EZEKEL 34 - OTSAO BAIBEL (BSI)

Israel Nok Chun-nyetmixbu

¹ Jowanpae ku füi zangwün.

² Chixe ku ang thüi: “Ziün angkya khünak, Israel nok pünpa-chongwangbu tha ajaokox. Hwom hanpakma aje-kox, ilaxle Jowanpa Khüthak Zang-e, kue hwom füi akaxse kax ija hwom füi akaxle changkox: Hünzom Israel nok chunnyetmixbu, hünzom a maxdaoa! Hünzome hünzom mo wünle ikoxle chemtuechu chunbu paktikle münchang.

³ Hünzome tsomtibu lingle, müimun nyibu awunle, ilaxle chun sümüimüi langlaxle ija omüi saxle. Ikoxle otuechu hünzome chunbu paktikle münchang.

⁴ Hünzome shonaile changkyabu to humekya chitüi, kakle ngokya ang okak amüile chikox, thomzün maklax le changkyabu to lop-zingle chikox, samle ngokyabu lomle chiapüi, chichangba maxkya lom ang chipao. Itülüi thüikox hünzome ibu to zongzong ma laxle mok.

⁵ Chunbu ang chunnyetpa chitüikya khoma, hwom chiakle sam, ikoxle faomüibue ibu langle sax.

⁶ Ikhoma ku chunbu a haxnukhobu to samle aham. Hwom a chaxwan thünthün awangle chiakle pao, ikoxle hwom lomle atakkya mix owachu chitüi.

⁷ “Athaxpi, hünzom chunnyetmixbu, kue hünzom füi akaxle ngokya kax to apahüi.

⁸ Ku chemle khochisamkya ozün ma ngokya Zang hex, ija ningle hünzome ku kax to apakoxle müiüi. Chunnyetmix chitüikya khoma ku chunbu to faomüibue shingle lang ilaxle ibu sax. Ku chunnyetmixbue chunbu lomle atak ang chiazong. Hwome chun pak chitik homtoxle mapakpak tikle ngo.

⁹ Ikhoma hünzom chunnyetmixbue ku kax to apahüi.

¹⁰ Ku, Jowanpa Khüthak Zang-e ngaipu, ku a hünzom zongto zanpa changle. Kue hünzom chak angkya ku chunbu paoüi ilaxle otuechu hünzom ang ibu nye ang müntom; kue hünzom ang mapakpak tikle ngo ang otuechu müntom. Kue hünzom chak tokya ku chunbu kho sünle kopüi ilaxle hünzom ang ibu sax ang müntomüi.

Amüikya Chunnyetpa

¹¹ “Ku, Jowanpa Khüthak Zang-e hünzom ang thüipu, ku chunbu kue lomüi ilaxle kue akox-akomle thomüi.

¹² Chunnyetmixbue samle ngokya hwom chunbu tamchatle lomle apüilaxle apu-achangle humekya ningle hwom to kue huüi. Thama apongkya ja zangnak fangto samle tüikya pangkha tokya wüi kue lomle apüiüi.

¹³ Kue ibu a mixnok chaxwan tokya apüile changüi, athüt-athütlaxle hwom chaxwan to tamchatle apüiüi. Kue tamchatle hwom a Israel haxtok angkya haxnubu hia shuasabu to mongmüi tungtung le fumtsüt ang danle azui ahamüi.

¹⁴ Kue hwom ang Israel haxtok angkya haxhua hia haxsha ojong khato fum chuile tüipuix ibu khato ojao za-zyenkya chitüile tsüt ang tomüi.

¹⁵ Ku chunbu chunnyetpa ang ku jao changüi, ilaxle kue hwom ang nazak angkya onui atakle koxüi. Ija kax Jowanpa Khüthak Zang, kue akaxdaoa.

¹⁶ “Max-sam le changkyabu kue lomüi, lomsam le ngokyabu kue lomle apüiüi, thomzün maklax le changkyabu to kue lop-zingle hu-meüi, ilaxle okak-olak füikyabu kak amüile koxüi; ikoxle haxnut-zangfex le hia tsak-zongle tüikyabu a kue amütüi, chemthüikoxle ku a chem supuix ija mokkyabu chunnyetpa changpu.

¹⁷ “Idaile ku chunzyembu, athax ku, Jowanpa Khüthak Zang-e hünzom ang thüipu, kue hünzom chimüikya hia müikya süile danüi, chun hia zwon süile danüi.

¹⁸ Hünzom züizüi a ipong müikya fumchui saxlaxle ngaxchu mongzom chimüikya tüile; hünzome chisax tsuakkyabu to ngaxchu hünzome tingle ama toxle! Hünzome tsaothakya ti linglaxle chibakle toxkyabu a hünzome lüixle akhüi toxle

¹⁹ Ikhoma ku chun mamabue hünzome nakle ama toxdaokya fum tsüt angkya lya tamchu hünzome akhüile toxdaokya tikhüi ling angkya lai.

²⁰ “Ikhoma athax ku, Jowanpa Khüthak Zang-e hünzom ang thüipu, kue hünzom tsak-zongle tüikya hia shonai le tüikya nyi bama kaxfün laxüi.

²¹ Hünzome okak-olak füikyabu othom kha angkya apaolaxle sanpat to sam ang tompu.

²² Ikoxlechu kue ku chunbu kho awale kopüi ilaxle tamchatle owaechu hwom to chisumüile hwon ang müntom. Kue ku chunbu pangwüi to huüi ilaxle müikyabu füi chimüikyabu ajanle changüi.

²³ Kue hwom ang ku dapa Dawid lailaikya wanghom tuita hwom chunnyetpa ang koxüi, ilaxle chixe hwom to humele changüi.

²⁴ Jowanpa Khüthak Zang, ku a hwom Zang ang ngoüi, ilaxle ku dapa Dawid lailaikya wanghompa a hwom to apün-awangkya mix ang ngoüi. Ija kax kue akaxdaoa.

²⁵ Kue hwom füi tumüi-lomkhaole ngo angkya tsaotsütkya tüiüi. Ija haxtok ma tüikya müima-nyaxshixbu pangwüi max ang tomüi, ile changkox tix wüi ku chunbu wunsa khato tamchu faonu mongto chaza angkya chemchu chitüile jip-pom ang thoüi.

²⁶ “Kue hwom to mohimanüi ilaxle ku otsao haxnu akhople ngo ang tomüi. Ikhato hwome ti lom pongma ti koxle kue hwom to mohimanüi.

²⁷ Pünbue pünziak ziaküi, haxtoke saxziak puamün koxüi, ijaningle noknusa wüi ma haxtok ma za-zyen angkya chemchu chitüile ngo ang kopüi. Chemtue kue hwom to owawae da ang achangle khale thomkya janbüibu kalaxle danle changüihex, ipongma hwome ku a Jowanpa changpule tsing ang kopüi.

²⁸ Songsari noke athaxpi otuechu hwom thomjole münchangüi, ilaxle faomüibue otuechu hwom langle saxkya kha müntüiüi. Hwom a owaechu hwom to aza-ana angkya chitüile tumüi-lomkhaole ngoüi.

²⁹ Kue hwom ang haxzao füikya haxtokbu koxle hwom otuechu wok anole ngo ang müntom. Otuechu mixnokbue hwom ahuxle tswonle münpaoüi.

³⁰ Israel nok a ku khünaknu changle ilaxle kue hwom ziakople thomle le noknusae awan ang kopüi. Ija kax ku, Jowanpa Khüthak Zang-e akaxdaoa.

³¹ “Hünzom ku chunbu, kue tsomle thomkya müizyem, hünzom a ku khünaknu changle ilaxle ku a hünzom Zang changpu”, le Jowanpa Khüthak Zang-e akaxdaoa.