HUAKE LAIPEX 8 - OTSAO BAIBEL (BSI)

Wüntik Dankya

¹ Jowanpae Mosa ang thüi:

² “Chemtue chixe wüntik anüt lotsap ma danüihex, chixe wünzunge thüntho chito nyankya lima dan angkya Arun füi akaxkox.”

³ Arun-e ija kax ma laxle wüntik a lotsap thüntho chito ahole dan.

⁴ Mosa hato Jowanpae ahole fakya lailaile ija lotsap a okho chito khange otongchi kople hun thuplaxle zingkya changkya.

Liwi Hwom Atsaole Dankya

⁵ Jowanpae Mosa ang thüi:

⁶ “Liwi hwom a Israel khünaknu mamabu füi süilax ilaxle

⁷ ikhama akax ngokya lailaile hwom atsaokox: Otsao tie sakle jwom atsaokox ilaxle hwom ang tsangtsa mun pangwüi ong angkya tamchu nyi-za sole chang angkya akaxkox. Ile jangchangba zanglom ningle hwom otsao ang changüi.

⁸ Ifüima hwome maihupongsa tuita laxüi ilaxle saxziak tö hanpak ang olip münga füi awon ankhix hidaole laxüi, ilaxle nange ochax tö hanpak ang maihupong chatle mamachu kopüi.

⁹ Ifüima Israel khünaknu pangwüi asox ang tomkox ilaxle Liwi hwom a Jowanpa ngwotnui Nyihom tunthoma ajong ang tomkox.

¹⁰ Israel khünaknue hwom chak Liwi hwom khangkho ma dan angkya;

¹¹ ifüima Israel khünaknu kha angkya Liwi hwom Arun-e tuita ataxkya hingho ang atsaole koxüi, ile hwome ku mwot mok ang tomüi.

¹² Ifüima Liwi hwome hwom chak maihupongpa anyi khangkho ma danüi; tuita a ochax tö ang koxüi ilaxle atat a zokle ashunkya tö ang kox angkya changle, ija a zanglom ma Liwi hwom atsao angkya hanpak ang mok angkya changle.

¹³ “Liwi hwom a, tuita ataxkya hingho ningle ku ang atsaole koxhüi, ilaxle hwom to hume ang Arun hia chix sasün hwom dankox.

¹⁴ Ile hwom ku kux ang lax angkya hanpakma Israel khünaknu tu angkya Liwi hwom süile dankox.

¹⁵ Nange Liwi hwom atsaole dankya füima, hwom a Nyihom ma mwotmok ang asule changüi.

¹⁶ Kue hwom a Israel khünak tüichongpapa khülüix ma laxpu, idaile hwom a ku tata kux changle.

¹⁷ Chemtue kue Ijip nok tüichongpapa langle changpuix, Israel khünak khama tüichongpapa komle ku kux ang atsaole koppu, ifüitomle tsom-pom chuwüi pongwang ma puxkyakya komle kamle koppu.

¹⁸ Athax kue Israel khünak tüichongpapa lüi ma Liwi hwom laxpu,

¹⁹ ilaxle Liwi hwom to hume angkya kue Arun hia chix sasün hwom ang hünlit koxpu. Israel khünak angkya hingho-chaktwon amüikya tuita ningle hwome Nyihom ma mwotmokle changüi, Ija a ataxkya Otsao Nui to hüikya zuma Israel khünaknue thama apong angkya kho-awa angkya hanpakma changpu.”

²⁰ Idaile Mosa ang Jowanpae fakya kaxtom lailaile, Mosa, Arun hia Israel khünaknue Liwi hwom atsaole dan.

²¹ Liwi hwome malailai to atsao koxle ma nyizabu so, ilaxle Arun-e ibu ataxkya hingho tuita ningle Jowanpa ang atsaole kox. Chixe chuwüi hwom atsao angkya zanglom ningle zomzing.

²² Liwi hwom bama Jowanpae Mosa ang fakya kaxtom pangwüi hwome mok. Ikhoma Arun hia chix sasün hwom cha-o ma, Nyihom ma, Jowanpa thothale chang angkya Liwi hwom asukya ang lax.

²³ Jowanpae Mosa ang thüi:

²⁴ “Zangtsa aga makhange Liwi hwom pangnusae wüi ku ngwotnui Nyihom ma mwotmok angkya changle,

²⁵ ilaxle zanglao punyi-bün nguikya zuma chix mwot zakle changüi.

²⁶ Ifüima chixe Nyihom ma hozui Liwi hwome mokkya mwot to asun-azule chang ang tsuak, ikoxlechu chixe ma mwot le chemchu chimoküi. Ija ningle nange Liwi hwome mok angkya mwot to humele changüi.”