EZEKEL 26 - OTSAO BAIBEL (BSI)

Tair füi Alünle Ajekya

¹ Kwom zanda ang kople paokya füima zanglao 11 lükya…lyetjang pongwang nyix kha Jowanpae ku füi zangwün.

² Chixe thüi: “Ija a Tair tingnu angkya khünakbu mongmüikya ozing changle. Hwome akhong, ‘Jerusalem a amadaoa! She thalex janzüi samdaoa! Athax otuechu she a kem zan ang münchangtoxüi!’

³ “Athax ija a, ku, Jowanpa Khüthak Zang-e akax ngokya kax changle: Tair tingnu, Ku a hünzom zanpa changpu. Chaxwannu nokbu kue hünzom tingtak ang ahüiüi, ilaxle hwom a tinu-tichap lailaile nguiüi.

⁴ Hwome hünzom tingnu pan katukbu amaüi ilaxle zanhunuibu atsunle changüi. Ifüima kue haxkhix-labu pangwüi jeple awütüi ilaxle longtok zaza ang achangle dantoxüi.

⁵ Tair tingnu a tinu khato nyaxlwot mixbue shabu lomle azuakya nui ang laxüi. Ija kax, Jowanpa Khüthak Zang, kue akaxdaoa. Chaxwannu noke Tair a tingtakle amaüi.

⁶ Ilaxle she tingnu tingtan mongto ngole tüikya khünakbu a changlobu füi langüi. Ipongma Tair-e ku a Jowanpa changpule awan ang kopüi.”

⁷ Jowanpa Khüthak Zang-e thüi: “Kue pangnu thakma achongkya wanghom: Babilon nok wanghompa Nebukadnezar: hünzom tingtak ang apüiüi. Shuakuxchi tokhange, hax ma azankya, mankho makhange azankya hia man-kanlinkho tokhange azankya süpahibu huanuma koplaxle nguiüi.

⁸ Haxtok osungkha tokya tinglongbu ma ngole tüikya khünakbu a ija zanhok ma langle awütüi. Zan nokbue thap thole changüi, hax thokle lwonüi, nang zongto oshing mongkya long katukbue dibu füi tukkya ningle tukle thomüi.

⁹ Hwome pünthombu füi hünzom pan katukbu thuple atsunüi ilaxle jantombu füi hünzom zanhunuibu pünle amaüi.

¹⁰ Hwom manbue alaikya haxbu füi hünzom to chwople changüi. Ija pünle amadaokya tingnu akaile lepongma, maihu hia manbue linkya müili-zyen ozing hia manbu azingkyae hünzom katukbu si le aloxle changüi.

¹¹ Mankho ma azankya hwom süpahibu, hwom changlobu füi hünzom khünakbu langle, hünzom lomnu makhange zangchei-zangwat lailaile leüi. Tüle chongkya hünzom thongnubu a hax to awütle toxüi.

¹² Hünzom tuina hia hünzom thalex-juatai füi hwom chifün zingle laxüi. Hwome hünzom katukbu bele atsunüi ilaxle mongtex ma nguile tüikya hom-haxbu pünle amaüi. Long hia pün tamchu longkhix, ibu pangwüi hwome paolaxle tinu khato tswonle awütüi.

¹³ Hünzom tsai-lwom ngaokya hia thuaput-waxmai angaokya, ibu pangwüi kue oshuk ang achangle toxüi.

¹⁴ Nyaxlwot mixbue hwom shabu lomle azua angkya longtok boma chemchu chitoxle changüi. Ija tingnu a otuechu chatle münzingüi. Jowanpa Khüthak Zang, kue ija akaxdaoa.”

¹⁵ Jowanpa Khüthak Zang-e Tair tingnu füi akax angkya kax ija tüile: “Chemtue hünzom to tingtakle lütle changpuix, tinu kax ma ngole tüikya khünakbu a, ibu mix langlaxle akhongkyabu thoto abütle changüi.

¹⁶ Tinu kha tokya wanghombu pangwüi hwom ngwotnui angkya thaiüi. Hwome ma nyi-za, noksa apütle zingkya nyi, ibu pangwüi sikle awütüi ilaxle bünbünthax le hax to ngoüi. Ile nang chak jukya ngünlaxle abünkya hwom zak azak ang chithole changüi.

¹⁷ Hwome nang hanpakma mangsop tsai ile ngaoüi: Tüle zangle wünkya tingnu a amütdaoa! Tinu kha tokya she khuabu a pikle paodaoa. Ija tingnu angkya khünakbue tinu kha apün Ilaxle tinu kax to ngole tüikya khünakbu abüt ang tom.

¹⁸ Athax, ija nguakle changkya nyix, Shuazobu a zale abünle, Ilaxle ima tüikya khünaknu a ija thama-thomshix ngünlaxle abüt.”

¹⁹ Jowanpa Khüthak Zang-e thüile: “Kue nang a owachu ngo ang chimüile pünle amadaokya tingnu ningle achangüi. Kue nang to tinu jithong tokya tie ule chang ang tomüi.

²⁰ Kue nang a kaipongkya khünakbu füi tomle ngo angkya hanpakma nang a amalum pan akaile joüi. Tamchu chimüitox angkya hanpakma amale thomdaokya fangchi lwompu ting to ziünkya nok füi kue nang ngo ang tomüi. Ikhoma nang a ozün ma ngokya nok to tamchatle ating-anokle nang ngwotnui ang müntom.

²¹ Nang a kue khomtsikya wanwün tuita ang laxle twonüi, ilaxle ija a nang oshuk ang changüi. Khünaknue nang lomle changüi, ikoxle nang a otuechu chiataküi.” Ija kax, Jowanpa Khüthak Zang-e akaxdaoa.