HUAKE LAIPEX 7 - OTSAO BAIBEL (BSI)

Lompabu Tö

¹ Jowanpa ngwotnui Nyihom zaile alai tsuakkya nyix Mosa-e ija Nyihom tamchu ima tüikya tuina pangwüi münga füi lilaxle atsaole dan, tö-tsap hia ima tüikya tuinabu tochu ile wüi chang.

² Ifüima saxthom lompabu opang Israel jat-li lompabu ang chuwüi changpuix, opang ang khünak huak münzale akiak angkya hünlitchu koxle thompuix,

³ hwome ma tö Jowanpa hato apüi, ibu a: maihu-kanlin azok ilaxle maihupong bün-anyi, maihu-kanlin tuita a lompa anyi bama ikoxle maihupong tuipong a lompa tuipong hanpak. Hwome ibu koxle changkya füima

⁴ Jowanpae Mosa ang thüi:

⁵ “Nyihom zingkya mwot tsuak angkya kuxma hingho ibu a pongle koplax; ibu Liwi hwom ang laxkox, ija a hwome mok angkya otsao mwot moktsuak angkya hanpak changle.”

⁶ Idaile Mosa-e maihu-kanlin hia maihupong, ibu Liwi hwom ang kox.

⁷ Chixe Gershon nok ang maihu-kanlin anyi ilaxle maihupong azok kox.

⁸ Merari hwom ang chuwüi maihu-kanlin ali üntoxle maihupong achyet kox. Hwome mwot pangwüi Arun sasün Ithamar lomzun ma mok angkya changle.

⁹ Ikoxle Mosa-e Kohath hwom ang maihu-kanlin hia maihupong chemchu chikox, chemthüikoxle hwome hün angkya otsao tuina a suak-kang ma paile lax angkya changle.

¹⁰ Tötsap atsaokya mün ma pua angkya hanpakma lompabue chuwüi tö apüi. Chemtue hwome ibu hinghobu tö-tsap ma kox ang achwonle changlaxpuix,

¹¹ Jowanpae Mosa ang thüi: “Nyixbün anyi mong ma tö-tsap atsao angkya hanpakma nyixfokya to lompabu tuiponge ma hingho apüile kox angkya oli changle.”

^12-83 Hwome ile ibibi olom ma ta füima ta le azutle Jowanpa hato hwom töbu apüi: Nyix Jat-li Lompa 1lükya Judah Aminadab sasün Nahshon 2lükya Isakar Zuar sasün Nathanel 3lükya Zebulun Helon sasün Eliab 4lükya Reuben Shedeur sasün Elizur 5lükya Simeon Zurishaddai sasün Shelumiel 6lükya Gad Deuel sasün Eliasaf 7lükya Efraim Amihud sasün Elishama 8lükya Manasseh Pedahzur sasün Gamaliel 9lükya Benjamin Gideon sasün Abidan 10lükya Dan Amishadai sasün Ahiezar 11lükya Ashar Okran sasün Pagiel 12lükya Neptali Enan sasün Ahira Mixhuak mixhuakke apüikya tö a malom-malom to tüikya: Khop-jan khua onok ziathop ma otuak 1.5 lixkya ilaxle khop-jan khuatsum tuita a 800 gram lixkya, le changkya. Pangnyi wüi saxziak tö ang apüikya münga füi awon tüikya ankhixe awangle tüikya; hun khuanu tuita 110 gram lixkya tüikya, ija a ongan müikya so jalie awangle tüikya; maihupongsa tuita, chun ola tuita ilaxle zanglao nguidaokya chun hosa tuita, ibu a zokle ashunkya tö hanpak ang; ochax tö hanpak ang zwon tuita; ilaxle maihupong anyi; chun ola aga, zwon aga, ilaxle zanglao nguidaokya chun hosa aga, ibu a notom-tusüi to hanpak ang changkya.

Nyix Jat-li Lompa

^84-88 Hwom lompabu mixsün bün-anyi a tö-tsap atsaole lax ang tö apüikya pangnu athüt koxle ibibile changkya: khop-jan khua 12 üntoxle khop-jan khuatsum 12 atuak koxle tuak 27.6 tüikya ongan müikya jalie awang laxle hun khua 12 atuak koxle tuak 1.32 tüikya maihupong 12, chun ola 12, zanglao nguidaokya chun hosa 12, ifüi tomle zokle ashunkya tö hanpak ang saxziak tö, le tüikya ochax tö hanpak ang zwon 12 notom-tusüi tö hanpak ang maihupong 24, chun ola 60, zwon 60, chun olasasa 60 le tüikya.

⁸⁹ Chemtue Jowanpa füi zangwün ang Mosa Nyihom to dongpuix, ipongma ozang füikya zünmok anyi otanti ma Tsaotsüt Suak ding ma atsople thomkya wün makhange Jowanpae chix füi zangwünkya atat.