HOSIA 6 - OTSAO BAIBEL (BSI)

Mongkoxle Chichang homtoxle Khünaknu Künlop-monglüi

¹ Khünaknue thüi: “Athaxpi Jowanpa hato chat-hax! Chixe kem to mak-koxdaoa, ikoxlechu chixe tütakoxlechu kem kak amüile fa angkya changle; chixe kem to mak-khapu, chixe wüi kem mak to lople fa angkya changpu!

² Nyixnyi-zom bama wüi chixe kem künlop-monglüi ang tomüi, ilaxle kem chix füi ngoüi.

³ Kemepi Jowanpa tikle lax ang azong hax. Tütakoxchu zangngaile hüikya ningle, ojao chithaile chaxwan tok to tsosa zangwat dütkya ningle, chix a kem hato hüiüi jaojao.”

⁴ Ikoxlechu Jowanpae thüi: “Israel hia Judah, kue hünzom füi chem moküi? Hünzome ku to mongkünkya swomsa fwomtyen lebama paole samkya ningle; ija a swomsae wüi zuale paokya nyenti ningle.

⁵ Ikhoma kue ku ajebu, kue kaxfün fa angkya hia thama ahüi angkya kaxho füi hünzom hato ahüipu. Hünzom angkya kue laxse tsukya a tangtho üntoxle tsaothale:

⁶ Kue hünzom ma chizakkya mongkün lompu, müi langlaxle tö koxkyabu münchang. Ku khünakbue, zokle ashunle tö koxle ngokya füi ku wüi tsingle namlaxbae le texpu.

⁷ “Ikoxlechu hwom Adam ma, ija haxtok to nguikya füi tomle hwome ku füi zingle thomkya tsaotsüt ama.

⁸ Gilid a chichang-chizangkya hia mix lang mix mixhuakkle changkya khünakbue awangle tüikya tingnu tuita.

⁹ Nguapabu a owawa lom tanle azwon ngokya ahuxmixbu othom ningle. Otsao nui Sekem to nguikya lomnu ma ngaxchu hwome mix lang. Ilaxle hwome ibu ochax mwotbu chaktung-chaktungle mok!

¹⁰ Israel ma kue khompua-atsikkya oli tuita ngündaoa: ku khünakbue chapabu to shwomkya makhange hwom alüile ochax ang achangdaoa.

¹¹ “Judah angkya khünaknu, hünzom hanpakma, hünzome mokle ngokya khoma hünzom sikangün angkya bama kue lyettex-hantyale thomle.