HUAKE LAIPEX 5 - OTSAO BAIBEL (BSI)

Chitsaokya Khünakbu

¹ Jowanpa Mosa ang thüi:

² “Ngwon-kak tüikya mix chichangba fünma angkya oti zanle paongokya mix tamchu müimang to twonkya makhange opang chitsaokya ang achangle ngotüipuix, Israel khünak ibu pangwüi thongnui angkya alai angkya kaxtom laxkox.”

³ Hwom makhange, ku khünakbu füi tomle ku ngokya thongnui jaojao chitsaokya ang chiachang angkya kuxma, zanglom ma chitsaokya khünakbu a alaidao.

⁴ Israel khünakbue ija kaxtom kax ma laxle hwom pangwüi thongnui angkya alai.

Thaidaokya bama Thathom

⁵ Jowanpa Mosa ang,

⁶ Israel khünaknu hanpakmale ibibile adangle fa. Chemtue owawae Jowanpa to mongong chithom tamchu owawa füi thaithaxle changüihex,

⁷ chixe ma thaikya ochax ngai angkya wüi changpu ilaxle ija tha komkaile thom angkya wüi changpu, iboma onüi ang owa zongto chix thaidaolaxpuix, chix ang hota ma thomtsa obo ang kox angkya changle.

⁸ Ikoxle ija mixsün a zidaoa ilaxle tsangthom mün pong ang haxnu-homsa owachu chitüile jangchang thüiningle ija a nguapa hanpak ang koxüi. Ija otha thomkya a thaikya mix hanpakma zanglom ma atsaole zomzing angkya chun obo ang koxkya changpu.

⁹ Tamchu Israel khünakbue ataxkya tö Jowanpa apüikyakya a, ibu füi Jowanpa tö koxle hüikya nguapabu tsyen changpu.

¹⁰ Nguapa pange wüi hwom hato apüile fakya tö a pongle kop angkya changpu.

Mongao Füikya Kakopabu füi Kakonubu Zangwün

¹¹ Jowanpae Mosa ang kaxtom kox;

^12-14 Israel khünaknu ang ibibile adangle fakox: Owawae ma kakonu to, owawa mama mixsün füi nganguikya makhange she chitsaokya ang achangdaoa, le ana angkya mix tüingo ünkoxlax. Ikoxlechu ija kakopae atsingsho tomtatale otong atakle chichang, chix kakonu ma thaikya a chitüi iboma ngünmix owachu chitüi, chemthüikoxle she onui ma lopkya mix chitüikoxle, chichangba kakonu thaikya chitüikoxlechu kakopae mongaokya lanlan chuwüi chang koxlax.

¹⁵ Ija zangwün pangnyi bama, ija mixsün ma kakonu nguapa hato apüiüi. Chixe tö koxkya ma laxse ankhix tuak tuita apüiüi, ikoxlechu chixe ija to olip müngae chiliüi chichangba ongan müikya tütalichu ija ma danle chichangüi, chemthüikoxle ija a mongao tüikya kakopa tuita makhange fakya tö changle. Chixe ija otsingtomtata kotok to angai angkya hanpakma apüikya changle.

¹⁶ Nguapae ija mixcha thüntho chito dünlaxle tö-tsap tunthoma ajong ang tsanüi.

¹⁷ Chixe tik-khe ma otsao ti hidaole thoküi ilaxle Jowanpa ngwotnui Nyihom mong angkya hax hidaole laxüi ilaxle ija akhüt ang ti ma danüi.

¹⁸ Ifüima chixe ija mixcha khothwop daüi ilaxle tö an she chak ma danüi. Othuak-ozom apüi angkya tik-khe angkya khaxkya ti nguapae chix chak ma kopüi.

¹⁹ Ifüima nguapae kaxzexle tsaotsütkya to changpule ija mixcha ang kaxngai ang tomüi: “Nange chinunchakkaile chithai thüiningle ija ti makhange ahüi angkya thuakzome nang to chem münthüiüi.

²⁰ Ikoxle nange chinunchakkaile jangchangdao thüiningle,

²¹ hünzom khünaknu khama, Jowanpa nang mün a othuak-ozom ang naxachang dao. Chixe nang angkya süpom nui zan üntoxle lünfum-woktang le chang ang naxtom.

²² Ija ti noplaxle nang wok fing ang naxtom tamchu nangkux-nangka zanle pao ang naxtom.” Shekonue lanüi: “Ku mong tsupu, Jowanpae ku to ile naxhwonkox.”

²³ Ifüima nguapae ija thuakzom kax zale kopüi ilaxle ija laiza tikkhe kha angkya khaxkya ti ma somüi.

²⁴ Chixe ija mixcha ang ti alingüi thoma, she ang tüle wok kak ang tomüi,

²⁵ nguapae ija mixcha chak angkya tö an laxüi, ija Jowanpa ang atsaole chix chak ma twonüi ilaxle tö-tsap ma tö koxüi.

²⁶ Ilaxle ija tsaotsüt mün ma chixe ikha angkya an chakpuix tuita kopüi ilaxle ija tö-tsap ding ma zokle ashunüi. Oshukma chixe ija mixcha ang ija ti ling ang tsanüi.

²⁷ She-e chinunchakkaile jangchangdao thüiningle ija tie she ang wok huanuma kak ang tomüi, she ang wok huanuma fumüi ilaxle she kux-ka zanle paoüi. She mün a hwom khünaknu tu ma tuita othuak-ozom mün ang changüi.

²⁸ Ikoxlechu she ma thaikya chitüi thüiningle, she to chem münthüi ilaxle she-e otia ma naosom pux-paile chang ang thoüi.

^29-30 Ojong khato lüka mixpa tuita ma mikzalokya hia mongao makhange ma kakonu to chinunchakkaile thaidaoale anapuix, ipongma iningkya zangwün bama ile mok angkya a tuita wanlom ang changle ngoüi. Sheko mixnu a tö-tsap tunthoma ajong ang tomüi, ilaxle nguapae ija zomzingle changüi.

³¹ Lüka mixpa to a chemchu chithüiüi ikoxlechu kakonu, she jangthaidao thüiningle, ija tsangmüt tüi angkya jang changpu.