EZEKEL 29 - OTSAO BAIBEL (BSI)

Ijip Nok Zongto Ajekya

¹ Hwom zanda ang kople paokya füima zanglao 10 lükya to lyetjang 10 ma nyix 12 to Jowanpae ku füi akax.

² Chixe thüi: “Ziün angkya khünak, Ijip nok wanghompa ang kaxma thüikox. Chix to tamchu Ijip haxtok pangnusa to kue chemle sikngün apong ang tom angkya hex, ija akaxle laxkox.

³ Ija a Ijip nok wanghompa füi Jowanpae akaxkya kax changle le thüikox: Nang a shuanu khato jiple ngokya tüle za-adünkya nomwang, ku a nang zanpa changle. Nail shuanu ang nange zingkya. Nangkux changpule nange thüitüi.

⁴ Kue nang kax za ma jankuix awünüi ilaxle nang ma nang shuanu angkya nyaxbu amanüi. Ifüima nyax wüi awangle kue nang a Nail shuanu kha tokya bele alaiüi.

⁵ Kue nang tamchu nyax ibu pangwüi sak-hax to tswonle awütüi. Nang tompo a haxkozan to owaechu chiakhün le dantoxüi. Kue ija a fao obu hia fao müibu süt ang koxüi.

⁶ Ifüima Ijip angkya khünak noknusae ku a Jowanpa changpule awan ang kopüi.” Jowanpae thüi: “Hwom to fongtsoxle chang angkya hanpakma Israel noke Ijip nok, hünzom to ongle ngo, ikoxle nang a muakya kiathox tukux ngaxchu chitüi.

⁷ Hwome nang ma ate le changpongma nang a pakle pao, hwom fakfang ma hukle kox, ilaxle hwom tokbu to züile akyet.

⁸ Athax, Jowanpa Khüthak Zang, kue akaxle ngopu, nang to sing angkya hanpakma ku ang changlo füikya süpahibu tüihule, ilaxle hwome nang khünakbu hia müibu langle awütüi.

⁹ Ijip a laxli chitüile awüt thomkya haxtok ang achangüi. Ifüima nange ku a Jowanpa changpule awanüi. “Chemthüikoxle Nail shuanu a nange zingkya nangkux changle le akaxdaoa.

¹⁰ Idaile ku a nang tamchu Nail shuanu zanpa changpu. Shuakuxchi Migdol tingnu makhange shuathongchi Aswan tingnu alople, Etheopia nok longzipong to leüi lomjang fole, kue Ijip nok abakle laxli chitüile awütle thomkya haxtok ang achangüi.

¹¹ Ikha akaile müi hia khünak chemchu münahamüi. Zanglao 40 hanpakma ikhama owachu münngoüi.

¹² Kue Ijip nok a zangfang ma pangnu to kaile chilaxli onui ang achangüi. Zanglao 40 hanpak ang Ijip nok a, mama tingnu amakyabu pangwüi to kaile amale thomkya nok ang ngoüi. Kue Ijip nok a pünpao khünakbu ang achangüi. Hwom a pangnok-jating to mix khünak füi athütle ngo ang paole samüi.”

¹³ Jowanpa Khüthak Zang thüile: “Zanglao 40 nguikya füima kue Ijip nok a, kue hwom chiakle asam thomkya onokbu tokya tamchatle apüiüi,

¹⁴ ilaxle kue hwom a shuathongchi Ijip haxtok ma ngo ang tomüi, ikha a owang tokhange hwom haxtok jao. Ikhato hwom a tsak-zong chitüikya wangting ang ngoüi.

¹⁵ Hwom wangting a wangting pangnu füi süshokya wangting changüi, ilaxle hwome chemtuechu mix wangtingbu thakma apün-awangle münchangtoxüi. Kue hwom a, otuechu mix wangting akwom ang chithokya, tuita e-ma chitüikya wangting ang achangüi.

¹⁶ Israel noke otuechu ibu to, hwom to asun-azule chang angkya bama mongongkya müntüitoxüi. Ijip nok shoma ngünlaxle, hwom to mongong thomle tüidaokya bama, hwom thaidaongün le awanle lax ang tomüi. Ifüima Israel noke ku a Jowanpa Khüthak Zang changle le awanle laxüi.”

Wanghompa Nebukadnezar-e Ijip Nok to Lütüi

¹⁷ Kwom zanda ang kople paokya zanglao 27 lükya pongwang angkya lyetnu owang nyix kha Jowanpae ku füi zangwün.

¹⁸ Chixe thüi: “Ziün angkya khünak, Babilon nok wanghompa Nebukadnezar-e Tair tingtak ang sütdaoa. Chixe chix süpahibu ang müimamakya hünlix ahünle changkya khoma hwom khang akole paole ilaxle hwom suaktobu a adi le paole, ikoxlechu wanghompa-echu tamchu süpahibue chu hwom sikngün khoma kopkya chemchu chitüi.

¹⁹ Ikhoma athax Jowanpa Khüthak Zang-e, kue akax ngokya a ija changle: Kue Ijip haxtok a wanghompa Nebukadnezar chak to koxdaoa. Chixe ija tsuiüi ilaxle ija pünle amatoxüi, ilaxle chix süpahibu hingchak mün ang kox ang Ijip nok tuina komkaile laxlaxtoxüi.

²⁰ Chix süpahibue ku mwot mokle changkya khoma, kue Ijip a chix ang ija otha ningle koxpu. Ija kax Jowanpa, kue akaxdaoa.

²¹ “Chemtue ija changle hüiüihex, kue Israel khünak tsak-zongle chang ang tomüi, ilaxle Ezekel, noknusae nang kax atat ang tsuakle chang angkya onui makhange nange akaxkox, izuma hwome, ku a Jowanpa changpule tikle laxüi.”