Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

IBRI 2 - OTSAO BAIBEL (BSI)


Akhokya Khosün

1 Ikhoma keme atatle hüidaokyabu otsingtsing to shingmongle künkop angkya changle, ikoxtix kem tswonle münpaoüi.

2 Kaxtaimixbue kem pupabu ang fakya kaxho a otsingtsing changpu le ahodaoa, ilaxle opange ija chitoüihex chichangba kax ma chilaxle tüiüi hex, chixe kopüi.

3 Ikoxlechu ipong chongkya khosün bama mong chikoxba kem azangtsuak angchami? Ija khosün pongwang ma Zang chixjaoe apuk, üntoxle chix kax to apakyabu kem ang ija otsing changpu le ahole.

4 Tamchu jojüikya ohünotün mokle ahokya üntoxle chix küntsu monglua ma hwom ang chasa hinghobu ahanle koxkya, ibu makhange Zange hwom ma tüikya ibu to bole chix kaxkhi fale.


Khosün hato Kem Zunkya Mix

5 Keme chaxwannu oja mo wünpuix: hüiüi tüikya ija chaxwan hozün to apün angkya hanpakma Zange kaxtaimixbu chidan.

6 Itülüi, Otsao Lai ojongjong ma akaxkya lailaile: “O Zang, nange chix tuitex tang, khünak a owa chang; muakya mix, nange chix apu-achang tang a?

7 Nange chix noxtakya hanpakma, kaxtaimixbu füi süfang ma zing; nange chix ang fuazang tamchu, achuak achen chaza sünle kox;

8 ilaxle jamok thakma apün angkya mix ang achang.” Zange: “khünak jamok thakma apün angkya mix ang achang”, le thüile; ija ma tsaotha le pangnu li womle tüile. Ikoxchu tix khünake pangnu thakma apün-adakya keme münngün.

9 Ikoxlechu Jisu, owa noxtakya hanpak bama, Zange kaxtaimixbu süfang le zingkya keme ngünpuix, ija a Zang chingcha makhange chix nok hanpakma zi angkya hanpakmale changle. Chixe zikya sikngün apongle hüidaokya khoma athax a keme chix fuazang hia achuak achenkya khohom sün laxle ngün ang kople.

10 Chix fuazang süntswon ma hak angkya chixsu chixsabu huanuma apüi angkya kuxmale, sikngün akaile lekya makhange Jisu a nguiwangkya ang achang angkya a, jamok zik üntoxle ibu sünle thomkya, Zang hanpakma, ile mok angkya tix sukya ang achang. Chemthüikoxle khosün hato hwom zunle apüi angkya a Jisu tix wüi changle.

11 Chix khünaknu hwom ochaxbu tokya atsao, üntoxle chixchu tamchu opang atsao-atha daolaxpuix ibu pangnu ang Hopa tuita wüi chang. Ikhoma hwom ang chix tüinaohom le nyak ang Jisu chiazak.

12 Chixe Zang ang thüi: “Nange chem mokdaopuix, ija kue tüinao hwom hama wünüi; hwom tusox ma kue nang achuaküi.”

13 Chixe ilechu wüi thüi: “Kue ku mongong Zang ma thomüi.” Chixe ilechu thüile, “Zange ku ang fakya chixsu chixsabu füi ku ikhama tüile.”

14 Zangsu Zangsabu le chixe nyakkya a müi-hi-aji daile, Jisu chix jao hwom lailaile achang üntoxle khünak jaopo ahanle lax. Chix zikya makhange zik thakma apünkya baoli thu angkya hanpakmale chixe ija mok.

15 Ile zik thua zakya tokhange da ang achangle ngokyabu pangnu chixe khangkho angai.

16 Idaile chixe asunkya a kaxtaimixbu to münchangle atsingsho. Itülüi Otsao Lai kax ningle: “Chixe Abraham sixli to asun.”

17 Ile thüikoxle Zang mwottho thakya ma hwom zong to mongong tüikya hia chingchae awangkya Nguakho ang achang angkya kuxma, pangnu lom ma wüi chix a chixtüi chix-nao hwom lailaile achang angkya changle, ikoxle tix khünaknue ochax thailak ataküi.

18 Üntoxle athax a chixe thwontsing apongkyabu to asun ang thoüi, chemthüikoxle chix jaojaoe thwontsing tamchu sikngün apong daokya changkoxle.

Wancho Naga Bible - OTSAO BAIBEL

Copyright © 2012 by The Bible Society of India

Used by permission. All rights reserved worldwide.

Bible Society of India
ကြှနျုပျတို့နောကျလိုကျပါ:



ကြော်ငြာတွေ