HUAKE LAIPEX 31 - OTSAO BAIBEL (BSI)

Midi Nok füi Azankya Otsao Zanhok

¹ Jowanpae Mosa ang thüi:

² “Israel nok to hwome chemle hwondaopuix ija khoma nange Midi nok to sikngün ang tomkox. Nang a ija mwot mokle tsuak füima zi angkya changle.”

³ Idaile Mosa-e khünaknu ang thüi: “Zan to ka ang achwonlax; Jowanpa to hwome chemle hwondaopuix, ija khoma Midi nok tingtak laxle hwom zothuple sikangün angkya changle.

⁴ Israel nok homjen foto 1000 tuipong khünak akat-hüi.”

⁵ Idaile pangnu homjen tokya wüi khünak 1000 tuipong zünle kop; ile pangnu athütle 12000 khünak zan to ka ang achwon.

⁶ Nguapa Eliazar sasün Finehas lomzun ma Mosa-e khünak ibu zan to akat. Finehas a otsao tuita tamchu khong kaxho ang nyazong mütkya lompa tuita changkya.

⁷ Jowanpae Mosa ang kaxtom koxkya ningle hwome Midi nok to sing, ilaxle khünak pangwüi langle awüt.

⁸ Ikhama Midi nok wanghombu ibibi wom: Ewi, Rekem, Zur, Hur, ilaxle Reba. Hwome Beor sasün Balam chuwüi lang.

⁹ Israel khünakbue Midi nok mixnu-naosom kople apüi, hwom tsom-pombu kople apüi, ilaxle hwom tuinabu komkaile thomjole tox.

¹⁰ Hwome tingnubu hia hwom pombu pangwüi zokle ashun.

¹¹ Hwome ma chak ma kopkyakya tuina komkaile tsuile pao, zandabu hia müibu komle,

¹² ilaxle ibu pangwüi hwome Mosa hia Eliazar tamchu Israel khünaknu pangnusa, opang Jeriko makhange Jordan shuanu talaxle Moab haxsha ma athongle tüikya hex, hwom hato apüi.

Süpahibu Chatkya

¹³ Ibu zankatmixbu füi apong ang Mosa, Eliazar hia Israel khünaknu pangwüi laile pong to za.

¹⁴ Zan wün wangle tüikya zankat mixbu, okax-okhobu, zankat othom-othom ma lompabu, ibu füi Mosa ang mongtsik.

¹⁵ Chixe hwom ma atüi: “Hünzome ibu shekobu, hwom ozün ma büthüikoxle tüi?

¹⁶ Texle ataklax, Balam kax ma lax üntoxle Peor ma khünaknu ang Jowanpa zongto mong chiongle tüi ang tomkya a shekobu mwot münchangdai hia? Ija khokho ma Zang khünaknu hato kaknu-laknu le ang tompu.

¹⁷ Idaile athax hünzome, naosom hia shekobu opange sheko lüka atu-amaikya mwot mokle hüidaopuix, ibu pangwüi langdao.

¹⁸ Ikoxlechu naochabu tamchu shekobu opange atu-amaikya mwot mün matik-hex ibu a hünzom hanpak ang tüilax.

¹⁹ Athax hünzom opange mix mik amütle changdaopuix tamchu mang to twonle changdaopuix, ibu pangwüi nyix anüt hanpak ang pom homtho to ngoüi. Nyix azom hia nyix anüt lükya to hünzom tamchu hünzome kopkya shekobu atsaolax.

²⁰ Hünzome nyizabu pangwüi tamchu müikhwon füi zingkya bwot-ba pangwüi tamchu zwon-mun, chichangba pün, ibu pangwüi atsaolax.”

²¹ Nguapa Eliazar-e zan to kakya chatkyabu ang thüi: “Ibu a Jowanpae Mosa ang fakya wanlombu changle.

^22-23 Chempang jali shunle chipao angkya hex, thütba: Hun, khop khopnan, jan, tam chichangba hotu, ibu a wün makhange atsao angkya changle. Iboma mamabu pangwüi ti makhange atsao angkya changle.

²⁴ Nyix anüt lükya to hünzom ma nyizabu soüi; ifüima hünzom a zanglom ma otsao ang laxüi ilaxle pom hommong to dong ang tomüi.”

Tsuile Kopkya Tuina Ahankya

²⁵ Jowanpae Mosa ang thüi:

²⁶ “Eliazar hünkhi mama lompabu füi tomle, zan ma kopkya tuinabu komkaile akia angkya changle, ikhama zanda ang kopkyabu hia müibu chuwüi womle akiak angkya changle.

²⁷ Chempang kople tüipuix, pangwüi othom anyi ang afithole ahanlax, thom tuita a süpahibu tsyen ang ilaxle thom tuita a noknu tsyen ang.

²⁸ Süpahibu tsyen ang daokya tuina kha angkya Jowanpa hanpak ang tuita süi ningle, zandabu 500 kha angkya tuita, ilaxle ija thathüt ma maihu, mantsak, chun hia zwon, ibu pangwüi kha angkya süile tüikox.

²⁹ Ibu a nguapa Eliazar chak to, tuita Jowanpa ang süntom onüi tuita ningle laxkox.

³⁰ Khünaknu ang koxkya kha angkya,50 kha angkya tuipong, zandabu, maihubu, mantsakbu, chunbu ilaxle zwonbu, ibu pangwüi kha angkya süile koplax. Ilaxle ibu a Jowanpa Nyihom to hule ngokya Liwibu hanpak ang laxkox.”

³¹ Mosa hia Eliazar nyie Jowanpa kaxtom kax ma laxle mok.

^32-35 Ibibi a süpahibue kopkya, hwome matsyen ang tüikyabu to obo ang: 675, 000 chun hia zwonbu,72, 000 maihu,61, 000 mantsakbu, ilaxle 32, 000 naochabu.

^36-40 Süpahibue tüikya süifi a 337,500 chun hia zwonbu, ikha angkya 675 a Jowanpa süi ang dan; maihu 36, 000 a süpahibu tsyen ang dan, ikha angkya 72 a Jowanpa süi ang tswon; 30,500 mantsakbu a süpahibu süntom ang dao, ikha angkya 61 a Jowanpa süntom ang dao; ilaxle 16, 000 naochabu a süpahi ang lax ang tüi, ikha angkya 32 a Jowanpa süntom ang tswon.

⁴¹ Idaile Mosa-e Eliazar ang ija süi Jowanpa hanpak ang amüikya süntswon tuita ningle kox, ilaxle ile chang angkya a Jowanpa kaxtom changkya.

^42-46 Noknu süntswon chuwüi süpahibu füi tomwüile changkya: 337,500 chun hia zwonbu,36, 000 maihu,30,500 mantsakbu, ilaxle 16, 000 naochabu.

⁴⁷ Ija süntswon kha angkya Mosa-e punyi-bün to tuipong, zandabu hia müi pangwüi, Jowanpa kaxtom tüikya lailaile lax ilaxle Jowanpa Nyihom apu-achangle hume ngokya Liwi hwom ang kox.

⁴⁸ Ifüima süpahi lompa ang ngokya Mosa hato ngui

⁴⁹ ilaxle kaxwün wangle akax: “Alixachong, Kwome kwom lomzun fang ma ngokya süpahibu akiakle changdaoa ikoxle mixsün tuita ngaxchu münmax.

⁵⁰ Idaile kwom pangnusae, mae akopkop: hun likwün, tu-thuak, khüfux, nasax, ibu pangwüi üntoxle tuiza-nakombu apüipu. Kwome ibu kwom khüzün lüi ma omün ningle ibu Jowanpa ang koxpu, athax füichima chuwüi chixe kwom khosünle naxthom.”

⁵¹ Mosa hia Eliazar nyie ibu hun tuiza-nakom pangwüi pongle kop.

⁵² Okax-okhobue koxkya pangwüi athüt koxle tuak 200 tukuxjao bang.

⁵³ Okax-okho chichangkyabue hwom kopkya pangwüi ma chakchak to thom.

⁵⁴ Ile Jowanpae Israel khünaknu khosünle thom angkya hanpakma, Mosa hia Eliazar nyie hun ibu Nyihom to apüi.