HUAKE LAIPEX 18 - OTSAO BAIBEL (BSI)

Zompu-zangpa hia Liwi Hwom Mwot

¹ Jowanpae Arun ang thüi: “Nang, hünsa hwom ilaxle Liwi hwom pangwüi, ku ngwotnui Nyihom to thothakya mwot ma thaile jangchang thüiningle, ija tsangmüt ang fuxtsüi angkya wüi changpu, ikoxlechu zom mwot mokkya bama thaile jangchang thüiningle, ija a nang üntoxle hünsa hünzom tsangmüt changpu.

² Nang üntoxle hünsa hünzome Nyihom ma mwot mokle changpongma hünzom to fong angkya hanpakma, ma-mix, Liwi homjen angkya haxnu-homsa khünak apüilax.

³ Hwome hünzom to asun angkya mwot tamchu Nyihom angkya hwom hünlit mokle alan angkya wüi changpu; ikoxlechu Ataxkya Otsao Nui angkya otsao tuina hia tö-tsap füi tütali awut-alüile chang angkya oli münchang. Hwome awut-alüile jangchang thüiningle, hwom tamchu hünzom pangwüi ang mik max ang tomüi.

⁴ Hwome hünzom füi tomle moküi ilaxle Nyihom angkya hwom hünlit pangwüi mokle alai angkya changle, ikoxlechu chingui-chiwangkya khünak owaechu hünzom füi mok-sax angkya olom müntüi.

⁵ Ataxkya Otsao Nui hia tö-tsap füikya mwot hünlit ang nang ilaxle hünsa hünzome tsuak angkya oli changpu, ikoxle tix tamchatle Israel khünakbu füi ku ang mongtsik-mongmakya chitüiüi.

⁶ Israel nok kha angkya hünzom haxnu-homsa Liwi hwom, nang hanpak hingho tuita ningle amle kopkya a ku changpu. Hwom a ku hanpak ang atsaole kopdaokyabu changpu. Idaile hwome Nyihom ma hwom mwot mok ang thoüi.

⁷ Ikoxlechu tö-tsap ma mok angkya zom-zang hia Ataxkya Otsao Nui füikya zom-zang mwot ba hünlit a, nang üntoxle hünsu-hünsa hwom, hünzome tix lax angkya changpu. Ibu bama nang hünlit, chemthüikoxle kue nang ang zompu-zangpa hingho koxdaokoxle. Okho chinguikya khünak owawa otsao tuina hato hüile jangchang thüiningle chix a zi ang tomüi.”

Nguapabu Süntombu

⁸ Jowanpae Arun ang thüi: “Hulax, nang hanpakma tö koxkya to humele chang angkya kue nang ang koxpu; Israel khünaknu otsao hingho pangwüi bama kue ibu nang süntom tamchu jento hünsu-hünsa hwom süntswon ang kopüi.

⁹ Ataxkya otsao tö chempang wün to chitakle toxpuix, ibibi pangwüi nang kux: saxziak töbu, ochax töbu, tsangthom töbu. Hwome otsao tö le ku ang chempangsa koxlaxpuix ibu pangwüi nang üntoxle nangsu-nangsa hwom kux changüi.

¹⁰ Hünzome ibu otsao nui to sax angkya changle, ilaxle ibu a lükakae tix sax angkya changle; ibu a otsao changpule laxüi.

¹¹ “Ito bole, Israel khünakbue mama chemchem onüi amüikya le kox-zunkya jangtüi thüiningle, ibu chu nang kux wüi changüi. Kue ibu nang ang, hünsu hünsa hwom ang, sheko naosom lüka naosom pangwüi ang, othuithui hanpak ang koxpu. Nang homkha khünak opang zanglom ma tsaothale asulaxpuix, noke ija sax ang tsuak.

¹² “Israel khünaknue zangfo to ku ang koxkya kha angkya, haxtok ma alailai, sümüimüi kue nang ang koxpu: Olip münga, grep-ti, ilaxle saxziak iningkyabu a.

¹³ Ibu pangwüi nangkux. Nang homkha angkya khünak zanglom ma tsaothale angongo pangnue ija sax ang tsuak.

¹⁴ “Israel khünaknue fünthole ku ang dankya tuina pangwüi nangkux.

¹⁵ “Somwang nao chichangba pongwang ma puxkya tsom-pom chempang Israel noke ku ang danpuix, ibu pangwüi nangkux. Ikoxlechu pongwang ma apuxpux dankya, khünak a nange otha koxlaxle shakle tüi angkya oli; pongwang ma puxkya müi, ofwot füi tüile jangchang, nange ija otha koxlaxle shakle tüi angkya oli.

¹⁶ Naosombu a lyetjang khonguile jangchongdao thüiningle shakle tüi angkya oli; otha a khop-jan ngunkhix aga koxlaxle shaküi; ija a onok thathop changpu.

¹⁷ Ikoxlechu pongwang ma puxkya maihu, chun, zwon, ibu a shakle chat angkya oli münchang; ibu a komkaile ku kux jao, idaile ibu a ku ang tö koxpongma kox angkya oli changpu. Ibu aji a tö-tsap to sakle awütüi ilaxle ozao a süt tö kox angkya ang zokle ashunüi, ija ongan a ku zongto tüle müikya ongan changpu.

¹⁸ Ataxkya tö koxpongma chemle otsom, tsaxchi chung ibu nang kux changpuix iningle ibu angkya müi nang kux ang changüi.

¹⁹ “Israel khünaknue ku ang onüi koxkya hinghobu kue nang ang, nangsu-nangsabu, sheko lüka hwom pangwüi ang, othuithui hanpak ang koxpu. Ija a kue nang füi tamchu nang sixli hwom füi tsaotsütle tamchiama angkya tsaosüt thomkya changpu.”

²⁰ Jowanpae Arun ang thüi: “Mantswon füikya tuina nange ku angkya chemchu münkoppu, ilaxle Israel nok haxtok süntswon nang ang jongtakhachu münfapu.”

Liwi Hwom Süntom

²¹ Jowanpae Arun ang thüi: “Israel khünaknue ku ang koxkya pangnuli kha angkya kue bün ma thom tuita Liwi hwom ang koxpu. Ija a hwome ku Nyihom ma thothale changkya bama hingchak mün tuita ningle changpu.

²² Mama Israel khünakbu owachu Nyihom zuito soxlaxle ma hato zikmüt-mangkho apüi angkya oli münchang.

²³ Athax makhange Nyihom to hume angkya tamchu ija hanpakma hünlit Liwi hwom tata lax angkya changle. Ija wanlom a othuithuima nangsu-nangsabu hanpak angchu ngo angkya changle. Israel haxtok ma Liwi hwom ang onyem tuina le chemchu müntüiüi,

²⁴ chemthüikoxle Israel nok a sümüikya hingho ang ku hato bün ma thomta apüile koxkya tö kha angkya hwom süntom ang koxdaoa. Ikhoma Israel haxtok ma hwom ang onyem tuina chemchu müntüi angkya changle le kue hwom füi akaxdaoa.”

Liwi Hwom Bünfong

²⁵ Liwi hwom füi akax angkya hanpakma

²⁶ Jowanpae Mosa ang kaxtom kox: “Chemtue Jowanpae hünzom süntswon ang koxkya bünfong Israel nok chak tokya hünzome kople changüihex, hünzome Jowanpa hato sümüikya süntom ningle bün ma othom tuita apüile kox angkya changpu.

²⁷ Ija sümüikya süntom apüile koxkya a manzai mixbue hwom manzai puamün kha angkya saxziak hia grep-ti apüile koxkya füi tuita ang changüi.

²⁸ Ile hünzome chuwüi Israel khünakbu angkya bünfong kopkya kha angkya Jowanpa hato amüikya hingho apüi angkya changpu. Hünzome Jowanpa hanpakma amüikya süntom ija a nguapa Arun chak to kox angkya changpu.

²⁹ Ija nange kopkya kha angkya amüikya laxkox.

³⁰ Chemtue hünzome sümüikya kha angkya koxpuix, ifüima ota pangwüi tüile changüihex, ija chuwüi manzai mixbue, hwome tö koxkya füima atale toxkya laxkya thatha ang changüi.

³¹ Hünzome tamchu hünzom kakobue ota toxkyabu a tütakhatochu sax ang tsuak, chemthüikoxle ija a hünzome Nyihom ma mwot mokle changkya bama hingchak mün kopkya thatha changpu.

³² Hünzome sümüikya Jowanpa ang koxle ngokya kople, ija saxkya zuma hünzom thaikya müntüiüi. Ikoxlechu amüikya kha Jowanpa ang koxle chikop homtoxle saxkya tokhange, Israel khünakbue apüikya otsao hinghobu nusaknusüikya ang wüi achang laxma; hünzome ija jangmok thüiningle hünzom a mik max ang tomüi.”