HOSIA 1 - OTSAO BAIBEL (BSI)

¹ Ija a, Judah haxtok ma Uziah, Jotham, Ahaz üntoxle Hezekiah hwome apünkya tukma tamchu Jehoash sasün Jeroboam a Israel haxtok ma wanghom ang ngokya tukma, Beri sasün Hosia hato Jowanpa tokhange hüikya kaxho changle.

Hosia Kakonu hia Naosombu

² Chemtue Jowanpae Israel nok füi Hosia makhange pongwang lükya zangwün ang sütpuix, chixe Hosia ang thüi: “Paokox ilaxle pongwang ma kako tanle koplax; nang kakonu a tüle osün müikya mixcha tuita changüi, ilaxle nang naosombu chuwüi she lailaile sule tüiüi. Ija lailaile ku khünaknue ku danle toxdaoa ilaxle chichangchizangle tüikyabu ang achangdaoa.”

³ Ikhoma Hosia-e Gomar le amünkya mixcha, Diblaim sacha lax. Okhie pongwang lükya naosa, sasün tuita ngünle changkya zuma,

⁴ Jowanpae Hosia ang thüi: “Ija nao ang ‘Jezril’, le amünkox, chemthüikoxle hopu Jehu-e Jezril mik amütkya khoma alüile chingo homtoxle kue Israel nok wanghom to sikangün angkya changle. Kue Jehu wangting a olithule amüt angkya changle.

⁵ Ilaxle itukma Jezril Haxsha ma kue Israel nok süpahi tsak-zong bakle amütüi.”

⁶ Gomar-e anyilükya nao ngün, Izuma a shekosa ngün. Jowanpae Hosia ang thüi: “She ang ‘Mong chikünkya nao’ le amünkox, chemthüikoxle athaxpi kue Israel nok hato ku mongkün münaho chichangba kue hwom thaikya münalak.

⁷ Ikoxlechu Judah khünaknu hato kue mongkün ahoüi. Ku, Jowanpa, hwom Zang-e hwom khosünle kopüi, ikoxle ija kue ochax-ozan ma: chang-hi-pax, sanhap hia hapnu chichangba man hia mankho ma ngakya khünakbu, ibu füi tsuakle faüile münchang.”

⁸ Gomar-e ija nao tuxle atsün füima she ma tamchatle nao tüi ilaxle sasün anyi-lükya pux.

⁹ Jowanpae Hosia ang thüi: “Ija nao ang ‘Ku Khünak Münchang’ le amünkox, chemthüikoxle Israel khünaknu a ku khünaknu münchang, ilaxle ku a hwom Zang münchang.”

Israel Nok Fün Tamchatle Amüi angkya

¹⁰ Israel khünaknu a tinu angkya fix büta tsaüi; ibu a e ang tamchu thüt ang chithole changüi. Athax Zang-e hwom füi akax: “Hünzom a ku khünakbu münchang”, Ikoxlechu chixe hwom füi: “Hünzom a ozün ma tüikya Zang su-sabu changpu!”, le akax angkya hanpak hüile ngole.

¹¹ Judah angkya khünaknu hia Israel angkya khünaknu tuita ang achangdaoüi. Hwome hwom obama lompa tuita wüi zünle laxüi, ilaxle hwom a hwom haxtok ma tamchatle putsale ahak-aluaüi. Changle, Jezril tsün chaxwan-zanghan a huanu chongkya changüi!