EZEKEL 48 - OTSAO BAIBEL (BSI)

Homjenbu ang Haxtok Ahanle Fakya

^1-7 Ija haxtok shuakuxchi longzipong a Mediterenian Tinu makhange handün chito Hethlon, Hamath Lomnu, Enon Tingnu, Damaska hia Hamath nyi zo angkya wangtingbu longzipong chitole. Homjen pangwüie haxsüt tuipong-tuipong kop angkya changle; ibu haxsüt a handünchi longzipong makhange hannopchi Mediterenian Tinu chito, shuakuxchi makhange thütle shuathong chito lele ile tüikya: Dan Ashar Neptali Manasseh Efraim Reuben Judah

Haxtok ma Osungkha Süile Tüikya Haxsüt

⁸ Ija othom anyi lükya haxsüt a tomkux ang süile tuikya haxsüt. Ija a shuakuxchi makhange shuathong chito jule okhao ma mai 10, ilaxle itukuxkux wüi olwot ma handünchi makhange hannop chito, homjenbu ang ahanle koxkya haxsüt füi tomwüile tüikya. Zangshwom-Hom a ija wankam ma zai angkya chang.

⁹ Ija haxsüt osungwa ma olwot ma mai 10 okhao ma mai 8 a Jowanpa hanpak ang atsaole dankya haxtok.

¹⁰ Nguapabu ang ija wankam ma hwom süntswon tüiüi. Handünchi makhange hannop chito thütle ija haxsüt a mai 10, ilaxle shuakux chitokhange shuathong chito thütle mai 4. Jowanpa Zangshwom-Hom a ija wankam osungwa ma tüi angkya oli.

¹¹ Ija otsao wankam a Zadok makhange hüikya zompu-zangpabu hanpak ang changle. Mama Liwi hwom lailaile chichang homtoxle hwome mongong füi ku thotha-manzaile ngo, ilaxle Israel khünaknu füi tomle ochax lyenkya khato chiwom.

¹² Ikhoma hwom ang a mama Liwi hwom füi azitle amüikya kha onui tüi angkya wüi changle, ilaxle ija a pangnu füi ataxkya otsao nui changüi.

¹³ Liwi hwom ang chuwüi müikya haxtok tüi angkya oli, ija a nguapabue kopkya zongma shuathongchi ma changüi. Ija chuwüi handünchi makhange thütkya hannop chitole le mai 10 ilaxle shuakuxchi makhange thütle shuathong chito mai 4 le tüi angkya changle.

¹⁴ Jowanpa hanpak ang atsaole dankya haxmik a haxtok ma sümüikya kha changüi, ilaxle ijongkha a owawa ang hangle chichangba owawa füi alüix-achüix le chichangüi. Ija a otsao tamchu Jowanpa kux changpu.

¹⁵ Süile kopkya kha angkya danle toxkya haxtok olwot ma mai 10 okhao ma mai 2 a otsao münchang, ikoxle ija a noknusae laxtsuak angkya hanpak changle. Hwom ikha to ngo ang tsuak ilaxle ija haxtok hwom kux ang lax ang tsuak. Tingnu a ija osungkha ma chang angkya oli.

¹⁶ Ija tingnu a okan thüt koxle olwot-ojang tomwüi, fak 2,520 pong lole changüi.

¹⁷ Tingnu akhople chamtua ma kotho fak 140 pong lole tüiüi.

¹⁸ Ija tingnu zaile chang füima alyenle dantoxkya shuathong chikao otsao haxtok: handünchi ma olwot mai 4 okhao mai 2 ilaxle hannopchi machu ile wüi tüikya haxtok ibu a ija tingnu ma ngole tüikya khünakbue manzai haxtok ang lax angkya changpu.

¹⁹ Tüta homjen tokya nguikya wüi changlax, ija tingnu ma ngokya khünak pangnusae ikhama manzaile chang ang tsuak.

²⁰ Idaile süile dankya tantiwa angkya haxtok a olwot okhao ma tomwüi mai 10 pongle tüiüi, ilaxle ikhama tingnu zaile tüikya wankam chuwüi womüi.

^21-22 Zangshwom-Hom, nguapabu haxtok, Liwi hwom haxtok, tingnu wankam, ibu tokma, handünchi hia hannopchi ma ota tüikya haxmik a apünkya wanghom hwom haxtok ang changüi. Ija a handünchi longzipong alople ilaxle hannopchi ma Mediterenian Tinu alople, shuakuxchi ma Judah homjen füi azitle ilaxle shuathongchi ma Benjamin haxsüt füi azitle tüiüi.

Mama Homjenbu Haxtok

^23-27 Ija süile kopkya haxsüt shuathongchi ma, handünchi longzipong makhange shuathongchi Mediterenian Tinu alople, mama homjenbu pangnusae wüi, ima koxle tüikya ningle, shuakuxchi makhange shuathong chito jule ma haxsütsüt le ahanle kopüi: Benjamin Simeon Isakar Zebulun Gad

²⁸ Gad hwom ang koxkya haxsüt zongma shuathongchi ma, longzi a Tamar makhange shuathongchi-hannopkao to le le Kadesh angkya faothwop alople, ilaxle shuakuxchi-hannopkao to le le Ijip nok longzipong makhange Mediterenian Tinu alople changüi.

²⁹ Jowanpa Khüthak Zang-e thüi: “Israel nok homjenbue haxtok a homjen-homjen to ija ningle tom-hanle lax angkya changpu.”

Jerusalem Zünkaibu

^30-34 Jerusalem to ngui angkya lomtang 12 tüile. Tingnu katuk osam ali pangwüi fak 2,520 pong lole tüile ilaxle osam tuipong to zünkai azom pong tüle. Zünkai mün tiale homjen tuipong mün koxle tüile. Shuakuxchi angkya zünkaibu mün a Reuben, Judah, ilaxle Liwi le changle; handünchi katuk ma tüikya zünkaibu mün a Jusep, Benjamin, ilaxle Dan changle; ilaxle shuathongchi katuk angkya zünkaibu mün a Simeon, Isakar, ilaxle Zebulun le changle; ilaxle hannopchi katuk ma tüikya zünkaibu mün a Gad, Ashar, ilaxle Neptali le changle.

³⁵ Katuk pangwüi athüt koxle fak 10, 080 pongle changle. Athax makhange ija tingnu mün a “Jowanpa a Ikhama Tüile!”, le changüi.