya hanpakma puamün angkya chitüi.

¹⁰ Athax haxzao füikya haxtok ma owa angchu mongmüikya chitüi. Grep haxtok ma akhong-akhakya tamchu sai ngaokya mix owachu chitüi. Hoti alai angkya hanpakma owaechu grep chinak; mongmüi to akhong-akhakyabu a ashukdaoa.

¹¹ Moab hanpakma mongmakyae ku wot, tamchu Kir Heres hanpakma mongmaxkya füi.

¹² Moab angkya khünaknu haxhua tokya baozangbu shwomnui hia hwom baoshwom hombu to zangjop ang paokyakyae na-juale max, ikoxlechu ijae hwom ang chemfün amüikya chitüiüi.

¹³ Ija a thoto wüi Moab nok bama Jowanpae fakya kaxho changpu.

¹⁴ Ilaxle athax Jowanpae akaxle: “Zanglao azom changpong khama huanuma tüile ngokya Moab nok tuina samle paoüi. Ikhama huanuma tüikya khünaknu kha angkya hidaole wüi ozün ma toxüi, ikoxlechu hwom a huanuma shonaile maxkyabu ang changüi.”