HABAKUK 2 - OTSAO BAIBEL (BSI)

Jowanpa e Habakuk Kax to Lankya

¹ Ku a ku sailya kho to ngaüi ilaxle Jowanpae ku ang chem akax angkya kaxkoxüihex tamchu ku kaxthup-ngaotün to chemle lanlan, ibu to hule tanngoüi.

² Jowanpae ku ang kaxlan ija fa: “Nang hama kue chem ngaile ahopuix, tam mik-hu mawüi ele tsuakkya lima, longkhaobu ma tsaothale zale koplax.

³ Ija a chakza ma koplax thomlax, chemthüikoxle ija changle ngai angkya hanpak mangui. Ikoxlechu hanpak a chwonle wüi hüile ngole, ilaxle kue nang hama chem ahodaopuix ija otsingtsingle changle hüiüi. Ija ngui ang süshenkya ningle sütkoxlax, ikoxlechu ija tanle nüilax; ija changle ngai angkya jaojao, ilaxle hanpak alüile münlaxüi.

⁴ Ilaxle kaxho a ija changle: ‘Opang ochax changlaxpuix ozün ma münngoüi, ikoxlechu opang otsao changlaxpuix hwom ngoüi büthüikoxle hwome Zang to hwom mongong thom.’”

Ochax khünakbu Hato Thama

⁵ Tuinae dyenlale changüi. Nüfux füikya khünakbu ma mongngam tüile ilaxle mong nazakkya chitüi. Hwom a zikmüt-mangkho ningle otuechu mongzom müikya chitüi. Ikhoma hwome ma hanpak ang jat-li bomachu jat-libu tingtakle pao.

⁶ Zandabue hwom kople apüikya zanpabu ajao-adale changüi ilaxle hwome apong angkya thama ahole azaüi. Hwome thüiüi: “Oja hünzom kux chichangpuix ija hünzome laxpu, ikoxle hünzom maxsax! Hünzom thashe tsangthom angkya atsang-atsangle hünzom chemtukux ngole hüilaxüi?”

⁷ Ikoxlechu hünzome ija awanüi thoto, hünzome mix tingtakle ngokyabu thashe-e awangle changüi ilaxle ija tsangthom angkya hünzom sasün to apüile atsangüi. Zanpabu nguilaxle hünzom azale khomtsile abün ang tomüi. Hwome hünzom tuina komle tsuiüi!

⁸ Hünzome obibi nok kux hexle tsuidaoa, ikoxle athax a ota toxle changkya khünakbue hünzom tuina tsuiüi, ija a hünzome zong ma laxle chaxwannu angkya khünaknu hia hwom tingnubu to ozik-omüt thama apüile changkya olüix ang changüi.

⁹ Hünzom a maxdaoa! Changnong-pünthomle mixkux tsui apüikya füi hünzom ahak-aluale chang ilaxle hünzome ma hom to mix chakmok-janlangle chakju ang chithole zing thompu!

¹⁰ Ikoxlechu ija nang mwot makhange nang homkha hato thünzak apüipu; mixjat-mixlibu amüt-asamkya makhange hünzome ma hato alüile thama apüipu.

¹¹ Pan angkya long katuke ngaxchu hünzom ang omale kaxthüi le akhongle, ilaxle püitho-zuanoe ija kaxho taile apukle.

¹² Hünzom a maxdaoa! Hünzome mütkop chifün ma tingkoppu ilaxle mix mik amütkya füi ija zingle ajongpu.

¹³ Hünzome tingtakle kopkya jatlibue hwom hanpakma laxli chemchu chitüikya mwot to thangle zingole, üntoxle hwome zaikya hom a lajuak ang achangle shundaoüi. Jowanpa Khüthak Zang-e ija tsuakdaoa.

¹⁴ Ikoxle chaxwannu a, tinu thün ma tie awangle tüikya lailaile, Jowanpa fuazang tsingkyae awangle tüiüi.

¹⁵ Hünzom a maxdaoa! Hünzom mongtsik füi hünzome tomzibu to zak akople hwon; hünzome hwom to jutok mix to hupupu le hu.

¹⁶ Hünzome münchong lüi ma thünzak mix kople changüi. Hünzome alüile juling saxsaxle changüi ilaxle jutok saxngat mix to hukya ningle mixe hünzom to huüi. Jowanpa chix jaoe hünzom mongtsik pe hünzom ang wüi alingüi, ilaxle hünzom münchong a thajao wünhai ang changüi.

¹⁷ Lebanon faonu hünzome shapu; athax hünzom dakle anguaküi. Ija angkya müi hünzome langpu; athax a müie hünzom chabüt-lasün ang tomüi. Ija a hünzome mik-lang mix-huak tamchu chaxwannu angkya tingnubu hia ibu ma tüikya khünakbu zan to kale changkya khoma ile chang ang tomüi.

¹⁸ Chapa a chem mwot to hüi angkya? Ija a khünake zingle alaikya jali tuita. Ijae othai boma chemchu münapua. Ija to mongong tüile chang angkya hanpakma ija zingkya mix ang chemfün amüile fadao? Ija a zangwün ang ngaxchu chithokya baozang tuita!

¹⁹ Hünzom a maxdaoa! Hünzome pünfunsa füi akax: “Zolax!” chichangba longdwon tuita ang thüi: “Ajonglax!” Chapa tuitae nang ang tütali ngaile aho tho angchami? Ija to hun hia khop füi chwople chu tüingokoxlax, ikoxlechu ija ma khüzün müntüi.

²⁰ Jowanpa a chix otsao Zangshwom-Hom ma tüile; chix tunthoma zangfang angkya noknusa wüi dangle changkox. Kox.