HUAKE LAIPEX 1 - OTSAO BAIBEL (BSI)

Israel Nok Pongwang lükya Khünak Huak Akiakkya

¹ Israel khünaknue Ijip nok dantox füima anyi lükya zanglao ma lyetnu kua anyi to pongwang nyixkha, Sinai faonu mongto chix ngokya Nyihom ma Mosa füi Jowanpa akax. Chixe thüi:

² “Nang üntoxle Arun hünkhie Israel khünaknu züjen-züjen hia saxthom-saxthom ma khünak huak akiak angkya changle. Lüka sühuak pangwüi,

³ zangtsa makhange thakchichi opangsa süpahi ang chang ang asule tüipuix, pangwüi mün zalax.

⁴ Nang to fong ang homjen foto lompabu füi akaxlax.”

^5-16 Ibu a homjen ang lompabu, khünaknu nuazing angkya hanpakma noknu tu angkya zünle kopkya khünakbu changpu: Züjen Saxthom lompa Reuben Elizur a Shedeur sasün Simeon Shelumiel a Zurishaddai sasün Judah Nahshon a Aminadab sasün Isakar Nathanel a Zuar sasün Zebulun Eliab a Helon sasün Efraim Elishama a Amihud sasün Manasseh Gamaliel a Pedahzur sasün Benjamin Abidan a Gideon sasün Dan Ahiezar a Amishadai sasün Ashar Pagiel a Okran sasün Gad Eliasaf a Deuel sasün Neptali Ahira a Enan sasün

Züjen Saxthom lompa

¹⁷ Ibibi mixsün bün-anyie fonglaxle Mosa hia Arun nyie

¹⁸ lyetnukua anyi lükya owang nyix khünaknu pangwüi sele asox ilaxle homjen-homjen hia saxthom-saxthom ma süile münzale kop. Ile zangtsa makhange thakchichi lüka sühuak mün zale akiak.

¹⁹ Ija aJowanpa kaxtom ningle mok. Sinai haxnu ma Mosa-e khünaknu mün zale kop.

^20-46 Lüka sühuak zangtsa makhange thakchichi, zankat sangle changdaokyabu, homjen-homjen hia saxthom-saxthom ma mün zale kop. Jakop sasün tüichongpa Reuben makhange owang wanglaxle zale kop. Athüt koxle pangnu ibibile chang: Jat-li Huake Reuben 46,500 Simeon 59,300 Gad 45,650 Judah 74,600 Isakar 54,400 Zebulun 57,400 Efraim 40,500 Manasseh 32,200 Benjamin 35,400 Dan 62,700 Ashar 41,500 Neptali 53,400 Athüt koxle: 603,550

Jat-li Huake

⁴⁷ Liwi hwom a mama homjenbu ningle mün chiza,

⁴⁸ chemthüikoxle Jowanpae Mosa füi akaxle thüi:

⁴⁹ “Chemtue nange zankat sangdaokya khünakbu akiakle changüihex, Liwi homjen a ima taxwom.

⁵⁰ Liwi hwom a ku ngwotnui Nyihom hia ima tüikya mwot-kat to humele chang ang tomkox. Nyihom tamchu ima tüikya tuinabu hwome kople aham angkya changle. Ikhama hwome ku thothale changüi ilaxle ija akhople hwome thongnui ang pombu zaile changüi.

⁵¹ Chemtue hünzome hünzom ngwotnui achexle changüihex, Liwi hwome tix ija Nyihom ajoüi ilaxle thongnui hozün alopkya zuma hwome ija chatle ajongüi. Nyihom hato owawa soxle jangchang thüiningle chix a mik max ang tomüi.

⁵² Israel khünak mamabue, mathom-mathom to, pangwüi ma saxthomthom lomle, ma nyiluakluak fang ma, ma thongnuinui zingle changüi.

⁵³ Ikoxle, owawa ija Nyihom hato soxkya khoma Israel khünak onok füi ku mongtsik chakjukya chitüi angkya hanpakma ija ziakop ang Nyihom akhople Liwi hwome hwom pombu zaiüi.”

⁵⁴ Idaile Jowanpae Mosa ang fakya kaxtom pangwüi kax ma laxle Israel khünakbue mok.