IBRI 3 - OTSAO BAIBEL (BSI)

Jisu a Mosa füichu Achongkya

¹ Kutüi kunao khristanbu, opangchu wüi Zange nyakkya changlaxpuix! Kem manzai ang laxkya mongong bama Nguakho ang Zange owa tomle ajopuix, ija Jisu bama ajanglax.

² Zang hom ma mwot mokkya bama Mosa chemle mongao chitüi le changkya hex, ilailaile, owae ija mok ang chix sele koplaxpuix, ija Zang tokya mongong bama Jisu chuwüi mongao angkya chitüi le changkya.

³ Hom popo füi owae ija zingle alai laxpuix chixe wüi achuak achenkya süchongle atakpu. Ilailaile Mosa füi Jisu-e wüi achuak achenkya süchongle kopkoxle asu le tüipu.

⁴ Changle, hom pangnunu wüi owawae zingkox tix laipu üntoxle pangnu li zingle alaikya a Zang, chix changle.

⁵ Mosa a da tuita ningle Zang hom ma mongao angkya chitüi le tüikya, üntoxle athax füichi ma Zange wün angkyabu akax.

⁶ Ikoxle Hosa ningle Khrista a Zang hom ma Opupa changle. Keme monghomkya ma kem mongchyen tamchu mongong jangthom thüiba kem a chix zong to hom tuita changpu.

Zang Khünakbu hanpakma Nazak

⁷ Ikhoma Otsao Chasae akaxkya ningle: “Hünzome anyix Zang kax jangatat thüiba,

⁸ hwom ija nyix sak-hax to tüipongma, hwome chix to thwontsingkya zuma, hünpu hünpa hwom, Zang füi alün-alox pongkya ningle, hünzom ang mongkhüi le taxngo.

⁹ Zanglao punyi bama, kue mokdaokyabu ngünkoxlechu wüi, hwome ku to thwontsing ilaxle wan, le Jowanpa-e akax.”

¹⁰ Ikhoma hwom füi mongma laxle kue thüi: “Othuithuima hwome ku kax chiapa, tamchu ku kaxtom ma chilaxle tüi.”

¹¹ Ku ang mongtsik dong, ilaxle kaxshing kople tsao sax: “Kue hwom nazak ang koxse chaxwan to, kue hwom otuechu nop ang müntom!”

¹² Mongong ma üithohom, ozün ma ngokya Zang füi anongle pao tang hünzom khama owachu chichang-chizangkya kün-mong hia mongong chitüi homle chichang angkya bama likhün lax.

¹³ Itülüi hünzom opupuchu ochaxe dyenkya mongkhüi ang chichang angkya bama, Otsao Lai-e “Anyix” thüikya kaxhuak kem zong to twonle ngokya kople hünzom tata füi nyixfokya to afong-atsoxle tüi angkya changle.

¹⁴ Chemthüikoxle pongwang tokhange wüi tüikya tata tokya mongong oshuk kople, shingmongle jangtwon thüiningle kem pangwüi Khrista füi chifan-chijan zuikhui changle.

¹⁵ Otsao Lai-e akaxkya a ija changle: “Hünzome Zang kax anyix jangatat thüiba, Zang füi alün pongma tüikya hünpu hünpa hwom ningle, hünzom ang mong taxkhüi.”

¹⁶ Zang kax atat tamchu chix füi alün aloxle tüikyabu a opang changkya? Hwom a Ijip chaxwan tokya Mosa-e zünle alaikyabu changkya.

¹⁷ Zangpua punyi mong ma Zang opang füi ngokya hex? Khünaknu opange ochax lyen ilaxle sak-hax to zibak laxpuix, ibu a hwom changkya.

¹⁸ Otue: “Kue hwom nazak ang koxse chaxwan to otuechu nop ang müntom”, le Zange kaxshing kople tsaosax: Ija a owa hanpak ang akax ngokya hex? Chix füi alün-aloxkyabu hanpakma akaxkya changpu.

¹⁹ Ile, hwome mong chiongkya khoma ibu khünaknu, ija chaxwan alop ang chitomkya keme ngünle.