HOSIA 13 - OTSAO BAIBEL (BSI)

Israel Nok to Akiakya Kaxfün

¹ Thochi ma, chemtue Efraim e zangwünle changpuix, ipongma mama Israel homjenbu a tüle za; hwome Efraim to angakle hu. Ikoxlechu khünaknue Bal to shwomlaxle ochax lyen, ilaxle ija khoma hwom a ziüi.

² Hwome khop-jan füi, shwom angkya hanpakma, khünak mong ma ajang laxle, khünak chak füi chapabu zingle, chizakle hwome ochax lyen ngole. Ifüima hwome akaxle: “Ibu ang tö apüile laxkox!” Maihupong ningle zinglaxle tüikya chapa ibu to noknusae tun chemle apongüidai!

³ Ikhoma ibu khünaknu a anopningkya zangfwom ningle lebama wüi maxle samüi, swomsa ma wüi zuale samkya nyenti ningle a. Hwom a tsaxnak nui tokya tsaxsa zangwin to jeple paokyabu ningle changüi, fongbak angkya wünkhut samle paokya ninglea.

⁴ Jowanpae thüi: “Ku a Jowanpa, hünzom Zang changpu. Ijip nok tokya hünzom zunle apüikya ku changpu. Hünzom ang ku boboma mama Zang tammüntüi. Hünzom khosünpa a ku tix changpu.

⁵ Sak-hax haxkozan to kue hünzom to humele hüipu.

⁶ Ikoxle müikya haxtok to nguikya füi tomle, hünzom awangle tamchu okhonguile ngokyabu ang achang, ilaxle hünzom mongngam ma tsong ilaxle ku alakle asam.

⁷ Ikhoma mailangpae shingpupule kue hünzom to shingüi. Chaxtsak lailaile kue hünzom lyetlom ma tanle nuiüi.

⁸ Hosabu asam daokya chepnu tuitae shingpupule kue hünzom to shingüi, ilaxle kue hünzom fexle chaoüi. Mailangpae saxkya ningle kue hünzom onui ma wüi saxle awütüi. Kue faomüibue ashikle akhix kya ningle kue hünzom ashikle akhixüi.

⁹ “Kue hünzom amütüi, hünzom Israel khünaknu! Ile chang füima hünzom to owae asunthoüi?

¹⁰ Hünzome wanghom tuita tamchu lompabu jule, ikoxle ija jat-li hwome chemle sünthoüi?

¹¹ Kue hünzom ang wanghombu ku mongtsik füi koxpu, ilaxle ku küntsik-mongma füi kue hwom tswonle paopu.

¹² “Israel nok ochax hia thaikyabu zale thomle, ilaxle zale thomkyabu a samle chipao angkya khato sünle thomle.

¹³ Israel nok ang ozün ma ngo angkya olom tüile, ikoxle lax angkya a ongat jaojao changpu: ija a, athax zangngai ngünle laiüi khakha naosae honu wokkha angkya münlaipu le angamkya ningle changpu.

¹⁴ Amalum pan chak tokya kue ibu khünaknu kho münsün chichangba zikmüt-mangkho chak tokya hwom münazün. Apüihüi hünzom kaklakbue, zikmüt-mangkho a! Apüihüi hünzom thamae, amalumting a! Athax kue ibu khünaknu to chingchajajale münchang.

¹⁵ Israel khünakbu a hingzangbu lailaile tüle zaxzangle tüikoxchu, Kue sak-hax tokhange zangwin okham ahüiüi, ilaxle ibue hwom tümik hia tüküibu azopüi. Thanu-juapa pangwüi ijae tsui paoüi.

¹⁶ Ku zan to kale changkya khoma Samaria to sikangünüi. She khünaknu a zan ma amütüi; naosa odombu a haxma asex toxüi, ilaxle naowokbu a chaole alaiüi.”