EZEKEL 8 - OTSAO BAIBEL (BSI)

EZEKEL ZANG MIKNGÜN-OHÜN ANYI-LÜKYA (8.1—10.22) Jerusalem ma Chapa Shwomkya

¹ Kwom zanda ang kople paokya zanglao azok lükya lyetkua azok ma nyix aga lükya to, Judah nok angkya zandabu khama lompabu ku füi tomle ku hom ma thungle tüikya. Allele Jowanpa Khüthak Zang zong ku hato hüi.

² Kue angakle hukoxle za-adünle khünak lailaikya tuita ngün. Khyadax makhange fangchi chix tompo a wün lailaile ngün, ilaxle khyadax makhange thakchi chix tsangtsa a khop jan fwotle atsyet thomkya lailaile ngün.

³ Chixe chak lailaikya tuita thüile ahüi ilaxle ku to kho ma file kop. Ilaxle ija mikngün-ohün ma Zang chasae ku dingkho to nwon ilaxle ku Jerusalem to apüi. Chixe ku, Zang zongto chisumüikya chapa thomle tüikya nui, Zangshwom-Hom nuithong to dong angkya shuakuxchi fülom hato ku apüi.

⁴ Ikhato kue Israel nok Zang womle tüikya nyankya zangngai kue ngün. Ija a ku Kebar Shuanu zui ma ngopongma ngünkya lailaile tüikya.

⁵ Zang-e ku ang thüi: “Ziün angkya khünak, shuakux chito hulax.” Kue hukoxle fülom zui angkya tö-tsap hama Zang zongto nushix dongkya chapa tuita kue ngünle lax.

⁶ Zang-e ku ang thüi: “Ziün angkya khünak, chempang changle ngopuix nange ngünchami? Israel noke ikhama zakkop mwot mokle ngokya to hulax. Hwome ku, ku otsao nui angkya siatsai-siatsaile jwonle apao ngole. Nange ija füi ngaxchu sümakya mwotli ngün ang kopüi.”

⁷ Chixe ku homthochi nui fülom hato pao ilaxle katuk zole akha thomkya kha aho.

⁸ Chixe thüi: “Ziün angkya khünak, imakhange katuk wole dongkox.” Kue ija wo ikoxle kahak tuita atak.

⁹ Chixe ku ang thüi: “Ikhato noplax ilaxle hwome ikhato mokle ngokya chichang-chizangkya mwot to hulax.”

¹⁰ Ikhoma ku dong ilaxle hu. Katukbu a pu hia mama chitsaokya müibu mua zingkyae awangle tüikya.

¹¹ Ikhama Israel nok lompabu puzombün tüikya. Shafan sasün Jananiah chuwüi ikhama tüikya. Hwom pangwüie ongan müikya so zok angkya thua twontwonle tüikya. Ibu ongan müikya sobu makhange wünkhut laile tüikya.

¹² Zang-e ku ma atüi: “Ziün angkya khünak, Israel nok lompabue huxsa ma chempang mokpuix nange ngüncha? Hwom pangwüie muabue awangle tüikya nui ma shwomle ngole. Hwom kaxfyet a: ‘Jowanpae kem münngün! Chixe kem chaxwan dantoxdaoa.’”

¹³ Ifüima Jowanpae ku füi akax: “Hwome ifüi sütsexle zakkop mwot mokkyabu nange ngün angkya changle.”

¹⁴ Ikhoma chixe ku Zangshwom-Hom shuakuxchi fülom to pao ilaxle baozang Tammuz zile paokya khoma mang sople ngokya shekobu aho.

¹⁵ Chixe atüi: “Ziün angkya khünak, nange chuja ngünchami? Nange ito kaikya zakkop mwotbu ngün ang kopüi.”

¹⁶ Ikhoma chixe ku Zangshwom-Hom angkya nuithong to dün. Ekhato otsao nui to dongüi fülom ma, tö-tsap hia nya-o nyi bama, khünak tsaba-aga tukux tüikya. Hwome hwom tok a otsao nui chito aho ilaxle handün chito hule, zanghan chidün to shwomle chikux thongle akhux ngokya.

¹⁷ Jowanpae ku ang thüi: “Ziün angkya khünak, nange chuja ngünchami? Judah khünak ibu a, nange ikhama ngünle hüidaokya nushix mwot hia onok to ule tata zan to kale mwop alaikya, ibu füi mongzom chimüile ngokyabu changpu. Münchang, hwom ngui angkya wüi ilaxle hwome ibu ija Zangshwom-Homnu mongma mok angkya wüi ilaxle ku ang tsikle ngokya to kai mongtsik adün angkya wüi changle. Hwome tsuakkya tukuxle ku ang omale thüikya to hulax!

¹⁸ Hwome ku mongtsik janzüi bakle awan ang kop angkya changle. Kue hwom to münshan chichangba chingcha ahole münchangüi. Hwome tsuakkya tukuxle akhongle ku to jopüi, ikoxlechu kue hwom zangjop to münapaüi.”