HUAKE LAIPEX 13 - OTSAO BAIBEL (BSI)

Zyetmixbu

¹ Jowanpae Mosa ang thüi:

² “Homjen foto Israel nok lompabu tuipong zünlax ilaxle kue hwom ang koxle ngokya Kanan haxtok opaktik angkya hanpakma zyetle hu ang hwom tsanle apaokox.”

^3-15 Mosa-e ija kax ma lax üntoxle Paran faonu mong tokhange lompabu ija ningle tsanle apao: Homjen Lompa Reuben Zakur sasün Shamua Simeon Hori sasün Shafat Judah Jefuneh sasün Kaleb Isakar Jusep sasün Igal Efraim Nun sasün Hoshea Benjamin Rafu sasün Palti Zebulun Sodi sasün Gadiel Manasseh Susi sasün Gadi Dan Gemalli sasün Amiel Ashar Mikail sasün Sethur Neptali Wofsi sasün Nahbi Gad Machi sasün Geuel

Homjen Lompa

¹⁶ Ibu a Kanan haxtok opaktik angkya hanpakma Mosa-e tsanle apaokya zyetmixbu changle. Chixe Nun sasün Hoshea ang mün Jihusua le alüixle kox.

¹⁷ Chemtue Mosa-e hwom tsanle apaopuix, chixe hwom füi ija akax: “Imakhange shuakuxchi ma dongle Kanan haxtok shuathong chikao ma noplax ifüima haxhua nok to paolax.

¹⁸ Ija chemningkya chaxwan-longkho hex, ikhato khünak chemtukux ngotüipuix, ilaxle hwom chemtukux tsak-zong tüipuix, ibu awan koplax.

¹⁹ Haxtok chimüi hia müi ilaxle ikhato tüikya onok a pan chitüikya tingnubu hia pan zailaxle ziakople tüikya tingnubu chemtukuxle tüipuix tsinglax.

²⁰ Haxtok ma haxzao chitüitüi tamchu pünzuabu nyemle chitüiüi, ibu tsingle koplax. Ilaxle ikha tokya pünziak tütali thüichu apüi angkya taxalak.” (Ija a grep jum apüi angkya ang thüikya changkya.)

²¹ Idaile ibu khünakbu shuakux chito donglaxle shuakuxchi angkya Hamath Pongkhyet zui makhange Rehob alop angkya lomjang fole Zin faonu angkya sak-hax haxtok pangwüi to hule wan.

²² Pongwang ma hwom a shuathongchi haxsüt to ngui, ifüima Hebron to ngui, ilaxle ikhato Anakim sasün Ahiman, Shehai hia Talman hwom tüikya. (Hebron a Ijip nok tokya Zoün füi zanglao anüt thoto zingle tüikya.)

²³ Ifüima hwom Eshkol haxsha to ngui, ilaxle ikhatokya grep ziak otswon ma khai üntoxle ija dang zwotlaxle mixsün anyie azyale apüi; anaolechu hwome pomegrenet hia fupsa ziak hidaole apüi. (

²⁴ Ija haxmik ang Eshkol le amün, chemthüikoxle Israel noke grep otswon ma ikhama khai.)

²⁵ Nyix punyi füima, chaxwan to hu ang paokya zyetmixbu chatlaxle

²⁶ Mosa, Arun tamchu Paran faonu mong tokya Kadesh ma tüikya Israel khünaknu hato chat. Hwome ma mik füi ngünle toxkyabu kaxwün wang tamchu hwome apüikya pünziakbu hwom hato aho.

²⁷ Hwome Mosa ang thüi: “Kwome haxtok to hule anopu, tüle ahak-aluale tamchu haxzaoe awangle tüile; ilaxle ija a ikhatokya pünziak apüikya changpu.

²⁸ Ikoxlechu ikhato tüikya khünakbu a tüle mixtsak-naomüibu changa, hwom tingnubu chu tüle chongle tüile ilaxle shingmongle pan zailaxle ziakople tüile. Tamtai lechu kwome tomchong-hualole tüikya likanbu ikhato ngünle toxle.

²⁹ Shuathongchi kaoma Anakimbu ngole; ikoxle Hit, Jebu hia Amor nokbu a haxhuachi ma tüile; ilaxle Mediterenian tinu chikao ma Jordan shuanu ajole Kanan nok tüile.”

³⁰ Mosa to juale ngokyabu to Kaleb-e sale adang ilaxle akax: “Athaxpi single donglaxle keme ija haxtok kop angkya wüi changle; hwom to lüt-tang kemchu tsak-zongle tüile.”

³¹ Ikoxlechu Kaleb füi tomle zyet ang paokya khünakbue thüi: “Münchang, kem a hwom to lüt-tang tsak-zongkya münchang, ikhatokya khünakbu a kem füi huanuma tsak-zongle tüile.”

³² Ile hwome zyetle toxdaokya haxtok bama Israel khünaknu hato othai kaxwün wang. Hwome thüi: “Haxtoke ikhato ngole tüikyabu ang ngaxchu okhonguile oziak-opua münfatsuak. Kwome angün-ngün pangwüi mixtsak-naomüimüi wüi changle,

³³ ilaxle kwome ikhato tomchong-hualole tüikyabu ngaxchu ngün ang kople, ibu a Anakim su-sa hwom changle. Hwom tuto kwom a kuksa-luksa pong ang achangle hixle paole, ilaxle kwome hwom to ibukuxle hu angkya wüi ang changle.”