EZEKEL 37 - OTSAO BAIBEL (BSI)

Za-zanbue Awangle Tüikya Haxsha

¹ Jowanpa ku ma nguile tüikya kue awanle lax, ilaxle chix chasae ku nwonle pao ilaxle zabue awangle tüikya haxsha ma athung.

² Chixe ku ija haxsha pangnukha to aham, ilaxle ikhato kue zuazoxle zanünkya zabu müimamale ngün ang kop.

³ Chixe ku ang thüi: “Ziün angkya khünak, za ibu tamchatle ozün ang achangtho ang chami?” Kue lan: “Jowanpa Khüthak Zang, ija kax to nange tix lan ang tsuak!”

⁴ Chixe thüi: “Zabu hanpakma aje-kox. Za zan ibu ang Jowanpa zangwün to apa angkya akaxkox.

⁵ Jowanpa Khüthak Zang, kue hwom füi akaxle ngokya kax ija hwom hama wünkox: Kue hünzom ma khüzün zakdün mütle koxüi ilaxle hünzom a tamchatle ozün ang achangüi.

⁶ Kue hünzom ang zix-hi-zabu athut apongle thom angkya tsak-zong koxüi, ilaxle hünzom to khwon füi chwople koxüi. Kue hünzom ma zaksyet angkya zangwin shole koxüi ilaxle hünzom a tamchatle ozün ang achangüi. Ifüima hünzome ku a Jowanpa changpule awan ang kopüi.”

⁷ Ikhoma ku füi akaxkya ningle kue aje. Kue jekax akaxle ngopongma wüi, kue khlik-khlok le ozing tuita atat, ifüima zabu tata füi asop-apongle chang.

⁸ Kue hule ngopongma, zabu to zix hia hakbue tamchu khwonbu füi chwop. Ikoxlechu tsangtsa ma zakdünkya a matüi.

⁹ Zang-e ku ang thüi: “Ziün angkya khünak, zangwin. Füi jekax akaxkox. Pangnuchi tokhange nguilaxle mangbue zakdünle ibu tsangtsa tamchatle ozün ang achangle achat angkya Jowanpa kax zangwin füi akaxkox.”

¹⁰ Ku füi akaxkya ningle kue aje. Tsangtsa ibu ma zakdün zangwin nop, ibu ozün ang achang ilaxle ajong. Hwom a süpahi othom ang zingkoxle okhonguile tüikya.

¹¹ Zang-e ku ang thüi: “Ziün angkya khünak, Israel khünaknu a ibu za-tua ningle changpu. Hwome hwom ang monghom hia füichi osho chitüile zanle zingokyabu changle le akaxle.

¹² Idaile ku khünaknu Israel nok hanpakma aje-kox ilaxle Jowanpa, kue hwom zuk-khabu dap angkya ilaxle ikhatokya hwom alailaxle Israel haxtok ma tamchatle apüile dan angkya ku mwot bama hwom hama wünkox.

¹³ Chemtue kue huanuma khünakbu akhünle thomkya zukting daplaxle ibu dokle alaiüihex, ipongma hwome ku a Jowanpa changpule awan ang kopüi.

¹⁴ Kue ku khüzün zakdün hwom ma mütle koxüi ilaxle hwom azang ang tomüi, ilaxle hwom a hwom haxtok ma ngo ang tomüi. Ifüima hwome ku a Jowanpa changpule awan ang kopüi. Jowanpa kue tsaosaxle akaxpu, kue ija ile moküijao.”

Judah hia Israel Nok Wangting tuita Ma

¹⁵ Jowanpae anaolechu ku füi akax.

¹⁶ Chixe thüi: “Ziün angkya khünak, nange pünthom tuita koplax ilaxle ima kaxhuak ibu zale koplax, ‘Judah Wangting.’ Ifüimachu pünthom tuita koplax ilaxle ija ma, ‘Israel Wangting’ le zalax.

¹⁷ Ifüima ija pünthom anyi otuntun apongle tuita ang achangle nang chak füi koplax.

¹⁸ Chemtue nang khünakbue ija chem hanpak le atüikya zuma,

¹⁹ hwom hama, Jowanpa Khüthak Zang-e Judah Wangting le zakya pünthom tuita Israel Wangting le zakya pünthom füi athut le chix chak ma kopüi ilaxle ija pünthom anyi tuita ang achangle danüi le thüikox.

²⁰ “Ija pünthom anyi nang chak ma koplaxle khünaknue ngün ang laxkox.

²¹ Hwom hama akaxkox, Jowanpa Khüthak Zang-e pangnu khato chiakle sam ngokya chix khünaknu, ta ma asüilaxle, hwom a hwom chaxwan to tamchatle apüi angkya changle.

²² Ija haxtok, Israel nok haxnubu tok ma kue hwom a onok tuita ang asüile danüi. Hwom ang, hwom thak ma apün angkya wanghom tuita wüi changüi, ile hwom a otuechu onok anyi chichangba wangting anyi ang ahak-ahanle chichangüi.

²³ Nushixdongkya chapabu hia ochaxbu füi hwom alüile otuechu chitsaokya ang chiachangüi. Hwome ochax lyen tamchu ku khohangle ngole hüikya lomtang pangnu tokya kue hwom atsai ang tomüi. Kue hwom atsaole danüi. Hwom ku khünaknu ang tamchu ku a hwom Zang angle ngoüi.

²⁴ Ku dapa Dawid lailaikya khünak a hwom wanghom ang changüi. Hwom pangwüi pünpa-chongwang tuita fang ma notom le ngoüi ilaxle mongong tüikya füi ku wanlombu pangwüi kax ma laxle tüiüi.

²⁵ Kue ku dapa Jakop ang koxkya haxtok ma hwom ngoüi, ija haxtok a hwom putong hwom ngole hüikya haxtok changle. Hwom ikhato othuithuima ngoüi, ija ningle hwom susabu hia hwomsix-hwomli pangwüi ile ngole hüiüi. Ku dapa Dawid lailaikya wanghompa tuitae jento hwom to apünle-awangle ngoüi.

²⁶ Jento hwom tumüi lomkhaole ngo angkya bama kue hwom füi tsaotsütle changüi. Kue hwom ajing-ating le chang ang tomüi ilaxle khünak huak pu-tsale chang ang tomüi. Ku Zangshwom-Hom ija haxtok ma hwom tu ma jento ajongle ngokya kue ngün ang kopüi.

²⁷ Ikhato ku hwom füi tomle ngoüi; ku a hwom Zang ang ngoüi ilaxle hwom a ku khünaknu ang ngoüi.

²⁸ Chemtue kue jento ajongle ngo angkya hanpakma hwom khato kue ku Zangshwom-Hom ajongle changüihex, ipongma chaxwannu noke ku a Jowanpa changpu ilaxle Israel nok a kue zünle kopkya ku khünaknu changpule awan ang kopüi.”