HOSIA 14 - OTSAO BAIBEL (BSI)

Hosia-e Israel Nok Joxshom

¹ Hünzom Israel khünaknu, Jowanpa hünzom Zang hato chat-hüi. Hünzome ochaxe hünzom asua ang tamchu ati ang tomle.

² Jowanpa hato chat-hüi, ilaxle ija zangjop a chix hato apüile koxkya tö ang achang kox: “Kwom ochaxbu thailak tüihüi ilaxle kwom zangjop pongle kop-hüi, ilaxle kwome tsaosax daokya ningle kwome nang achuaküi.

³ Asiria-e kwom otuechu sün ang müntsuak ilaxle zankat manbue kwom kho awa ang müntho. Kwome kwom chapabu füi ibu a kwom Zang changle le chatle münthüi. O Jowanpa, owa hato pao angkyachu chitüile ngokyabu to nange chingcha ahohüi.”

Israel Nok Tsün Hozün bama Jowanpa e tsao

⁴ Jowanpae thüi: “Kue ku khünaknu tamchatle ku hato apüiüi. Kue hwom to mong makhange zongbakle mongkünüi; athax ku ang hwom füi mongtsikkya müntüiüi.

⁵ Israel khünaknu zongto ku a haxzan zongto zangwat ningle changüi. Hwom a maipuabu füi tomle puaüi; Hwom a tsingju-kamong le changüi Lebanon angkya pünnubu lailaile.

⁶ Hwom a tsünzün ma tsongle ngoüi, ilaxle olip pünbu ningle osün müile ngoüi. Hwom a ongan müile changüi Lebanon angkya sedar pünbu ningle a.

⁷ Hwom tamchatle ku khosün fang ma kuimüi-zangmale ngoüi. Hwome saxziak thomo-manzaiüi ilaxle grep haxtok lailaile ziak-puale tüiüi. Hwome a Lebanon angkya grep ningle zaxzangle changüi.

⁸ Israel khünaknue chapabu füi chem mwot müntüiüi; Hwom zangjop to kue lanüi ilaxle hwom nua kue zingüi. Jento omua müile ngokya pünnu tuita ningle kue hwom ang ngwotnui koxüi; Hwom mohiman pangnu otong a ku tix changpu.”

Kaxshuk

⁹ Ikhama chem zale tüipuix, jetüi-hwonlangkyabue tsingle naxlaxkox, ilaxle hwome ija mong ma pongle naxkopkox. Jowanpa lomtang a otsing lomtang, ilaxle otsao khünakbu a ija lomtang ma ahamle ozün ma ngoüi, ikoxle hwome ija thajaole tüikya khoma ochax khünakbu a ija ma asuaüi ilaxle atiüi.