HUAKE LAIPEX 9 - OTSAO BAIBEL (BSI)

Anyi-lükya Kaitox Pangpwon

¹ Israel khünaknue Ijip haxtok dantox füima zanglao anyi-lükya lyetkua owang ma Sinai haxhua ma Jowanpae Mosa füi zangwün. Chixe thüi:

^2-3 “Ija lyetkua nyixbün-ali lükya to, zanghan dütkya füi tomle owang wanglaxle, wanlom ma tüikya ningle Israel khünaknue Kaitox Pangpwon nui angkya changle.”

⁴ Ikhoma Mosa-e khünaknu ang ija Kaitox Pangpwon nui angkya akax,

⁵ ilaxle lyetkua owang angkya nyixbün ali lükya hansong ma Sinai sak-hax to hwome ile mok. Jowanpae Mosa ang fakya kaxtom lailaile khünaknue mok.

⁶ Ikoxlechu ikhama züizüi müimang to twonlaxle zanglom ma chitsaokyabu tüikya. Ikhama hwome ija nyix ija Kaitox Pangpwon nui ang chitho. Hwom Mosa hia Arun nyi hato ngui,

⁷ ilaxle thüi: “Kwome müimang to twonle changdaoa ikhoma kwom a müntsao, idaobale Jowanpa hato tö kox angkya bama Israel khünaknu füi chiwomle büle changüi?”

⁸ Mosa-e lan: “Kue Jowanpa kaxlan makopba tam tanhüi.”

⁹ Jowanpae Mosa ang

¹⁰ Israel khünaknu füi akax angkya kaxkoxle thüi: “Chemtue hünzom owawa chichangba hünzom su-sabu müimang to notom laxle chitsaokya ang achangle tüiüihex chichangba ochu to wünham ang paole asuüihex, ikoxlechu Kaitox Pangpwon ma womse tsukya jangtüi,

¹¹ lyetjang tuita füima ija nui ang tsuaküi, ija a anyi-lükya lyetnu kua ma nyixbün ali lükya to hansong ma chang ang tsuak. Ija a twonkhax chiawonkya an hia khaxkya fumchak füi pua angkya changle.

¹² Ofüinop kople sütli chemchu ota chitox angkya changle ilaxle müi oza ojongkhachu chiapak angkya changle. Wanlom ma tüikya olom tole Kaitox Pangpwon nui angkya changle.

¹³ Ikoxlechu owawa zanglom ma tsaothale tüi tamchu ochu to mixwün to paole chu chiasu ikoxle Kaitox Pangpwon ma chinuile changkya khünak a chemtuechu ku khünak changpule münlax, chemthüikoxle chixe ku ang lyettex-hantyale thomkya nyix hingho-chaktwon chifa. Chixe a ma ochax khoma sikngün apong angkya wüi changpu.

¹⁴ “Hünzom khato ngole hüikya mixnoke ija Kaitox Pangpwon nuise jangtsu, chixe ija a wanlom ma tüipupule mok angkya wüi changpu. Manok wüi changlax mixnok wüi changlax, wanlom a tuitata wüi changpu.”

Za-adünkya Zangfwom

^15-16 Jowanpa ngwotnui Nyihom zingle ajongkya nyix, zangfwom tuita hüilaxle ija to jox. Zangnak ma ija zangfwom a wün lailaile ngün.

¹⁷ Chemtue ija zangfwom thak to dongle changüihex, Israel khünakbue pombu pünüi, ilaxle zangfwom chatle ojongma jupuix, ikhama hwome pom zaiüi.

¹⁸ Khünaknue Jowanpa kaxtom ma pom pün tamchu chix kaxtom ma wüi pom zai. Nyihom khoma zangfwom ngokya kople hwom pom tuitata ma wüi ngo.

¹⁹ Chemtue zangfwom Nyihom tok ma okuilole ngopuix, hwome Jowanpa kax ma laxle ikha angkya chiachex homle ngo.

²⁰ Tamtampong a Nyihom tok ma zangfwom hanpak hidaole wüi ngo; tütale wüi chang koxlax, hwom pom ma nui angkya hia achex angkya hwome Jowanpa kaxtom ma tix tsuak.

²¹ Tamtampong a zangfwom hansong makhange swompui zangngai koplanlanle ngo, ilaxle zangfwom ding to dongkya füi tomle hwome pom achex. Chemtue zangfwom ding to dongpuix, hwom achex.

²² Nyixta anyi wüi changlax, lyetjang tuita wüi changlax, zanglao tuita wüi changlax chichangba ifüi sühomle chuwüi changlax, Nyihom tok ma zangfwom ngokya kople, hwom onui angkya chiachex; ikoxle chemtue ija ding to dongpuix, hwom achex.

²³ Hwom pom ajong angkya chichangba pün angkya, tütali wüi chang koxlax, hwome, Jowanpae Mosa ang fakya kaxtom kax ma laxle mok.