EZEKEL 24 - OTSAO BAIBEL (BSI)

Shunle Paoünkya Fongmok Tik

¹ Kwom zanda ang paokya füima zanglao aku lükya to lyetjang bün angkya nyixbün to Jowanpae ku füi akax.

² Chixe thüi: “Ziün angkya khünak, anyixkya hanpak zale koplax, chemthüikoxle Babilon nok wanghompa Nebukadnezar Jerusalem tingtakle kop ang sütkya a ija nyix kha changle.

³ Kax ma chilaxle tüikya ku khünaknu hama, Jowanpa, Khüthak Zang, kue hwom hanpak ang thomkya ija kaxpan wünle laxkox: Tik a wün ma takox ilaxle ija ma ti awang kox.

⁴ Müi amüikya ima shokox— osuak hia ochakbu— ilaxlechu ozadwon sümüimüie ija awang kox.

⁵ Chun sümüimüi müi laxkox; tik fang ma ha athünkox. Ija ti to ang tomkox; müiza hia müihakbu lumkox.”

⁶ Ija a Jowanpa Khüthak Zang kax changle: “Mix mik amütkyabu tingnu a maxdaoa! Ija a shunle madaokya otuechu chiazaokya tik lailaile changle. Müifun tuita füima tuita le dokle alai, tuita chu danle chitox.

⁷ Tingnu ma mix mik amütkya tüikya, ikoxle aji a haxbue chwople khom ang müikya haxsha to chiadüt, ikoxle aji a longzan tok to adüt.

⁸ Ija pyen ang chimüikya onui ma, ija ngünlaxle mongtsik-mongma laile changkya li khama kue ajibu toxdaoa.”

⁹ Ija a Jowanpa Khüthak Zang-e akaxkya kax changpu: “Mix-mik amütkya nok tingnu a maxdaoa! Ku jaojao-e ha athün angkya changle.

¹⁰ Anaole wüi ha apüihüi! Wünle to jepkox! Müi songle amyet kox! Müiti Müizabu a zokle ashunkox!

¹¹ Athax wi tik ohua a wündix dingma dankox ilaxle ija khile kham ang tomkox. Ima tüikya tikmakbu zokle ashunkya füima ija tik a tamchatle otsao ang achangüi.

¹² Wünletikmak bakle shunle chipao tsuak koxlechu,

¹³ Jerusalem, nang mongzok mwot tokhange nang chitsaokya ang achangdaoa. Kue nang atsaole fang azong koxlechu, nang a chitsaokya ang wüi achangle ngo. Ku mongtsik janzüi zongbakle ma-apongba nang a tamchatle otsao ang münachang tsuak.

¹⁴ Ku, Jowanpae ija akaxdaoa. Ija mok angkya ku hato hanpak nguile hüidaoa. Kue nang ochaxbu naxchanglax le toxüi münchang, chichangba nang hato chingcha-jaja ahole changüichu münchang. Nange chem mokdaopuix, ija bama nang sikngün apong ang tom angkya wüi changle.” Ija Jowanpa Khüthak Zang-e akaxdaoa.

Ajepa Kakonu Zile Paokya

¹⁵ Jowanpae ku füi akaxle thüi:

¹⁶ “Ziün angkya khünak, chakthom tuita fang ma wüi nange mong sükünkya khünak kue paodao angkya changle. Nange ija bama kaxthup-ngaotünle chichangüi, chisopüi chichangba mikfi ti ajenle chichangüi.

¹⁷ Nang asutle sopkya atat ang taxtom. Nang mongma aho ang khang onglaxle chichangba cha hua ma ahamle taxchang. Nange khang akhole taxchang chichangba mangsop mixbue saxkya süt saxle taxchang.”

¹⁸ Swomsa ma ku khünaknu füi zangwünle ngokya. Ija hansong ma wüi ku kakonu zile pao, ilaxle ofüi nyix a ku hama akax daokya ningle mok.

¹⁹ Khünaknue ku ma atüi: “Nange ile büthüikoxle changpu?”

²⁰ Ikhoma kue hwom ang thüi: “Jowanpae ku füi zangwünle

²¹ Israel khünaknu hato ija kaxho fa angkya akaxle: Hünzom a Zangshwom-Hom tsak-zong bama mongngamle. Hünzome ija to huse tamchu ikhato nguisele tsule, ikoxle Jowanpae ija chitsaokya ang achang angkya changle. Hünzom homkha angkya khünak Jerusalem ma ngole tüikya füichi-naolibu a azankya ma zi ang tomüi.

²² Ifüima hünzome, kue chem tsuakdaopuix ija moküi. Hünzome thün to chwople chichangüi chichangba mangsop mixbue sopkya süt chisaxüi.

²³ Hünzom a khanghua ma chichangba cha hua ma chichangba mang sople chichangba awaole münngoüi. Hünzom ochaxbu khoma hünzom a azuk-atsyale paoüi, ilaxle hünzom a tata zongto wotüi.

²⁴ Ipongma ku a hünzom zongto tuita mowan ang changüi, kue tsuakdaokya pangwüi hünzome moküi. Jowanpae thüile, chemtue ija changüihex, hünzome chix a Jowanpa changpule awan ang kopüi.”

²⁵ Jowanpae thüile: “Athax, ziün angkya khünak, oja Zangshwom-Hom to hwom huse tamchu nguise tsu tamchu tsak-zong hia mongsom ang laxle ngotüipuix, ija a kue paoüi. Ilaxle kue hwom sasün hia sacha hwom chuwüi paoüi.

²⁶ Kue ile mokkya nyix, ija thama chak tokya azangle paokya züizüi nguilaxle hünzom hama ija bama wünüi.

²⁷ Ija nyix wüi, hünzome amütle thomdaokya zangwün hünzome tamchatle wün ang kopüi, ilaxle hünzome hwom füi zangwünle changüi. Ija ningle hünzom a khünaknu zongto tuita mowan ang changüi, ilaxle hwome ku a Jowanpa changpule awan ang kopüi.”