EZEKEL 30 - OTSAO BAIBEL (BSI)

Jowanpa e Ijip Nok to Zothupüi

¹ Jowanpae tamchatle ku füi zangwün.

² Chixe thüi: “Ziün angkya khünak, ku, Jowanpa Khüthak Zang-e chempang akaxle ngopuix, ibu aje-kox ilaxle tsing ang tomkox. Nange zangwün ibu khuapu angkya changpu: Tuita thama hanpak hüile ngole!

³ Jowanpae mwot mok angkya ija nyix a soxle hüile, Jatlibue zangfwom hia thamabu apong angkya nyix a.

⁴ Ijip haxtok ma achax-azankya tüiüi Ilaxle Etheopia nok ma chongkya thama tüiüi. Ijip nok ma khünak huanuma langüi; Onok a thuple atsunüi Ilaxle pünle ama toxüi.

⁵ “Ija zanhok ma Etheopia nok Libia, Lidia, Arabia, Kub tokya shakle apüikya süpahibu tamchu ku khünaknu kha angkyabu chuwüi langüi.”

⁶ Jowanpae thüi: “Shuakuxchi Migdol makhange shuathongchi Aswan alople, Ijip nok ziakople zanhu ngokyabu a pangwüi ija zanhok ma langüi. Ija kax, Jowanpa Khüthak Zang-e, kue akaxdaoa.

⁷ Zangfang ma awütkya onok ang ija haxtok ngoüi, ilaxle ija angkya tingnubu a komkaile amale toxüi.

⁸ Chemtue kue Ijip nok to wün langle tamchu she ziakople ngokyabu langle changüihex, izuma hwome ku a Jowanpa changpule tsing ang kopüi.

⁹ “Chemtue ija nyix nguile hüilaxle Ijip nok amütle changüihex, kue cha-ao-mongsaokya chitüile ngokya Etheopia nok khünaknu mong azwot ang kue kaxhomixbu ahüiüi ilaxle hwom chabüt-lasünle chang ang tomüi. Ija nyix hüile ngole!”

¹⁰ Jowanpa Khüthak Zang-e thüile: “Ijip nok tuina olithu ang tom angkya hanpakma kue Babilon nok wanghompa Nebukadnezar twonüi.

¹¹ Chix tamchu chingchajaja chitüikya chix süpahibu ija haxtok amüt tox ang nguiüi. Hwome changlobu füi Ijip nok to singüi, ilaxle mangbu a chaxwantok awangle dantoxüi.

¹² Kue Nail shuanu azopüi ilaxle Ijip a ochax khünakbu janzüi chak to koxle toxüi. Mixnokbue ija haxtok thomjole tox angkya kax, ku, Jowanpa Khüthak Zang-e akaxdaoa.”

¹³ Jowanpa Khüthak Zang-e thüile: “Memfi angkya chapabu hia baozangbu kue amütüi. Ijip nok ma apün-awang angkya mix owachu müntüiüi, ilaxle kue khünaknu pangwüi chabüt-lasünle chang ang tomüi.

¹⁴ Kue shuathong nok Ijip awütkya haxtok ang achangüi ilaxle shuakuxchi Zoün tingnu kue wün langüi. Kue pongwün tingnu Thebe to zothupüi.

¹⁵ Ijip nok ma achongkya zanhunui Pelusiam tingnu to ku mongtsike pokya awan ang tomüi. Thebe tingnu angkya tuina pangwüi kue amütüi.

¹⁶ Kue Ijip nok to wün langüi, ilaxle Pelusiam a khosam ashukle ngoüi. Thebe tingnu katukbu atsunüi, ilaxle tingnu ma tinu-mualyem le chang ang tomüi.

¹⁷ Heliopolis hia Bubastis tingnu angkya naosünbu a zanhok ma maxüi, ilaxle khünak mamabu a zanda ang koplaxle paoüi.

¹⁸ Chemtue kue Ijip nok tsak-zong thuple akhixlaxle hwom mongngamle tüikya janzüi olithule changüihex, ipongma Tahpanhes hato zangnaknu hüiüi. Ijip nok a zangfwome awangle changüi, ilaxle she tingnubu ma tüikya khünaknu a zanda ang koplaxle paoüi.

¹⁹ Kue ile Ijip nok to zothuple changpongma, hwome ku a Jowanpa changpule awan ang kopüi.”

Ijip Nok Wanghompa Tsakzong Thuple Amakya

²⁰ Kwom zanda ang kople paokya füima zanglao 11 lükya pongwang angkya lyetnu anüt nyix kha, Jowanpae ku füi zangwün.

²¹ Chixe thüi: “Ziün angkya khünak, Ijip nok wanghompa chak to kue apakdaoa. Tamchatle changlo twon ang tsuakle ija müi angkya hanpakmale owaechu ija to kop-zingle hia zu füi awüile münkox.

²² Athax, ija a, Jowanpa Khüthak Zang, ku kax changpu: Ku a Ijip nok wanghompa zanpa changpu. Kue chix chak to monyi wüi apaküi: müile ngokya hia pakle ngoünkya pangnyi wüi a: ilaxle chix chak angkya changlo adütüi.

²³ Kue Ijip nok a zangfang pangnu khato chiakle asamüi.

²⁴ Ifüima kue Babilon nok wanghompa chak to tsak-zongle chang ang tomüi ilaxle ku changlobu a chix chak ma atwonüi. Ikoxle Ijip nok wanghompa chak to kue apaküi, ilaxle chix a awaole wotlaxle chix zanpa tunthoma zile paoüi.

²⁵ Changle, kue chix a shonai le chang ang tomüi ikoxle Babilon nok wanghompa tsak-zongle chang ang tomüi. Chemtue kue chix ang koxkya ku changlo füi chixe Ijip nok chito hile changüihex, ipongma pangnusae ku a Jowanpa changpule awan ang kopüi.

²⁶ Kue Ijip nok a zangfang pangnu khato chiakle asamüi. Izuma hwome ku a Jowanpa changpule awanle laxüi.”