EZEKEL 44 - OTSAO BAIBEL (BSI)

Handünchi Zünkai Twonkya

¹ Zangshwom-Hom handünchi kao to ija mixsüne ku homtho zünkai hato pao. Ijakha ka hakle tüikya,

² ilaxle Jowanpae ku ang thüi: “Ija zünkai a othuithuima ile wüi hakle thom angkya changpu. Khünak owa angchu ija twon ang müntom, chemthüikoxle Jowanpa, Israel nok Zang ku a Zangshwom-Hom to ija makhange nopkya changle. Ija a ile hakle thom angkya changpu.

³ Apünle ngokya wanghom, ku ngokya khama otsao fong sax ang nop ang tsuak. Chix a nopüi ilaxle ikoxle homzong ma tüikya nui to leüi fülom makhange chix laile paoüi.”

Zangshwom-Hom to Ngui angkya Wanlombu

⁴ Ifüima ija mixsüne ku a shuakuxchi fülom makhange Zangshwom-Hom tuntho to apüi. Kue huno koxle Zangshwom-Hom homkha a Jowanpa womle tüikya wünnyane awangle ngün. Kue ku thün khomle haxchi to hule akhux,

⁵ ilaxle Jowanpae ku ang thüi: “Ziün angkya khünak, nange chem ngünpuix tamchu chem atatpuix ibu to mongkoxle changlax. Kue nang hama Zangshwom-Hom bama wanlombu akax angkya changle. Zangshwom-Hom to chemningkya khünak nguidongle chang ang tom angkya hex ilaxle chem ningkya khünak nguidong ang chitom angkya hex khünkhile zakoplax.

⁶ “Alün-aloxle tüikya Israel khünakbu füi, hwome mokle hüidaokya nushix dongkya mwotbu füi Jowanpa kue adu tsuak angkya münchangle thüikox.

⁷ Müiza hia ajibu ku ang tö koxle changpongma, hwome Khwonzüt-Zom chizingkya hia ku kax ma chilaxle tüikya khünakbu Zangshwom-hom homkha to adünkya makhange hwome ku Zangshwom-Hom chitsaokya ang achangdaoa.

⁸ Ku Zangshwom-Hom ma zom zingkya mwowtkho hwome a chilax ikoxle mixnokbu ang lax ang tsanle.

⁹ “Jowanpa Khüthak Zang, kue ngaipu, ku Zangshwom-Hom to, Khwonzüt-Zom chizingkya mix, ku kax ma chilaxle tüikya mix, Israel khato tomle ngole tüikya mixnokbu ngaxchu, owachu nop ang müntomüi.”

Nguapa Mwot Khato Liwi hwom Münlax

¹⁰ Jowanpae ku ang thüi: “Liwi khünakbu opange mama Israel khünakbu füi tomle ku hato tok aho laxle chapabu to shwomle changpuix, ibu to kue sikangünpu.

¹¹ Zünkaibu nyekya hia mama-mama Zangshwom-Hom mwotbu mokkya makhange hwome ku thotha ang tsuak. Zokle ashunkya tö hia mama töbu ang koxkya müibu hwome lang ang tsuak, ile hwom mwot a khünaknu nuazingle kox angkya mwot changüi.

¹² Ikoxlechu Israel khünakbu hanpakma hwome chapabu to shwomkya mwot moklaxle khünaknu ang ochax lyen ang tomle changdaokya khoma, Jowanpa Khüthak Zang, kue otsingtsing ma tsaosaxle akaxpu, kue hwom to sikangün angkya wüi changpu.

¹³ Hwome nguapa tuita ningle hwome ku mwot münmoküi chichangba ku zongto chem otsao hex ija hato chihüiüi chichangba Ataxkya Otsao Nui to münnopüi. Hwome nushixdongkya ochax mwot mokle changdaokya khoma ija a hwom hanpak ang sikngün fakya changpu.

¹⁴ Zangshwom-Hom ma mokle tsuak angkya wangshem mwot kue hwom ang mok ang koxüi.”

Nguapabu

¹⁵ Jowanpa Khüthak Zang-e thüi: “Israel nok pangnusae ku hato tok ahole changpuix, ipongma Zadok makhange hüikya sixli hwome Zangshwom-Hom ma ngua-mwot komkaile mokle ku to mongong chiamütle le ngole hüipu, ikhoma athax ku ngwotnui to nguilaxle ku ang müizao hia aji töbu koxtsuak angkya a hwom tix changpu.

¹⁶ Zangshwom-Hom hommong to donglaxle ku tö-tsap ma ku thothale chang angkya hia Zangshwom-Hom ma zangshwomkya mwot azui angkya hwome tix tsuaküi.

¹⁷ Chemtue Zangshwom-Hom hommong angkya lopsha to dong ang fülom makhange hwom dongle changüihex, hwome jak-nyiwun lax angkya changle. Hommong angkya lopsha ma hia Zangshwom-Hom ma mwot mokle changpongma hwome otuechu muzi füi takkya nyi-za chilaxüi.

¹⁸ Hwom ang zangmukti dütle chichang angkya hanpakma hwome nyidax füi khang ma ngüile tamchu nyidax nyipong apongle kopüi ilaxle züpak apakle chichangüi.

¹⁹ Khünaknu ngole tüikya homtho lopsha to laiüi thoma, hwome Zangshwom-Hom ma mwotmokle changpongma laxkya nyi-za a otsao nui ma sukle dantoxüi. Ile hwom otsao nyilobu füi khünaknu füi sikngün apong ang tomle chichang angkya hanpakma hwom zangjang nyi-za laxlaxle ngai angkya lai.

²⁰ “Nguapabue hwom khang chiongüi chichangba kho alwotle chithomüi. Hwome kho a othüt ma thomüi.

²¹ Hommong tokya nui to dongüima nguapabue ju-sax lingle chichangüi.

²² Nguapa owaechu lüka füi fanle ngokya mixcha chilaxüi; chixe a Israel nok naocha tuita chichangba hozui nguapa owawae dantoxkya thanucha, ibu lax ang tsuak.

²³ “Nguapabu a ku khünaknu hama chitsaokya hia tsaokya tamchu zanglom ma chitsaokya hia tsaokya chemle mali-mali ija anwot-anole kox angkya changpu.

²⁴ Chemtue ala-ashakya zangwün laiüihex, wanlom ma tüikya ningle ija zangwün a nguapabue fün-wünle kox angkya changpu. Zanglom pangpwonbu hwom ku wanlombu ma chemle tüipuix ile thom angkya changpu, ilaxle hwom Sabath a atsaole thom angkya changpu.

²⁵ “Nguapa tuita a, manu-mapa, ma naosom, matüi-manao chichangba tuihom to mapaokya mana-manao lüwüi ching, mix mang to twonlaxle ma tsangtsa chitsaokya ang chiachang angkya oli changpu.

²⁶ Chix tamchatle otsao ang achang füima, chixe nyix anüt tanle nuiüi

²⁷ ilaxle tix hommong tokya nui to donglaxle Zangshwom-Hom ma chix atsao angkya tö koxle chang ang tsuak, ikoxle tix chixe tamchatle Zangshwom-Hom ma thothat mix ang moktsuak angkya changle. Ija kax Jowanpa, kue akaxpu.

²⁸ “Tsünthom tuitae ata tsünthom ang koxle tox angkya kue Israel nok ang koxkya süntswon ningle nguapabue hwom ngua mwot mantswon tox angkya changpu. Israel haxtok ma hwom ang tuina chemchu koplax ngo ang müntom, hwom hanpakma ku tix pangnu changpu.

²⁹ Saxziak tö, ochax tö, ilaxle tsangthom tö, ibu a nguapabu süt hanpak changpu, ilaxle Israel haxtok ma ku hanpak ang süile dankya pangwüi hwome kop angkya changpu.

³⁰ Puamün wünkya hia ku ang koxkya oli pangnu amüimüi a nguapabue kopüi. Khünaknue an atsankya dang to, pongwang ma atsankya an a tö tuita ningle hwome nguapabu ang kox angkya changpu, ilaxle ku mohiman a hwom homkha ma ngoüi.

³¹ Nguapabue o-jux hia faomüibu hwom zikzik to zikya hia mama hozui müie langkya chemchu chisaxüi.”