EZEKEL 17 - OTSAO BAIBEL (BSI)

Lawang hia Grep Zu Nyi Kaxpan

¹ Jowanpae ku füi akax,

² “Ziün angkya khünak, Israel nok hama kaxpan tuita akaxle

³ Jowanpa Khüthak Zang, kue hwom füi akax ngokya ija kax awanle lax ang tomkox: Lawang chongkya tuita okui müi wüi müile tamchu ozang tüpong khaole pünle tüikya. Ija Lebanon Haxnukho to pi ilaxle sedar pünnu kho apak.

⁴ Chixe ija thalex nok to nwonle pao ilaxle hangjole chang angkya tingnu ma dan.

⁵ Ifüima chixe Israel haxtok angkya pündom tuita apüi ilaxle ija atsün angkya hanpakma jento ti tüile ngokya haxzao tüikya haxtok to ija küi,

⁶ Ija pün asokle nyem ilaxle pünsa ang tsongle grep zu fakfaklakle lai. Pünkangbu ola ngwotnui dingchi to tsongle dong, ilaxle otsingbu oka mongle zule ju. Ija ponu to okangsabu hia ochakbue chwople tüikya.

⁷ “Anaole chuwüi okui-ozang khaole hia omun tütle tüikya Ola-lanu mama tuita tüikya. Athax ami ija nyem pongkya tsawat khama tüikya füi onüi ti kopüile mongong üntoxle athaxpi chixe ma püntsing ija hato ajo ilaxle ochakbu chix hato ahüi.

⁸ Pün a ami wüi, pünchakbu huanuma alai ilaxle grep huanuma ziak ilaxle pünponu ang achangle tsong angkya hanpakma haxzao füikya haxtok ma küidaoa.

⁹ “Ikhoma, Jowanpa Khüthak Zang, kue atüipu: Ija pün ozün ma ngo ilaxle tsongle chang ang chami? Pongwang angkya ola-lanue ija otsing makhange file, grep punle tamchu ija pünkangbu apak ilaxle ija zi ang tomle münchang puixnyi? Ija fuak angkya hanpakma tüpong tsak-zongle tüikya onok janzüi laxngo angkya chichang.

¹⁰ Changle. Ija küidaoa, ikoxle ija ozün ma ngo ilaxle tsongle chang ang chami? Handünchi zangwine thupongma ija münzi puixnyi? Ija nyemle ngokya tamting ma wüi chix münzi puixnyi?”

Ija kaxpan Akhixle Kox

¹¹ Jowanpae ku füi akax,

¹² “Athax kople mongong matüikyabu ma hwome ija kaxpan hanpak awanchahex atüihu. Babilon nok wanghompa Jerusalem to nguilaxle wanghompa hia chix nguakax-wangkhobu koplaxle Babilon to chat angkya hwom hama apuakox.

¹³ Chixe wanghom homkha khünak tuita pao, ilaxle chix füi zangwün kaxfün tuita lax, ilaxle chix ang chix kax ma laxle ngo angkya tsao atsüt. Chixe okax-okhobu kopkya a

¹⁴ anaole ija jat-li ajong ang chikop angkya tamchu ija tsaotsüt chiamale thom ang tho angkya to hume angkya hanpakmale changkya.

¹⁵ Ikoxle Judah nok wanghom ija füi anongle ajong ilaxle süpahibu hia manbu huanuma apüi angkya hanpakma chixe Ijip nok to khünakbu akat. Chixe tholax angma? Ija füi chix azangle paotholax angma? Chixe ija tsaotsüt ama ang müntho ilaxle sikngün chiapong homtoxle azangle pao ang müntho!

¹⁶ “Ozün ma tüikya Jowanpa Khüthak Zang kue thüipu, ija wanghompa a Babilon nok to ziüi chemthüikoxle chix wanghom ang achangkya Babilon nok wanghompa füikya tsaotsüt chixe amadaoa.

¹⁷ Babilon nok wanghompa-e khünaknu lang angkya hanpakma hax lwonle tamchu tsaswot thole mwot mokkya abaxle chix füi azan ang tüle tsak-zongle tüikya Ijip nok wanghompa-e ngaxchu chix to fong ang münthoüi.

¹⁸ Chixe chix kaxtsao hia tsaotsüt amale changdaoa. Chixe ibu pangwüi mokle changdaoa, athax chix paole azang ang müntho.”

¹⁹ Jowanpa Khüthak Zang-e thüile: “Chemle ku ozün ma tüikya Zang changpuix ija ningle, chixe ku mün ma thomüihex-ole tsaosaxkya ija chix tsaotsüt amale changkya khoma kue chix to tütakoxlechu sikangün angkya wüi changle.

²⁰ Kue nya thaüi ilaxle ija ma chix man ang tomüi. Kue chix a Babilon nok to kople paoüi ilaxle ikhato kue chix to sikangünüi, chemthüikoxle chixe ku to mongong chithomle changdaoa.

²¹ Chix süpahi müikyabu zanhok ma langüi, ilaxle ozün ma dantoxkyabu a pangnu chito afale pao ang tomüi. Ifüima Jowanpa Khüthak Zang-e kue akaxkya kax ija nange tsingle laxüi.”

Monghom Tüi angkya Zang Kaxtsao

²² Ija a Jowanpa Khüthak Zang kax changle: “Kue tsuathale tüikya sedar pünkho laxüi ilaxle domngoxkya ochui fiüi; ilaxle ija haxkho tsuakya khato thwomüi,

²³ Israel nok haxnukho tsuakya khato a. Ija pünkangbu omua müile tsongüi tamchu oziak dünüi ilaxle tüpong chongkya sedar pünnu ang achangüi. O nüjen pangwüi ikhato ngoüi ilaxle ija zangkhung to hwom pomle changüi.

²⁴ Haxtok angkya pün pangwüie ku a Jowanpa changpule tikle laxüi. Tsuathakya pünnubu kue dak ilaxle pünsabu tsuale tsong ang tom. Pün ohingbu kue zile zan ang tom ilaxle pünzikbu ohing ang achang ang tom. Jowanpa kue ija akaxdaoa. Kue moküihex-ole akax daokya kue mok angkya changpu.”