EZEKEL 25 - OTSAO BAIBEL (BSI)

Amon zongto Alünle Ajekya

¹ Jowanpae ku füi akax.

² Chixe thüi: “Ziün angkya khünak, Amon nok ma kaxhux fe-koxle ajaokox.

³ Jowanpa Khüthak Zang, kue akaxkya kax ija o apale chang angkya hwom füi akaxkox: Ku Zangshwom-Hom akhule amakya ngünlaxle, Israel haxtok chilaxli ang awütle tüikya ngünlaxle, Judah angkya khünaknu zanda ang kople paokya ngünlaxle, ibu bama hünzom ang ngadongle.

⁴ Ile hünzom ang mongmüile changkya khoma, handün chitokya jat-libu apüilaxle kue hünzom tingtakle kop ang tomüi. Ibue hünzom haxtok ma hwom pombu zaile changüi ilaxle ikhato hwom hom-haxbu zaile ngo ang tomüi. Hünzome saxhaxkux pünziak hwome saxüi ilaxle hünzome linghaxkux tsomti hwome lingüi.

⁵ Kue Rabbah tingnu a manbu thomkya nui ang achangüi, ilaxle Amon haxtok pangwüi chunbu dankya nui ang achangüi, ikoxtix hünzome ku a Jowanpa wüi changpule awanle laxüi.

⁶ “Ija a Jowanpa Khüthak Zang kax changle: Hünzome chakbu akhaole mongmüi tungle fütle. Hünzome Israel haxtok thajao wünhaile chang ang tomle.

⁷ Hünzome ija ile mokkya khoma, kue hünzom a, hünzom kux-ka tsuile pao angkya hia amale tox angkya mixnokbu chak to koxüi. Hünzom a komkaile amütüi, ilaxle otuechu onok-oza le münngo chichangba hünzom haxtok hünzom kux ang münchangtox. Ifüima hünzome ku a Jowanpa wüi changpule awan ang kopüi.”

Moab Zongto Ajekya

⁸ Jowanpa Khüthak Zang-e thüile: “Moab-e Judah noke chuwüi mama mixnokbu lailaikya onok wüi changpu, le thüikya khoma,

⁹ Kue Moab akhople tüikya tingnu to sing ang tomüi, ikhama tingnu sümüikyabu: Beth Jeshimoth, Bal Meon, ilaxle Kiriathaim, ibu chuwüi womüi.

¹⁰ Kue handünchi sak-hax to ngole tüikya onokbu ang Moab füi tomle Amon nok to tingtak ang tomüi, ile Moab a jat-li tuita ang münngoüi.

¹¹ Kue Moab to zothuple changüi ilaxle hwome ku a Jowanpa wüi changpule awan ang kopüi.”

Edom Nok Zongto Ajekya

¹² Jowanpa Khüthak Zang-e thüile: “Edom noke Judah nok to mongtsik abakle olüix khom, ilaxle ija olüix khomkyae Edom nok a othuithuima thaile ngokya ang achang awüt.

¹³ Athax kue ngaipu, kue Edom nok to zothupüi ilaxle ikhato tüikya khünak hia müi pangwüi langüi. Kue ija haxtok a, Teman tingnu makhange Dedan tingnu alople chilaxli haxtok ang achangüi, ilaxle khünakbu a zanhok ma max ang tomüi.

¹⁴ Ku hanpak ang, ku khünaknu Israel noke Edom nok to jannong alüiüi, ilaxle hwome Edom nok ang tüle shixkya ku mongtsik awanle lax ang tomüi. Kue jannong alüikya thama chem hex, ija Edom noke awan ang kopüi.” Jowanpa Khüthak Zang-e ija akaxdaoa.

Filistia Nok Zongto Ajekya

¹⁵ Jowanpa Khüthak Zang-e thüile: “Hwom füi tsün-tsün to zannok ang ngole hüikyabu to Filistia noke mongtsik ashukle olüix khom ilaxle hwom miktsak-mongngwom füi ibu amütle changdaoa.

¹⁶ Ikhoma kue khuapule thüipu, kue Filistia nok tingtaküi ilaxle hwom tsaothale amütüi. Filistia Haxsha to ngole tüikya, ozün ma dantoxkya thom kue amütüi.

¹⁷ Kue hwom to oziamale jao zothupüi ilaxle okho anguile jannong alüiüi.”