HOSIA 9 - OTSAO BAIBEL (BSI)

Hosia-e Israel Khünaknu hanpakma Sikngün Apong angkya Kax Ngai

¹ Israel khünaknu, songsaribu ningle hünzome pangpwon saxle ngokya zakün. Hünzome a hünzom Zang hato tok ahodaoa ilaxle chix to mongong chitüile hünzom ngole hüile. Chaxwan faole hünzome tsangtsa hangkya khünakbu ningle ma alüile Bal baozang ang hangdaoa ilaxle chixe hünzom ang omün ang koxpule thütkya saxziak to mongkünle changdaoa!

² Ikoxlechu lebama wüi hünzom ang sax hia olip münga okhonguile chitüile changdaoüi, ilaxle grepti-ju chu chitüile changdaoüi.

³ Israel khünaknu a Jowanpa haxtok ma münngoüi, ikoxle Ijip nok to chatle chat angkya hüiüi ilaxle taxsax lükya süt Asiria nok to sax angkya hüiüi.

⁴ Ibu mixnok chaxwan to hwome Jowanpa ang grepti-ju tö kox ang chithoüi chichangba chix hato hwom töbu apüile zokle ashun ang chithoüi. Hwom saxpupu pangwüi ija süte hwom chitsaokya ang achangüi, ija a mangtsa süt tuita ningle changüi. Ija a hwom woknuak amüi angkya hanpak zaza ma twonüi; ikha angkya tuita chu Jowanpa Zangshwom-Hom to tö tuita ningle münapüi.

⁵ Ilaxle Jowanpa achuakle Pangpwon sax angkya tunu ngui ningle, izuma hwome chem moküi?

⁶ Chemtue thama hüipuix ilaxle khünaknu afale paopuix, Ijip noke hwom ta ma asoxüi: ija a Memfi ma mang akhün angkya hanpakma changüi! Hwom tuina khopjanbu hia noxta hwom hom-hax zailaxle tüikya haxtokbu ma hingzang hia hux nyemle tüiüi.

⁷ Sikngün apong angkya hanpak nguidaoa, khünaknue hwome chem mokdaopuix ija otha kop angkya hanpak a. Chemtue ija changüihex, Israel-e ija awanüi! Hünzom thüile: “Ija ajepa a ongat. Ija mix mong azwotkya mix a ongat.” Hünzom ochax chongle tüikya khoma hünzom khünaknue ku to huanuma miktsakle.

⁸ Chix khünaknu Israel ang kaxkhün kox angkya hanpakma Zang-e ku ajepa tuita ningle ahüipu. Ikoxlechu ku apaopao khato, hünzome ku osa amanpupule aman ang azong. Jowanpa Zangshwom-Hom ma ngaxchu khünaknu a ajepa zongto zanpabu ang chang.

⁹ Hwome mokkya ochax ma hwom a laxli chitüile chichang-chizangle Gibeah ma mokdaokya ningle chang. Zang-e hwom ochaxbu texle ataküi ilaxle ija khoma hwom to sikangünüi.

Israel Ochax hia Ija Khülüix

¹⁰ Jowanpae thüi: “Chemtue kue pongwang ma Israel atakkya hex, ija a sak-hax to nyemle ngokya tuita grep zu ningle changkya. Chemtue kue hünzom putong hwom owangole ngünpuix, ija a jumtukhae pongwang ma jumkya fupsa jum lailaile tüikya. Ikoxlechu chemtue hwom Peor Haxnu to nguipuix, hwome Bal to shwom ang süt ilaxle lebama wüi hwome mongkünkya baozang Bal lailaile hwom ku dyenkyabu ang achang.

¹¹ Israel zaxzangkya a osa ningle pile paoüi, ilaxle hwom ang chatle su-sa hwom pux-paikya müntüiüi, shekobu ma nao awok le münchangüi, süshix-naosom nguidongkya müntüiüi.

¹² Hwome naosom tux-tsomle changbachu, ibu kue paoüi, tuita chu ozün ma müntoxüi. Chemtue kue ibu khünakbu chilaxle dantoxüihex, tüle khompua-atsikkya mwot hwom ma laiüi.”

¹³ Jowanpa, hwom naosom lang-huak ang achuakya ilaxle langkya kue ngüntsuak ang chami?

¹⁴ Kue nang ang khünak ibu to chem mok-hüile thüiüi? Hwom shekobu aling ang tomkox! Hwome ma naosombu to apu-achang ang chithole achang kox!

Israel to Jowanpa Kaxfün

¹⁵ Jowanpae thüi: “Hwom ochax mwot pangwüi Gilgal ma owang wangle. Kue hwom to miktsak owang wangkya ikhama changpu. Ilaxle hwome mokdaokya ochax mwot khoma, ija haxtok angkya kue hwom jwonle apaoüi. Kue athax otuechu hwom to mongkünle münchang; hwom lompabu pangwüi ku zongto zan ang achangdaoa.

¹⁶ Israel khünaknu a tuita otsing zanle zidaokya pünnu, ojao oziak chiziak puix, ija pün ningle changpu. Hwome su-sabu müntüiüi; hwom ma tüilale changkoxchu, hwome huanuma akhüixle tüikya naosom kue langüi.”

Ajepa-e Israel bama Zangwün

¹⁷ Zag, kue owa thothale tüipuix, chixe ma khünaknu chilaxle awütüi, chemthüikoxle hwome ku kax to münapa. Hwom a mixjat-mixlibu khato samle aham ngokyabu ang achangüi.