EZEKEL 32 - OTSAO BAIBEL (BSI)

Ijip Nok Wanghompa a Nomwang füi Apyen

¹ Kwom zanda ang kople paokya füima zanglao 12 lükya lyetjang 12 ma pongwang lükya nyixkha Jowanpae ku füi zangwün.

² Chixe thüi: “Ziün angkya khünak, Ijip nok wanghompa hato ija kaxkhün laxkox. Chix ang ija ku kaxho laxkox: Chaxwannu onok khama nang a mailang pa ningle aho, ikoxle nang a ti khato okua sakle ahamkya nomwang wüi ale le. Nange nang chabu füi ti aküi ilaxle shuajenbu chitsaokya ang achang.

³ Chemtue jat-libu athütpuix, kue nang a ku sha ma amanüi, ilaxle hwom ang ija sha kakax to bele alai ang tomüi.

⁴ Kue nang a haxza to tswonle awütüi ilaxle ija nang mang sax ang zangfang angkya o-jux hia faomüi komle sele asoxüi.

⁵ Kue haxhua hia haxbang pangnu shanle ngokya nang mange awang ang tomüi.

⁶ Haxhua pangnu khato chiak ilaxle shuasa jen pangwüi awangle machang machangle kue nang aji thokle ajenüi.

⁷ Chemtue kue nang thomjole changüihex, kue zangding to chwopüi ilaxle lyettsibu fwotle awütüi. Zanghan a zangfwom khung to ngoüi, ilaxle lyetnue wünnyan chifaüi.

⁸ Kue zangkho tokya zangngai pangwüi amütüi ilaxle nang chaxwannu a zangnak fangto tswonle awütüi. Ija kax, ku, Jowanpa Khüthak Zang-e akaxdaoa.

⁹ “Nange ma atatkya nok to lünle kue nang thomjole changkya kaxho apukkya zuma chaxwannu nok mongto kakle changüi.

¹⁰ Kue nang to chakmokkya zinge chaxwannu onokbu to sile aloxüi. Chemtue ija ku kax atatle laxpuix, nang thoto wanghombu ang khomtsile changüi. Nang nguakle paokya nyix, ma po ma apütle ajang laxle hwom pangwüi ma tsün-tsün bama zale abanüi.”

¹¹ Jowanpa Khüthak Zang-e Ijip nok wanghompa füi akaxle: “Nang a Babilon nok wanghompa changlo füi apongüi.

¹² Tüle shix-male tüikya nok süpahibue hwom changlobu syet laxle nang khünakbu pangwüi langle awüt angkya kue tomüi. Nang khünaknu hia chempang füi nang mongngamle ngokya hex, ibu pangwüi kue max ang tomüi.

¹³ Tilua pangkhato wüi kue nang müibu langle chang ang tomüi. Ifüima ti akhüile ama angkya hanpakma khünak hia müi chemchu chitüile changüi.

¹⁴ Kue nang tibu dang ang tamchu tsaothale chang üntoxle dangjale jen ang tomüi. Ija kax, ku, Jowanpa Khüthak Zang-e akaxdaoa.

¹⁵ Chemtue kue Ijip nok a awütkya haxtok ang achang tamchu ikhama ngole tüikya khünakbu mik max ang tomle changüihex, hwome ku a Jowanpa changpule awan ang kopüi.

¹⁶ Ija kaxkhün a mangsop tsai ang achangüi. Ijip hia ima tüikya khünaknu mangsop tsai ang chaxwannu nok angkya shekobue ija ngaoüi. Ija kax, ku, Jowanpa Khüthak Zang-e akaxdaoa.”

Ama Lumting

¹⁷ Kwom zanda ang kople paokya füima zanglao 12 lükya pongwang lyetnu ma nyix 15 to Jowanpae ku füi akax.

¹⁸ Chixe thüi: “Ziün angkya khünak, Ijip nok angkya khünaknu mang soplax. Mama tsak-zongle tüikya onokbu füi tomle hwom a amalum to ajokox.

¹⁹ Hwom füi akaxkox: “Pangnusa füi hünzom wüi osün sümüikya changpule hünzome thütpia? Hünzom a amalum pan kaile juüi ilaxle ikhato Zang chitsingkya khünakbu füi tomle ngoüi.

²⁰ “Ijip angkya khünaknu a zan ma maxkya khünakbu füi tomle dütüi. Hwom mik amüt angkya hanpakma changlo tuita achwonle thomle.

²¹ Naomüi tüichong hwome tamchu Ijip nok chikao ma sele azankyabu thome amalumting to Ijip nok wünpwonle pongkople. ‘Zang chitsingkyabu opang zan ma maxpuix ibu ikhato nguipu, ilaxle hwom ikhato shuile ngopu!’ le hwom akhong.

²² “She süpahibu zuktinge akhopkhakle Asiria a ikhato tüile. Hwom pangwüi zan ma maxkyabu

²³ ilaxle hwom zuktingbu a amalumting süzukya kha ma tüile. She süpahibu pangwüi zan ma maxkyabu changle, ilaxle hwom zuktinge she akhopkhakle tüile. Ikoxlechu noxta a hwome ozün ma ngokya chaxwan azale thomkya.

²⁴ “She süpahibu zuktinge akhop laxle Elam a ikhato tüile. Hwom pangwüi zan ma langkyabu changle, ilaxle amalumting to hwom a khwonzüt zom chizing homtoxle ju. Ozün ma ngole tüipongma hwome khünaknu khomtsile ngo ang tom, ikoxle athax hwom a omang ang chingcha angkya chitüile ngopu.

²⁵ Elam a zan ma maxkyabu tham to shuile ngole, ilaxle she süpahibu zukting a she akhopkhakle tüile. Ibu a pangwüi khwonzüt zom chizingkyabu, ilaxle zan ma amütkyabu. Ozün ma tüipongma hwome khünaknu khom-atsikle thom, ikoxle athax hwom a omang ang tamchu chichang chitüile, zan ma maxkyabu shoma tomhanle laxle ngopu.

²⁶ “Meshek hia Tubal hwomchu ikhato tüile. Hwom süpahibu zukting hwom akhopkhakle tüile. Hwom pangwüi khwonzüt zom mazingkyabu tamchu zan ma maxkyabu changle. Tam a hwome ozün ma ngole tüikyabu azale thomkya.

²⁷ Amipongkya naomüibu opang akhyep-adi laxle ma changlobu ma ngom ate ilaxle dibue tsangtsa to chwoplaxle amalumting to kapuix, ibu ningle hwom ang achuak-achenle thomkya zukting chifa. Onox ma naomüi ibu a ozün ma tüikyabu azale thomtang tsak-zong füi tüikya.

²⁸ “Ija ningle Ijip nok a khwonzüt zom chizingkyabu zan ma maxkyabu khato zutle akhix thom angkya changle.

²⁹ “She wanghom hia pünpa-chongwang, ibu füi Edom noke chuwüi ikhato tüile. Hwom a tsak-zong füikya süpahibu changkya, ikoxle athax hwom a khwonzüt zom chizingkya hia zan ma maxkya khünakbu khato amalumting to shuile ngole.

³⁰ “Shuakuxchi tokya wanghombu pangwüi ikhato tüile, ilaxle Sidon nokbu chuwüi tüile. Noxta a hwom tsak-zong thoto khünaknu khomtsile tüikya, ikoxle athax a zan ma maxkyabu füi tomle chingcha aho angkya mix owa chitüile ngo ang amalum to nguile ilaxle khwonzüt zom chizingkyabu ningle nazak lax ang shuile ngole.

³¹ “Zan ma maxkya khünak ibu ngünkya a Ijip nok wanghompa hia chix khünakbu hanpakma tuita mongsom ang changüi”, le Jowanpa Khüthak Zang-e akaxdaoa.

³² “Kue Ijip nok wanghompa ang ozün ma ngole tüikyabu aza ang tompu, ikoxlechu chix tamchu chix süpahibu mik amütüi ilaxle khwonzüt zom chizingkya zan ma maxkya süpahibu füi tomle shuile ngo ang tomüi. Hwome amalumting to lekyabu shoma pangwüi tomhanle laxüi.” Ija ka Jowanpa Khüthak Zang-e, kue akaxdaoa.