HUAKE LAIPEX 14 - OTSAO BAIBEL (BSI)

Khünaknue Kaxthup-ngaotünkya

¹ Jamütungle khünaknu künmax-mongshanle sop.

² Hwome Mosa hia Arun nyito kaxthup-ngaotünle akax: “Ijip nok to zikox wüi müikya ang changse chichangba chu ija faokha to zikoxwüi müikya ang changse!

³ Jowanpae kwom ija haxmik to chem hanpakmale apüipuix? Kwom a zanhok ma langdao angkya changle ilaxle kwom sheko hia naosombu a zan-nokbue koplaxle paoüi. Ijip nok to chatkya wüi müikya ang münchang puixmi?”

⁴ Ikhoma hwome tata füi zangwün: “Keme lompa tuita kamhax ilaxle Ijip nok to chat-hax!”

⁵ Ifüima Mosa hia Arun nyi khünaknu tunthoma hax to akhuxle nguak.

⁶ Ilaxle Nun sasün Jihusua hia Jefuneh sasün Kaleb hokhie mongtsik laxle ma nyi-za akyet

⁷ ilaxle khünaknu ang thüi: “Kwome hule toxkya haxtok a tüle müikya haxtok changle.

⁸ Kem füi Jowanpa mongzom müikya jangtüi, chixe kem ikhato apüiüi ilaxle ija tüle ahak-aluale tüikya tamchu haxzaoe awangle tüikya haxtok kem ang kox angkya changle.

⁹ Jowanpa to kaxthup-ngaotünle taxchang-ngo tamchu ikhato tüikya khünakbu thua kem za-ngo angkya oli münchang. Keme ochwonpai ma hwom to lüt ang thoüi. Jowanpa kem füi tüile ilaxle hwom kho-awale ngokya baozangbu to chixe wüi anao angkya changle, idaile ojao taxza.”

¹⁰ Khünaknue hokhi to long füi thuple langüile azale ngopongkhae allele Nyihom kho ma zangchang ningle tüle ajeple Jowanpa nguikya hwome ngünle lax.

Mosa-e Khünaknu Hanpakma Zangjop

¹¹ Jowanpae Mosa ang thüi: “Khünak ibue chemtukux ku chilaxle awüt angkya? Kue hwom tu ma ibibile ohünotün mwotbu mokle aho, ikoxngaxchu hwome ku to mongong chitüile chemtukux ngole hom angkya?

¹² Kue hwom hato kaknu-laknu le ang tomüi ilaxle hwom zi ang tomüi, ikoxlechu kue nang a ibu füi süluikya tamchu tsak-zongle tüikyabu hopa ang achangüi!”

¹³ Ikoxle Mosa-e Jowanpa ang thüi: “Ibibi khünaknu nang nangtsak-nangzong makhange Ijip nok tokya alaile apüipu; ikoxle chemtue nange ibu nang khünaknu to ile hwonkya Ijip nokbue atat ang kopüihex,

¹⁴ hwome ija Kanan haxtok ma ngole tüikyabu hato wünle apuküi. Ibu khünake kaiwüi nang kwom füi womle tüikya tamchu nang zangfwom kwom khangkho ma zakle changpongma tsaothale nang ngün ang kopkya tamchu nang kwom thothoma anyixningle thong lailaikya zangfwom ma ilaxle ajaning a wün lailaikya zangfwom ma kwom khangkho ma ahamkya ozing noke wüi atatle hüidaoa.

¹⁵ Ikoxle athax nange nang khünaknu mik amütle jangchang, nang zangzing atatle hüidaokya ting-nokbue,

¹⁶ nange nang khünaknu ang faüihex-ole tsaokya haxtok to apüi ang chitho koxle ibu a faokha to langle awütpule wünüi.

¹⁷ Idaile, O Jowanpa, athaxpi nange kwom nang thomkya kaxtsao mokle ahoüi,

¹⁸ ‘Ku a Jowanpa, chwonle mongtsik-mongmakya mix münchang, kue mongkün hia mongong ahopu tamchu ku zongto ochax lyenkya hia chichang-chizangle tüikyabu thaikya alakpu. Ikoxle chutix hwom pupa hwom ochax khoma, hwom su-sabu to sutai-sulai alople kue sikngün chifa homtoxle münngo’ le akax pongkya nangtsak-nangzong ngaile ahohüi.

¹⁹ Ilaxle athax, O Jowanpa, otuechu chijekya chongkya nang mongkün tüikya füi, Ijip nok danle toxkya makhange kwom thaikya pangwüi alakle hüidaokya ningle athaxchu khünakbu thaikya ochax thailakkya tüifale kue nang to jop-topu.”

²⁰ Jowanpae lan: “Nange jukya lailaile kue ibu khünaknu thaikya kue alakpu.

²¹ Ikoxlechu kue tsaotsütpu, ku ozün ma ngokya kople tamchu kutsak-kuzonge chaxwannu to ule ngokya kople,

²² hwomkha angkya ija Kanan haxtok to nop ang ozün ma owachu münnui. Hwome ku tsak-zong zangchangjep ngünle changdaoa ilaxle Ijip nok to tamchu ija faokha to kue mokkya ohünotün mwot hwome ngün ang kopdaoa; ikoxlechu kue adule hüikya to chatchatnaole thwontsing ilaxlechu ku kax ma münlaxpule angampu.

²³ Hwom pupa hwom ang koxüihex-ole tsaokya haxtok to hwom tütue chu ngui ang müntho angkya changle. Ku pongle chikopkya mix owachu ikhato ngui ang müntho.

²⁴ Ikoxlechu ku dapa Kaleb ma tutex omüi tüi tamchu ku kax ma laxle ngokya khoma, chixe nguile hutoxdaokya haxtok to kue chix ngui ang tomüi, ilaxle chixsu chixsa hwome.

²⁵ Amalek nok hia Kanan nok ngole tüikya haxtok kopüi. Ngainyix anongle chatlax ilaxle tütsak Tinu angkya Agaba haxkuashuk chikao makhange faonu mong afünle lelax.”

Kaxthup-ngaotünle Changkya Khoma Jowanpa e Khünaknu to Sikangün

²⁶ Jowanpae Mosa hia Arun nyi füi akax,

²⁷ “Ibu ochax khünakbue chemtukux ku to kaxthup-ngaotünle ngo angkya? Ibu kaxthup-ngaotün to kue apa zazale hüidaoa!

²⁸ Athaxpi hwom ang ija kaxlan fakox: ‘Kue tsaopu, ku ozün ma ngokya kople, kue hünzom to, hünzome jukya lailaile moküi. Jowanpa, kue ija akaxdaoa.

²⁹ Hünzom a ziüi ilaxle hünzom mang a ija faonu awangle chiaküi, chemthüikoxle hünzome ku to kaxthup-ngaotünle changdaoa. Hünzom zangtsa makhange thakchichi owachu Kanan haxtok alople ngui ang münthopu.

³⁰ Kue hünzom ang ikhato ngo ang kop angkya hex-ole tsaodaopu, ile changdaobachu Jihusua hia Kaleb nyi boma hünzom owachu ikha alop ang münthoüi.

³¹ Hünzome thüipu, hünzom su-sabu zan-noke kopüi le; ikoxlechu hünzome münlaxpule awütkya haxtok to kue hwom ngui ang tomüi, ilaxle ija a hwom tingtok ang changle ngoüi.

³² Hünzom a ija faokha to zile samüi.

³³ Hünzom su-sabu a faokha to zanglao punyi samle aham ngoüi, hünzom khama akiale tsünlo ngokya mix mazi-mazile hwom hanpak ang ija a hünzome ku to chiongkya khoma sikngün apongkya ang changüi.

³⁴ Hünzom ochax khoma hünzom a zanglao punyi sikngün angkya changle, hünzome Kanan haxtok zyet ang nyix punyi ahom daokya thatha, zanglao tuita nyixpong hanpak ang changüi. Izuma, hünzom zongto ku mongtsik tüikya ija chang koxngünale hünzome awanle lax ang kopüi!

³⁵ Ku zongto chichang-chizangle tüi angkya hanpakma asoxkya khünakbu to kue ile hwon angkya tsaosaxpu, hünzom a pangwüi ija faokha to ziüi. Jowanpa, kue ija kax akaxdaoa.’”

^36-37 Mosa-e ija haxtok zyet ang tsanle apaokyabue othai kaxwün wangkya khoma khünaknue Jowanpa to kaxthup-ngaotünle chang. Ikhoma Jowanpae hwom to okak-olak makhange chakmok, ilaxle hwom a zile sam.

³⁸ Zyetmixbu 12 khama Jihusua hia Kaleb nyi tata azang.

Kanan Haxtok Kop ang Pongwang Zansing

³⁹ Chemtue Mosa-e Jowanpae akaxkya kax Israel khünaknu hama ngaile changpuix, hwom ang tüle mongsik-ngünle sop.

⁴⁰ “Athaxpi Jowanpae kwom füi akax daokya chaxwan to pao ang kwom achwonle tüile. Kwome ochax lyenle thaidaoale ngaipu”, le thüi üntoxle ofüinop swomsae wüi hwome haxhua to tüikya nok tingtak ang ka.

⁴¹ Ikoxlechu Mosa-e thüi: “Jangchang thüiningle athax chuwüi hünzome Jowanpa kax ma büthüikoxle chilax? Hünzome münlütüi!

⁴² Taxka, Jowanpa a hünzom füi müntüi ilaxle hünzom to zan-noke wüi lütüi.

⁴³ Chemtue hünzome Amalek hia Kanan nok füi apongle changüihex, hünzom a zantam ma ziüi; Jowanpa a hünzom füi chitüiüi, chemthüikoxle hünzome chix man müntopule angam daokoxle.”

⁴⁴ Jowanpa Tsaotsüt Suak hia Mosa hokhi tuituita ngaxchu pom angkya chiachex, ikoxlechu hwom a haxhua nok tingtak ang ka angkya wüile tüle mongchong.

⁴⁵ Ikoxle ikhato tüikya Amalek hia Kanan noke hwom to sing ilaxle hwom to anao, ilaxle Horamah alople jao ibue hwom achuale zik.