HOSIA 12 - OTSAO BAIBEL (BSI)

¹ Israel khünaknue swomsa makhange zangnak kople chempangsa mokpuix pangwüi chilaxlili tamchu thama adün angkya oli changle. Mongong alekya hia changnong-pünthom mwot hwom khama sisi tsale hüi. Hwome Asiria nok füi muamüi zangwün tsuak ilaxle Ijip nok füi thalexle.”

² Jowanpae Judah angkya khünaknu zongtochu tsaitox-kaxfe angkya tüile; hwom khünaknue mokkya mwot khoma chixe Israel tochu sikangün angkya changle. Hwome chem mokdaopuix ija olüix hwom to khom angkya changle.

³ Okhi honu wok-kha to ngotanto wüi Jakop a chix tüizyep Esau füi ashing; chemtue chix mixmüi ang achangle tsongpuix, chix Zang füi ashing:

⁴ chixe kaxtaimix füi ashing ilaxle chixe wüi anao. Chix sop ilaxle mohiman ju. Bethel ma Zang kem putong Jakop hato ngui ilaxle chix füi zangwün.

⁵ Ija a Khüthak Jowanpa changkya:Jowanpa a mün, oja mün ma chix to shwom angkya hex.

⁶ Idaile athax, Jakop su-sa hwom, Zang to mongong tüilax ilaxle chix hato chatlax. Mongkoxle chix thothalax ilaxle sukya kaxfün ma ngolax, ilaxle hünzom Zang-e mok angkya to adule tanlax.

Kaxfün bama Zangwün Thuithuile

⁷ Jowanpae thüi: “Israel khünaknu a Kanan nok füi tomwüi chisu-chitangle tüile; hwome hwom kux shak-sünkya mix to tuak-thüt ma dyenkya mongzom müile.

⁸ Hwome thüile: ‘Kwom a tüinangle tüile. Kwome ma osho-jowan zingdaoa. Chichangkya lom tokhange ahak-aluakya changpule kwom to owae tsaitox-kaxfele chang ang müntsuak.’

⁹ Ikoxlechu Jowanpa, ku owae hünzom Ijip nok tokya alaile apüipuix, kue hünzom ami sak-hax to ngotox daokya ningle tamchatle nyihom to ngo ang tomüi.

¹⁰ “Kue ajebu füi zangwün ilaxle kue hwom ang mikngün-ohünbu huanuma fa, ilaxle ajebu makhange kue ku khünaknu ang kaxkhünbu kox.

¹¹ Ikoxlechu Gilid ma chapabu to shwom, ilaxle opange ibu to shwompuix hwom ziüi. Gilgal ma maihupongbu tö koxle hüi, ikoxlechu tö-tsap ibu a kothofa to longthün tuita ang ngole hüiüi.”

¹² Kem putong Jakop a, kakonu tuita lom angkya hanpakma Mesopotamia to pao angkya lai. Chixe mix hanpakma mwot mokle chix chunbu to hule kox.

¹³ Israel khünaknu Ijip nok chak to da ang ngokya chak tokya khosün angkya hanpakma Jowanpae ajepa tuita ahüi ilaxle hwom nuazingle kox.

¹⁴ Israel khünaknue Jowanpa ang khaxle jao mong atsik; hwome fün amadaokya ma ajang koxle hwome zikmüt-mangkho atakse. Hwome chix hato münma apüile changdaokya khoma hwom Jowanpae hwom to sikangünüi.