ISAIA 13 - OTSAO BAIBEL (BSI)

Zang-e Babilon Nok to Sikangün angkya changle

¹ Ija a, Babilon nok hanpakma Amoz sasün Isaia-e Zang tokhange kopkya kaxho changle.

² Tuita kohwon haxnukho ma azan angkya nyiluak apikkox! Süpahibu to tsale akhong kox ilaxle ija ongam tingnu panbu to sing angkya münwan aho ang nang chak ajongkox.

³ Otsao zan azanlaxle chix füi mongtsikle ngokyabu to sikangün angkya hanpakma Jowanpae mongngamle tamchu mongchongle tüikya süpahibu to nyak.

⁴ Haxhuabu tokya ozing to apalax — chongkya khünaknu tu asoxkya zing, jat-li hia wangtingbu asoxkya ozing a. Süpahibu Jowanpa a chix zankat othom zanhok hanpakma achwonle ngole.

⁵ Hwom a tsailo nok haxtua-zangnam tokyabu nguile ngokya changle. Mongtsik ashukle Jowanpa a onok pangwüi amüt ang nguile ngole.

⁶ Kakkoxle awaolax! Jowanpa hanpak a hoxüna; ija nyix a khüthak Zang-e thama apüikya nyix ang changüi.

⁷ Pangnusa ang chak shale changüi, ilaxle khünaknu mongchen chem chitüile changüi.

⁸ Hwom a huanuma abütüi ilaxle sheko tuitae nao ngün ang kakpupule kakkyae hwom to anaoüi. Hwome tata to za dongle huüi, ilaxle azakkyae hwom thün ma wünchuaüi.

⁹ Jowanpa hanpak a nguile ngole — shixle makya hia za-adünkya mongma hia mongtsik nyix a. Chaxwan tok a faokha ang achangüi ilaxle ochax khünak pangwüi amütüi.

¹⁰ Ding angkya lyettsi-lyetsabue nyankya pangwüi zakle paoüi, zanghannu thün naktukle dongüi, ilaxle lyetnue zangngai chifale changüi.

¹¹ Jowanpae thüi: “Kue chaxwannu hato thama apüiüi ilaxle hwom ochax khoma ochax khünakbu to sikangünüi. Kue mongngam füikyabu pangwüi adangüi ilaxle mix kax to na chithale hia mongshix-mongmale tüikyabu pangwüi to sikangünüi.

¹² Hun füi ngaxchu atale toxkya khünak ngün ang wüi süthangle changüi.

¹³ Kue zangdingkhobu abün ang tomüi, ilaxle Jowanpa khüthak Zang, kue chemtue ku mongtsik ahole changüihex, chaxwannu a ma nui-ting angkya aloxle changüi.

¹⁴ “Babilon ma ngole tüikya mixnokbu, müihap mix thoto müikhi paole azonkya ningle tamchu nyetmix chitüile chunbu samkya ningle masamsam to paole samüi.

¹⁵ Owa koplax puix chix a tople langüi.

¹⁶ Chemtue hwom fongmix owachu chitüikya chifün ma ngünpuix, hwom mikngün ma naosombu a thuple akhixüile langüi, hwom hom-pung tsuiüi, ilaxle hwom kakonubu to shingnünle changüi.”

¹⁷ Jowanpae thüile: “Kue Babilon nok to sing angkya hanpakma Medi nok to lüixle apuküi Hwom zongto khop-jan a chem angchu münchang ilaxle hun makhange hwom to thwontsing ang müntho.

¹⁸ Hwome hapnu hia sanbu füi naozünbu langüi. Hwome pexlaksabu hato ngaxchu chingcha ahoüi münchang ilaxle naosombu to jajaüi münchang.

¹⁹ Babilon a pangnu nok füi osün sümüikya wangting changpu; ija a ima tüikya khünaknu mongngam angkya tuita. Ikoxlechu chemle Sodom hia Gomorah nok asongle thokpuix ilailaile Jowanpa, kue Babilon chuwüi asongle thokle awütüi!

²⁰ Ikhama tamchatle owachu münngoüi. Ham-hamle ngokya Arab nok owaechu ikhama ma nyihom zingle münchangüi, ilaxle chunnyetmixe owaechu ikhama ma chunbu danle münchangüi.

²¹ Ijongkha a sak-hax faomüibu ngwotnui ang changüi. Shwonbue ikhato hwom zop zingüi. Ostris o-bu ito ngoüi, ilaxle müijaxpongbu ija tingmax daokya tamting ma füt-shwonle changüi.

²² Long katuk hia wanghom-homlobu makhange hijanbu sopkya zing atat ang kopüi. Babilon hanpak tunu nguile hüidaoa! She hanpak athax kaikya ang changpu.”