EZEKEL 7 - OTSAO BAIBEL (BSI)

Israel Nok hato Oshuk Hanpak Nguile Hüile

¹ Jowanpae ku füi akax,

² “Ziün angkya khünak, ija a Jowanpa Khüthak Zang kue Israel nok füi wünle ngokya kax changle: Chaxwan pangnu hanpakma ija a oshuk changle!

³ “Israel, oshuk a hüidaoa. Ku mongtsike hünzom to pokya hünzome awanle laxüi, chemthüikoxle hünzome mokle changdaokya olom tole kue hünzom to kaxfün fale ngopu. Hünzome mokdaokya zakkop mwot olüi kue achatle koxüi.

⁴ Kue hünzom opupuchu müntox chichangba opupu tochu chingcha münaho. Hünzome mokle hüidaokya zakkop mwot khoma kue hünzom to sikangün angkya changle, ikoxtix hünzome ku a Jowanpa changle le awan ang kopüi.”

⁵ Ija a Jowanpa Khüthak Zang-e akaxle ngokya kax changle: “Hünzom hato thama tuita füima tuitale hüile ngole.

⁶ Ibu pangwüi kaile toxdaoa. Ija a oshuk changle. Hünzom a maxdaoa.

⁷ Hünzom haxtok ma ngole tüikyabu hato oshuk hüile ngole. Haxnukho tokya baozang shwomkya onuibu to puakya chemchu chitüi ang ikoxle khosameawangle chang angkya hanpak chwonüna.

⁸ “Athax janbama wüi hünzome ku mongtsik janzüie pokya awanle hüiüi. Hünzome chem mokdaopuix ija bama kue hünzom ang kaxfün fale ngopu, ilaxle hünzome mokkya zakkop mwot hanpakma kue hünzom to olüix khomüi.

⁹ Kue hünzom opupuchu müntox chichangba hünzom hato chingcha ojao münaho. Hünzome mokle changdaokya zakkop mwot bama kue hünzom to sikangünüi, ikoxtix ku a Jowanpa changle tamchu hünzom to sikangünle ngokya a ku changpule hünzome awanle laxüi.”

¹⁰ Thama apong angkya nyix hüile ngole. Tata füi alünkyae ule hüile. Ongam a oza lünle tüile.

¹¹ Alünaloxle changkyae chichang-chizangkya mwot huanuma alaile. Hwom kux chemchu ota müntoxüi, hwom zaxzangpule ngokya tuina chemchu, chichangba hwom fuazang chemchu atale müntoxüi.

¹² Hanpak a hüile ngole. Shak-sünkya hia hangjokya chem angchu chichang angkya nyix hüile ngole, chemthüikoxle noknusa hato Zang sikngün tomwüi hüi angkya chang koxle.

¹³ Hwome amütdaokya anaole olüi koptang thalex mix owachu okuilole chingoüi, chemthüikoxle Zang mongtsik noknusa khangkho ma tüikoxle. Chichangchizangle tüikya mix owachu ozün ma ngo ang müntho.

¹⁴ Nyazongbu müt, ilaxle pangnusa achwonle changüi. Ikoxle owachu zan to chikaüi, chemthüikoxle Zang mongtsik noknusa hato tomwüi nguile tüikoxle.

Israel Nok Ochaxbu hanpakma Zothup

¹⁵ Tingjang lomnu to achyet-amüikya, ilaxle homkha ma kaklak hia woknuak tüile ngo. Tatok to paole asukyabu a zan ma maxüi, ilaxle tingnu mong ma asukyabu a okak-olak hia woknuak shoma ma womüi.

¹⁶ Haxsha tokya osubu abütle paokya ningle züizüi a haxhua to paole azangüi. Hwom pangwüi hwom ochaxbu khoma mongmaxle changüi.

¹⁷ Pangnusa chak shonaile changüi, ilaxle hwom chikuxbu anyonle changüi.

¹⁸ Hwome nyikhwon awunlaxle ngoüi ilaxle hwom abünle maxüi. Hwom khangbu ongüi, ilaxle hwom pangwüi zakkop ma ngoüi.

¹⁹ Hwome hwom hun hia khopbu pangtsa ningle tingjang lomnu to tswonle awütüi, chemthüikoxle Jowanpae chix mongtsik mongma thokle ahüikya chak tokya khop hia hun thalix tuina chemechu hwom khose ang chitho. Hwome ibu athaxpi hwom mongzom amüi hia hwom wok afwot ang twon angkya olom chitüi. Hun hia khopbu hwom ochax lom to alyetpu.

²⁰ Noxta a hwom likwünbu hanpakma ngamle tüikya, ikoxlechu hwome ibu a ma thajao kop angkya chapabu zing ang twonkya khoma Jowanpae hwom tuina a laxli chitüikya tüi ang achang.

²¹ “Mixnokbue hwom tuina tsui ang tomüi, ilaxle wanlom pünkya khünakbue hwom tuina lax ilaxle ija chitsaokya ang achangüi.

²² Ku tuina thomnui Zangshwom-Hom chitsaokya ang achangkya zuma, ahux mixbue ija daple donglaxle ija amakya zuma kue ojao müntsa.

²³ “Pangwüi khosam ma tüile: haxtok pangwüi mix lang mix mixe awangle tamchu tingnubu a alün-aloxkyae awangle tüile.

²⁴ Kue ikhato chisumüikya nok apüiüi ilaxle hwom ang hünzom homhaxbu lax ang tomüi. Chemtue kue chaxwannu nokbu ang hünzome zangshwomle ngokya nui ochax ang achang ang tomüihex, hünzom khama mixtsak naomüile ngokya mixe ngaxchu chix mongong ma athaüi.

²⁵ Pangnu thama adün angkya hüile ngole. Hünzom tumüi-lomkhao angkya to huüi ikoxle otuechu ija chiataküi.

²⁶ Thama tuita füima mama thama azuile hüiüi, ilaxle kaxho oma a chizopkya jajen ningle thokle hüiüi. Hwome chem ngünpuix, ibu ngaile aho angkya hanpakma hünzom ajebu füi tsaiju-kaxjule changüi. Nguapabue khünaknu hama anwot-ano angkya chemchu chitüile changüi, ilaxle tüichong mixmüibu ma zünkax-saikax chemchu chitüile changüi.

²⁷ Wanghompa mongmaxle sopüi, wanghomsae monghom asamüi, ilaxle khünaknu a zale abüt-abanüi. Hünzome chempangsa mokdaopuix ibu khoma kue hünzom to sikangünüi, ilaxle hünzom mix bama kaxfün chemle fadaopuix ilailaile kue hünzom bama kaxfün faüi. Ijae hünzom hama ku a Jowanpa changpule ahoüi.”