EZEKEL 4 - OTSAO BAIBEL (BSI)

Ezekel-e Jerusalem Kople chang angkya Thüi Ano

¹ Zang-e akax: “Ziün angkya khünak, haxtak long laxlax, ija nang tunthoma danlax, ilaxle ija to Jerusalem tingnu hanpak ang janmanbu koxle titlax.

² Ilaxle ija hwople kopkya münwan ahole, tsaswot zinglax, hax thokle atsualax, zanhu pombu zailax ilaxle ija thuple chao angkya hanpak ang akhople münbu atuakkox.

³ Nang hia tingnu nyi obama jan tik-khe tuita jan katuk thatha ang ajongkox. Tingnu chito thün ahokox. Ija hwople kopkya to nange ija ziakople wintuk-hantha thomüi. Ija a Israel nok hanpakma mowan tuita ang changüi.

^4-5 “Ifüima nang nongchi kaoma shuile ngokox, ilaxle kue nang khangkho ma Israel nok thaikya khole koxüi. Hanpak nyix 390 nang ima ngoüi ilaxle hwom thaikya khoma sikngünle changüi. Hwome zanglao tuita sikngün apongse pa nang thangma kue hanpak nyixta ang achangdaoa.

⁶ Chemtue nange ija ashukle changpuix, nang tsaxchi kao to alopkox ilaxle Judah nok thaikya hanpak ang nyix punyi fuxtsüikox: nyixtakya sikngün a zanglao tuita sikngün hanpak ang.

⁷ “Jerusalem hwople kopkya to nang mik füi athangle hukox. Nang chak abünkox ilaxle ija tingnu zongto ajele changkox.

⁸ Ija tingnu hwople kopkya mwot tsuakle machang tanto kue nang a tsaxchi angkya nongchi to alop ang chimüile khale thomüi.

⁹ “Athax a tsaxsa tula, wonglai tsax, suilo, fialo, hikha ibu pangwüi kopkox ilaxle tik tuita ma athütle shokox. Ibu pangwüi awonle changkox ilaxle ija makhange an zingkox. Ile hanpak nyi 390 kaochi sam danle jiple ngopongma ija a nang süt ang changüi.

¹⁰ Nange nyixpong to an chakpuix azom pong wüi sax ang tomüi, ilaxle ija a ofüinyix kople ngo ang tomüi.

¹¹ Nang ang ti chuwüi othüt ma, nyixpong to wansa anyi pong wüi ling ang tomüi.

¹² Nange khünak dix zan makhange wün taküi, ija wün ma an atsanüi ilaxle ija a noknue ngün ang tsuakkya khama saxüi.”

¹³ Jowanpae akax: “Kue hwom mixnok chaxwan tok to chiakle changpongma, ija a Wanlom ma chisaxli le abaxkya süt, Israel noke saxle chang angkya mowan ang changüi.”

¹⁴ Ikoxle kue lan: “Jowanpa Khüthak Zang, ile münchang! Kue ku otuechu tsaolyenle chang ang matom. Naosom tanto khange wüi kue otuechu owüi zikya müimang hia faomüie langle changkya müimang masax. Zanglom ma otsao münchangle atsaokya sütli chemchu masax.”

¹⁵ Ikhoma Zang-e akax: “Müihule. Ile jangchangba kue nang ang maihu dix tak ang tomüi, ilaxle ija wün ma nange nang an atsan ang tsuak.”

¹⁶ Anaole chixe thüi: “Ziün angkya khünak, Jerusalem makhange sütli apüile ngokya lom kue tsyenüi. Hwome saxkya süt hia hwome lingkya ti tsyenle saxlingle changkya zuma ikhama tüikya khünaknu ang huanuma sikngün apongkya tüiüi.

¹⁷ Hwom an hia ti bakle shuüi; hwom a khosam ashukle changüi, ilaxle hwom ochaxbu khoma hwom a azuk-atsyale chang ang tomüi.”