EZEKEL 9 - OTSAO BAIBEL (BSI)

Jerusalem to Zothup

¹ Ifüima kue ile Zang akhongkya zing atat: “Hünzom, tingnu to zothup angkya khünakbu ito nguihüi. Nang füi tomle nang chang-paxbu kop-hüi.”

² Lebama wüi shuakuxchi Zangshwom-Hom zünkai tokna tokya mixsün azok ngui. Hwom pangwüie chang-pax koplaxle tüikya. Hwom füi tomle jaknyi awunlaxle khünak tuita tüikya. Chix ma zale kop angkya tütali koplaxle tüikya. Hwom pangwüi khop tö-tsap zui ma ajong.

³ Ifüima Israel nok Zang womle tüikya wünzung nyanle tüikya chix ngwotnui ozang füikya zünmokbu ding angkya ajong. Ilaxle Zangshwom-Hom fülom hato hüi. Jowanpae jaknyi awunle tüikya khünak to nyakle thüi:

⁴ “Jerusalem tingnu apatle lekox ilaxle tingnu ma mokle tüikya ochaxbu khoma fuxtsüile sikngün apongle ngokya pangnusa khangpong ma manwan tople laxkox.”

⁵ Tamchu Zang-e mama khünakbu füi akaxkya kue atat: “Tingnu akaile chix man tokox ilaxle lang kox. Owachu taxtox; owatochu chingchakya taxtüi.

⁶ Zunu-zupa, naocha-naosün, nüchabu, honu hwom, tamchu naosombu pangwüi lang kox. Ikoxlechu khangpong ma manwan füikya khünak to taxtwon Ija mwot ija ku Zangshwom-Hom makhange owang wang kox.” Ikhoma hwome ikhama Zangshwom-Hom ma ajongle tüikya lompabu makhange owang wang.

⁷ Zang-e hwom ang thüi: “Zangshwom-Hom chitsaokya ang achang kox. Ija nya-obu a mangbu füi awang ang tomkox. Mok ang sütkox!” Ikhoma hwome tingnu ma khünakbu lang ang süt.

⁸ Ile mix langle ngopongma, ku a ikhato ku tata tüikya. Kue haxchi to thüne hule ku hax to tswonle awüt ilaxle akhong: “Jowanpa Khüthak Zang, Israel nok ota toxkya pangwüi langle awütle nang mong Jerusalem füi athukle jao ma pia?”

⁹ Zang-e lan: “Israel nok hia Judah nokbu a khompua-zadünkya ochaxbu mokle thaidaoa. Hwome chaxwantok pangkhato wüi mix-lang mix-huakkya müt kopdaoa ilaxle Jerusalem a mik-amütkyae awangdaoa. Hwome thüile, Jowanpa kue hwom haxtok danle toxdaoa idaile kue hwom münngünüi.

¹⁰ Ikoxlechu kue hwom to chingchakya müntüiüi; hwome mix to chemle hwondaopuix ija ningle kue hwom to hwonüi.”

¹¹ Ifüima jaknyi awunle tüikya khünak chat ilaxle Jowanpa hato kaxwün wangle thüi: “Kue nang kaxtom kax ma laxle tsuakdaoa.”