HOSIA 3 - OTSAO BAIBEL (BSI)

Hosia hia Mongong Chitüikya Mixcha

¹ Jowanpae ku ang thüi: “Tamchatle paokox ilaxle ma mongkün hwom füi chinunchakkaile ngokya mixcha hato nang mongkün ahokox. Hwome mama baozangbu hato mong alople pao ilaxle grep zanbu töbu chapabu ang koxle chang koxle ngaxchu kue chizakle Israel nok to chemle mongkünpuix ija ningle nange she to mongkün angkya changpu.”

² Ikhoma kue she shak ang khop-jan ngunkhix bün aga ilaxle tsaxsa tula tsax khong anütle kox.

³ She-e ku thatanle okuilole tsangtsa hangkya hia chinunchakkai mixcha ang chiachang homtoxle ngose pa changhupu le kue she füi akaxpu; ilaxle ile changkya tuk ma kue she thatanle nuipu.

⁴ Ija jaojaole Israel khünaknu a, wanghom hia lompabu chilax homtoxle, tö koxkya hia otsao long küikya chitüi homtoxle, chichangba o-nan to hu ang twonkya chapabu chichangba chasabu chilax homtoxle ngole hüi.

⁵ Ikoxlechu Israel khünaknu hanpakma hwom Zang, Jowanpa hato chat angkya tamchu wanghompa Dawid su-sa hwom hato chat angkya hanpak tuita hüiüi. Ifüima hwome Jowanpa chathua zale changüi ilaxle chix angkya müikya hinghobu pongle laxüi.