EZEKEL 33 - OTSAO BAIBEL (BSI)

Zang-e Ezekel a Hu-mix ang Kam

¹ Jowanpae ku füi zangwün.

² Chixe thüi: “Ziün angkya khünak, haxtok tuita hato kue ochax-ozan ahüi pongma chemle changpuix, ija bama nang khünakbu hama wünkox. Ija onok tokya khünakbue hwomkha angkya to hu-mix ang kam.

³ Chemtue chixe zanpabu hüile ngokya ngünle laxpuix, noknusa mik-hing naka angkya hanpakma tinglyet.

⁴ Ija tinglyetkya zing atatle chang füima owawae mik-hingle chingo, zannokbu nguilaxle chix lang, ile jangchang thüikoxle chix mik maxkya bama chix thaikya ang laxüi.

⁵ Chix mik maxkya a chix wüi thaipu, chemthüikoxle kaxkhün koxkya to chixe ojao na chinwon. Chixe na nwonle chang koxba, chix a azangse.

⁶ Ikoxle humixe zanbu nguile ngokya ngün ikoxchu chixe tinglyetle chichang, zannokbu nguilaxle ibu ochax khünakbu langüi, ikoxle ibu mik maxkya bama kue hu-mix ma feüi.

⁷ “Ziün angkya khünak, athax kue nang a Israel nok hanpakma hu-mix ang zingpu. Kue fakya kaxkhün nange hwom hato taile kox angkya changpu.

⁸ Kue ochax khünak tuita mik max angkya changle le tsing ang tom ikoxle chix khang azang angkya hanpakma chixe ija lomtang dantox angkya bama nange chix ang kaxkhün koxle chichang, chix a ochax khünak tuita le ziüi, ikoxle ija chix mik maxkya bama kue nang ma feüi.

⁹ Nange ija ochax khünak ang kaxkhün kox ikoxlechu chixe chix lomtang danle chitox, chix a ziüi, ikoxle nang khang a azangüi.”

Mixhuak Hünlit

¹⁰ Jowanpae ku füi zangwünle thüi: “Ziün angkya khünak, Israel nok hama, hwome akaxle ngokya kax ija noxle akaxkox: ‘Kwom to kwom ochax hia thaikya mwot, ibu hüne müimamale lixle. Kwom a na-jua le maxle. Kwom ozün ma chemle ngothoüi?’

¹¹ Hwom hama, ku a mongao chitüikya ozün ma ngokya Jowanpa Khüthak Zang changpu, ochax khünakbu max-samkya to ku mong münmüi. Itülüi kue hwom a, ochax mwotbu dantoxlaxle ozün ma ngokya ngünse tsule. Israel nok, hünzome mokle hüikya ma ochax mwot zakün. Hünzom zise büthüikoxle tsupu?

¹² “Athax, ziün angkya khünak, ochax khünak owawae müikya mwot mokle changkoxchu, chix mwotmüi mokkyae chix khosünüi münchang. Chichangchizangkya khünak tuitae chix ochax mwot zakle jangchang, chix to sikangün angkya müntüi, ikoxle müikya khünak tuitae ochax mwot mok ang sütle jangchang, chix to sikchiangün homle müntox.

¹³ Kue müikya mix owawa füi khüzün kox angkya akax, ikoxlechu chix mongto, ledaokya ma chix müile hüikya wüi okhonguidaoa le thüt ilaxle ochax lyen ang sütle jangchang, ami chixe mokle hüidaokya mwotmüi kue texle atak angkya münchang. Chix a chix ochax khoma max angkya wüi changpu.

¹⁴ Kue ochax khünak owawa ang chix zikmüt mangkho bama kaxkhün koxle changüi, ipongma chixe ochax lyenkya zak laxle sukya hia müikya mwot mokle jangchang:

¹⁵ namthütba, chixe thashe mün ma laxle thomkya tui achatle kox chichangba chixe ahuxkya tui achatle kox: chixe ochax lyenkya zak ilaxle khüzün atak angkya wanlombu to le jangchang, chix a münziüi, ikoxle ozün ma ngoüi.

¹⁶ Chixe mokkya ochax kue thailak tüiüi, ilaxle chixe sukya hia müikya mwot mokle changkya khoma chix a ozün ma ngoüi.

¹⁷ “Kue mokkya mwot a sukya münchangle hünzome akaxle! Hwom ahamkya lomtang mix sukya münchang.

¹⁸ Sukya khünak owawae müikya mwot dantoxlaxle chichang-chizangkya mwot mok ang sütle jangchang, ija khoma chix mik max angkya ataküi.

¹⁹ Chemtue ochax khünak owawae ochax lyenle ngokya zak laxle sukya hia müikya mwot mokle changpuix, chixe chix kho sündaoa.

²⁰ Ikoxle Israel, kue mokkya mwot a sukya münchangle hünzome thüile. Kue hünzom to hünzom mwot füifüile kaxfün fa angkya changle.”

Jerusalem Nguak angkya bama Kaxho

²¹ Kwom zanda ang kople paokya füima zanglao 12 lükya to lyetnukua bün ma nyix aga to, Jerusalem angkya azangle paokya owawae ku hama Jerusalem a nguakdaoa le wün.

²² Chix nguiüi thoja, kue Jowanpa tsak-zonge ku to pokya awan ang kop. Ofüinop chemtue ija mixsün nguile hüipuix, Jowanpa ku ang zangwün angkya zong chatle kox.

Khünaknu Ochaxbu

²³ Jowanpae ku füi zangwün.

²⁴ Chixe thüi: “Ziün angkya khünak, Israel nok ma pünle amadaokya tingnubu ma ngokya khünakbue thüile: ‘Abraham a khünak tuita wüi changkya, ikoxle chix ang ibibi haxtok komkaile koxpu. Kem a khünak ibibile tüipu, idaile haxtok a kem kux changpu.’

²⁵ “Ku, Jowanpa Khüthak Zang-e akaxkya ija kax hwom hama wünkox: Hünzome müi a ija ma aji tüikya füi afomle saxtüi. Hünzome chapabu to shwomtüi. Hünzom mix mik amütüi. Jangchangba ija haxtok a hünzom kux changpule hünzom mongto chem makhange ajangle laxlaxpu?

²⁶ Hünzome hünzom changlobu to mongong thompu. Hünzom mwotbu a nushix dongkyabu. Noknusae wüi chinunchakkaile changtüi. Hünzome chem makhange haxtok a hünzom kux changpule ajanglaxpu?

²⁷ “Ku chemle khochisamle ozün ma ngokya Jowanpa Khüthak Zang hex, ija ningle pünle amadaokya tingnubu ma ngole tüikya khünakbu a khochisamle mik max ang tom angkya changpu lekya ku kaxkhün hwom ang fakox. Tingnu tokna to tüikyabu a faomüibue saxüi. Haxnukho hia longkunbu to azwonle ngokyabu a okak-olak ma ziüi.

²⁸ Kue onok a khünak chingole awütkya haxtok ang achangüi, ilaxle hwom mongngam ang laxle ngokya tsak-zong a oshuk ang achangüi. Israel haxnubu a owachu mata-anyi le ang chithokya shonak-lingnu ang achangüi.

²⁹ Chemtue kue hwom ochaxbu khoma khünaknu to sikangünle tamchu chaxwan a chilaxle haxtok ang awütle changüihex, izuma hwome ku a Jowanpa changpule awan ang kopüi.”

Ajepa Kax Kotok to Ngaikya

³⁰ Jowanpae akax: “Ziün angkya khünak, hünzom khünakbu chemtue tingnu long katuk zui ma asoxpuix chichangba hwom zünhua fülombu ma asoxpuix, hwome nang momo wüi wünle. Hwome tata füi, ‘Athaxpongma Jowanpa tokhange chemtsai chemkax hüile ngotüipuix apa ang paohax,’ le zangwünle.

³¹ Ikhoma nang zangwün to apa ang ku khünakbu asoxle, ikoxle nange hwom ang moklax-ole akaxkya mwot hwome münmok. Hwom tunpün makhange mongkünkaikya zangwünbu laile, ikoxlechu chizakle hwom nüfux lomnu ma wüi ahamle ngole.

³² Hwom zongto nang a tuita mix mong amüi ang tsailwom ngaole hia thuaput waxmaibu angaole ngokya khünak tuita zazale changle. Hwome nang zangwün pangnusa to apale ikoxle ikha angkya kaxfa tuita kax ma münlax.

³³ Ikoxle chemtue nang zangwünbu komkaile changle ngaipuix: ibu pangwüi changle ngaiüi jaojao: imatix hwom khama ajepa tuita tüikya changdaongüna le hwom awanle laxüi.”