EZEKEL 19 - OTSAO BAIBEL (BSI)

Mongma Tsai Tuita

¹ Israel nok wangchasa anyi hanpakma ija mongma tsai ngao angkya Jowanpae ku füi akaxdaoa:

² Hüntatüi a mailang honu jaojaole tüikya! She-e sasün hwom za-adünkya mailangbu thamkha to atsün.

³ She-e hosa tuxle atsün ilaxle pongkak angkya anole kox; chixe khünakbu sax angkya awanle kop.

⁴ Chaxwannu noke chix bama ozing atat ilaxle chix a thap ma tsünle aman. Jankuix makhange hwome chix Ijip nok to linle apüi.

⁵ Owüi maxngachu le ngünkya kople she-e hule nyengo. She hanpak ang anaole she-e mama sasünbu atsün, ilaxle chix a za-adünkya mailangpa ang achangle tsong.

⁶ Chix pongkak sangle tsongkya füima, ilaxle chix a mailangbu zyem khato aham. Chixe chuwüi pongkak tsing ilaxle khünak sax ang awan.

⁷ Chixe hwom zanhu nuibu pünle tox, chixe tingnubu amale tox. Haxtok angkya khünaknu a abüt chixe ahunghungba a.

⁸ Chix füi azan ang onok-onok athüt; pangnu chitokhange khünaknu ngui. Hwome hwom nyabu pün ilaxle ija ma chix aman.

⁹ Hwome chix kun ma hak ilaxle Babilon nok wanghompa hato apüi. Hwome chix to nyele thom, ile chix ahungkya tamchatle Israel nok haxkhobu to atat ang chitom.

¹⁰ Hüntatüi a grep zunu ningle changkya, shuasa kax ma thwomkya pün tuita ningle a. Ti okhonguile tüikya khoma, ija pün a ochak hia oziak füi alule tüikya.

¹¹ Ija okangbu a tsakle tüikya ilaxle wanghom kiathoxbu ang laxkhongui le chong. Opünnu a zangfwombu to thule tsua; ija pün ochak wüi hingshe le tsuathale tsongkya noknusae ngün.

¹² Ikoxle mongtsik chak füi ija otsing makhange file lax ilaxle ija a haxkha to tswonle awüt. Handünchi zangwine ija oziak to jeple azan. Ija pünkangbu apakle akhai; hwome ija azan ilaxle zokle ashun.

¹³ Athax ija sak-hax to küi, zuazoxle ti ojao chitüikya haxtok ma a.

¹⁴ Ija pün ponu to wün pax; ija okang hia oziakbu zokle ashun. Ija pünkangbu tamchatle tsaküi münchang, ija otuechu wanghom kiathoxbu ang changüi münchang. Ija a mongma tsai tuita; ija tsai a chatwüi chatle ngaole hüidaoa.