HOSIA 8 - OTSAO BAIBEL (BSI)

Chapa to Shwomkya Khoma Jowanpa e Israel Khünak Ajao

¹ Jowanpae thüi: “Tinglyet kox! Ola jukya ningle zan-nokbu ku haxtok to jule ngole! Ku khünakbue hwom füi tsaokya ku tsaotsüt amadaoa ilaxle ku hwon-nwot zongto zan ang changdaoa.

² Hwome ku ang hwom Zangle nyakkoxchu ilaxle hwom a ku khünaknu changpule wünkoxchu tamchu hwome ku tsingle le thüikoxchu,

³ chem müipuix ija hwome awütdaoa. Ija khokho ma hwom zanpabue hwom to achua angkya changle.

⁴ “Ku khünaknue wanghombu kamle, ikoxle ija hwome hwom mongtextex ma mokle. Hwome lompabu zünle, ikoxlechu ku ma chitik toxle mokle. Hwome hwom ma tüikya khop-jan hia hun, ibu füi chapabu zingle: ija a hwom mik max angkya hanpakma changpu.

⁵ Samaria tingnu angkya khünaknue shwomkya hun füi zingkya maihupong thua ku anule. Ku ang hwom füi mong huanuma tsikle. Hwome ija chapa obi nyix füima dantoxüi?

⁶ Israel zingpabue chapa zingle, ilaxle ija a baozang ngaxchu chichang! Samaria nok ma shwomle ngokya hun maihupong a thuple ashixle ofun ang achang angkya changle!

⁷ Chemtue hwome zangwin saipuix, hwom ang zangchei puamün ang kop angkya changle! Sax chiziakkya haxtoke chemtuechu khünak süt münalaifa. Ijae alaile namfabachu, mixnokbue saxdao angkya changpu.

⁸ Israel chuwüi mixjat-mixli lailaile changdaoa ilaxle ija a ashixdaokya tikkux tuita ningle laxli chitüile changdaoa.

⁹ Fao mantsak ningle kax jaojao ma chilaxle, Israel khünaknu a malomlom to paodaoa. Hwom to asun angkya mix lomle Asiria nok to kale ilaxle hwom kho awa angkya hanpakma mixjat-mixlibu ang tha koxle.

¹⁰ Ikoxlechu athax kue asox ang tomlaxle hwom to sikangün angkya changle. Asiria noke hwom to zothuple changkya zuma lebama wüi hwom a mongto tsütle kakle chang angkya changpu.

¹¹ “Ochax apao angkya hanpakma Israel noke tö-tsap chemtukuxle zingpuix, itukuxle hwome ochax lyen angkya onui ataküi!

¹² Hwom hanpakma kue e-ang chithole anwot-anokya kaxbu zale toxpu, ikoxle hwome ibu otuechu chingünkya oli tamchu mixnok wünpa ningle chilaxle awüt.

¹³ Hwome ku ang töbu koxle ilaxle ikha angkya omüi saxle. Ikoxle, Jowanpa, ku ang hwom füi mong münmüi. Athaxpi kue hwom ochax texle ataküi ilaxle ija khoma hwom ang sikngün faüi; kue hwom Ijip nok to chat ang tomüi!

¹⁴ “Israel khünakbue chongwang homlobu zingle, ikoxle hwome hwom zingpupa alakle asamdaoa. Judah angkya khünaknue ziakop laxle tingtan-nokzingle. Ikoxlechu kue hwom chongwang homlobu hia hwom tingnubu zokle ashun ang wün ahüiüi.”