EZEKEL 5 - OTSAO BAIBEL (BSI)

Ezekel-e Chix Kho Sex

¹ Jowanpae akax: “Ziün angkya khünak, anaxkya changlo koplax ilaxle ija a nang kaxmaimun hia nang munbu ong ang twonlax. Ifüima kho ibu tuak ma thütlax ilaxle othom azom ang ahanlax.

² Ija hwople koptsuakkya zuma thom tuita a tingnu ma zokle ashunlax. Othom tuita a hünzom tingnu toknakai to paopongma asexle awütlax. Othom tuita a zangwin to apikle awütkox, ilaxle kue ku changlo füi ija mantole changüi.

³ Kho hidaole tüilax ilaxle ibu a nang nyitua ma akungle khalax.

⁴ Ilaxle ikha angkya hidaole süile tüilax, ibu a wünkha to awütlax, ilaxle ibu shun ang laxkox. Ibu makhange wün a Israel haxtok pangkha towüi tsale paoüi.”

⁵ Jowanpa Khüthak Zang-e thüi: “Jerusalem to hulax. Kue she a, mama tingnokbue akhople chaxwannu osungkha ma danpu.

⁶ Ikoxlechu Jerusalem a ku kaxtom füi alünle ajong ilaxle she a, akhople tüikya mama ting-nokbu füi, kax ma chilaxle tamchu chichangchizangle tüipule ahole. Jerusalem-e ku kaxtombu chilaxle awüt ilaxle ku wanlombu münthompule angam.

⁷ Athax, Jerusalem, Jowanpa Khüthak Zang kue chemle akax ngopuix ija to apakoplax. Ku wanlombu chithomkya hia ku kaxtombu kax ma laxle chitüikya ma, hünzome hünzom akhople tüikya ting-nokbu füi sütsexle ku ang sikngün koxpu. Hünzome hünzom akhople tüikya onokbu zanglom-saikha topu.

⁸ Ikhoma Jowanpa Khüthak Zang kue nang füi, ku a nang zanpa changpule akax ngopu. Pangnu jat-lie ngünle kue hünzom to kaxfün fakya tüiüi.

⁹ Kue anukya mwot pangwüi hünzome mokle hüikya khoma, amipongma kue ilele mamokle Jerusalem to moküi ilaxle iningle tamchatle münmok.

¹⁰ Ija khokho ma, Jerusalem ma tüikya nu-pa hwome ma su-sa hwom saxüi, ilaxle naosom hwome manu mapa hwom saxle changüi. Kue hünzom to sikangünüi ilaxle atale toxkya ozün ma tüikya pangwüi ma lomkuakua to afanle pao ang tomüi.

¹¹ “Ile ku a ozün ma tüikya Zang chang koxle: ija a Jowanpa Khüthak Zang zangwün changle: hünzom chichang-chizangkya hia ochax mwotbu füi ku Zangshwom-Hom akhu ang tomkya khoma, chingcha ojao chitüile kue hünzom dakle anguaküi.

¹² Hünzom khünaknu süitex süifi a tingnu mong ma okak-olak hia woknuak ma zi ang tomüi; süitex süifi a tingnu toknakai to changlo füi hütle langüi; ilaxle süitex süifi a zangwin to chiakle apiküi ilaxle changlo füi kue ibu achuaüi.

¹³ “Ku mongzom mamüi mamüile hünzome ku mongtsik mongma janzüie pokya awanle laxüi. Chemtue ibu pangwüi changüihex, hünzome ku to mongong chithomkya khoma, Jowanpa kue hünzom füi zangwünkya changpule hünzome tikle laxüi.

¹⁴ Hünzom zui makhange le-zyenkya ting-nok pangnusae hünzom tunthoma kam thaüi ilaxle hünzom füi atsaile ngoüi.

¹⁵ “Chemtue ku ang hünzom füi mongtsik mongma laxle hünzom to sikangünle changüihex, hünzom akhople tüikya ting-nokbu a abüt-abanle changüi. Hwome hünzom to ajaole huüi ilaxle hünzom wanjaile changüi.

¹⁶ Kue hünzom hato sütling apüile ngokya zak ang tomüi ilaxle hünzom a woknuak ma max ang tomüi. Hünzom amüt angkya hanpakmale pax jukya füi tsunle anopkya ningle woknuak sikngün füi hünzome apongle laxüi.

¹⁷ Kue hünzom naosombu lang ang woknuak hia faomüibu hüi ang tomüi, ilaxle hünzom lang ang a okak-olak, tuma-wanshix hia ochax-ozan, ibu ahüiüi. Ija a Jowanpa kue akaxdaoa.”