EZEKEL 16 - OTSAO BAIBEL (BSI)

Jerusalem tuita Mongong Chitüikya

¹ Jowanpae anaolechu ku füi zangwün.

² Chixe thüi: “Ziün angkya Khünak, she-e mokdaokya nushix dongkya mwotbu Jerusalem hama kexle ahokox.

³ Jowanpa Khüthak Zang-e she füi akaxle ngokya ija kax Jerusalem hama wünkox: “Nang a Kanan haxtok ma puxkya. Hünzom hopa a Amor nok ilaxle honu a Hit nok. Le changkya.

⁴ Chemtue hünzom puxle changkya hex, owaechu hünzom jem chizüt ilaxle so-zingle chikox chichangba hünzom a hum füi sole chikox chichangba nyinam füi namle chipai.

⁵ Ibu tuita ngaxchu mokle fa ang nang to chingchale hukya mix owangaxchu chitüi. Chemtue nang puxpuix, nang to owaechu mongkünkya chitüi. Nang a kothofa to tswonle awüt.

⁶ “Ipongma ku emakhange le le asu ilaxle nang aji ma tomlomle wotlaxle ngün. Nang a ajie awangle tüikya, ikoxle ku nang zi ang chitom.

⁷ Kue nang a tuita owan müikya pün lailaile tsong ang tom. Nang tsak-zongle tamchu haxtsua-zangthale tsongle naocha tuita ang achang. Nang tsom-saxbu owan müile lai, nang kho owan müile lai, ikoxlechu nang a ohua ma tüikya.

⁸ “Anaole chu ku emakhange lekya zuma, nang a mongkün dong angkya hanpak nguile tsongdaoale kue ngün ang kop. Kue ohua ma ngokya nang tsawan to ku nyipongnu füi awunle kox ilaxle nang to mongkün angkya tsaosax. Changle, kue nang füi aju-asomkya tsaosax, ilaxle nang a ku kux ang achang.” Ija a Jowanpa Khüthak Zang-e chem akaxpuix ija changpu.

⁹ “Ifüima kue ti lax ilaxle nang angkya aji sole kox. Kue nang tsangtsa to olip münga füi pale kox.

¹⁰ Kue takle zingkya nyi füi nang to awunle kox ilaxle amüikya müikhwon chisox nang ang soxle kox, jaknyi füi akhang ma nguile kox, ilaxle chongzi takkya nyi füi awunle kox.

¹¹ Kue nang ma tu-thuakbu langle kox ilaxle likwünbu alikle kox.

¹² Kue nang ang bingbün nasax hia khüsün, ibu füi aza-apuale kox.

¹³ Nang ang hun hia khop janbu makhange zingkya tuiza-nakombu tüile ngo, ilaxle nang jento jakzi hia chongzibu füi takle zingkya nyi laxle ngo. Sümüikya an füi zingkya akhao nange sax, ilaxle nange sax ang nax-ti hia olip münga tüile ngo. Nang sün jo müikya nyanle-nyan, ilaxle nang a wangcha tuita ang achang.

¹⁴ Athukle müikya nangsün-nangjo khoma nang a pangnok-jating towüi zangle wünkya mixcha ang achang, chemthüikoxle kue nang ang ile mongkünkaile tüi angkya hanpakmale zingle amüi.” Ija a Jowanpa Khüthak Zang-e akaxkya kax changpu.

¹⁵ “Ikoxle nange ija nangsün-nangjo müikya hia zangle wünkya tuita ongam ang lax ilaxle apongpong füi jip-pomle chang.

¹⁶ Nange nang nyi züizüi a nang baozangbu shwomnui aza-apua ang lax, ilaxle ma tsangtsa hangkya sheko tuita ningle, ilaxle nange nang alüile noknusa ang kox.

¹⁷ Kue nang ang koxkya hun hia khop janbu tuiza-nakom nange lax, ilaxle ibu füi nange lükya muabu zing, ilaxle ibu füi chinunchakkaile chang.

¹⁸ Kue nang ang koxkya takle zingkya nyibu lax ilaxle ibu füi ibu muabu to chwople kox, ilaxle kue nang ang koxkya olip münga hia ongan müikya sobu ibu muabu ang kox.

¹⁹ Kue nang a süt koxpu: sümüikya an, olip münga, ilaxle nax-ti ibu a: ikoxle nang ibu a hwom chingcha lomle chapabu ang tö tuita ang koxle awüt.” Ija a Jowanpa Khüthak Zang-e akaxkya kax changle.

²⁰ “Ifüima nange ku ang puxle alaikya sheko naosom hia lüka naosombu lax ilaxle ibu a nange tö tuita ningle chapabu ang koxle awüt. Nang ma ku to mongong müntüile thüi ang mokle hüidaoküdu ngaxchu nguile ngoüna,

²¹ jangchangba kusu-kusa hwom chapabu ang töle kox angkya mwot tüipia?

²² Nange ma tsangtsa hangle nushix dongkya mwot mokle ngopongma nang naosom pongkya tsün onox tuita ma ngaxchu thütle chiatak: nang ma aji to wotle tomlomle ohua ma ngopongkya a.”

Jerusalem Tsün a Tsangtsa Hangkya Mixcha tuita Tsün ningle

²³ Jowanpa Khüthak Zang-e thüile: “Nang maxdaoa! Maxdaoa! Ochax ibu pangwüi nange mokpu, ilaxle

²⁴ lomnu kax ma nange chapabu to shwom angkya onui zingle alai ilaxle ikhato nange chinunchakkai mwot mok.

²⁵ Ipong müikya nangsün nangjo nange haxthom khato linle amapu. Ikhato hüikya khünak pangnusa ang nange ma tsangtsa koxpu, ilaxle nyixfokya to nang a chinunchakkai okho ang ngohompu.

²⁶ Nange mikzalole tüikya nang tomzibu, Ijip nokbu, nang füi tomle nang lya ma jip ang tompu, ilaxle nange ija nang chinunchakkai mwot ku ang mongtsik adün angkya hanpakma twonle hüipu.

²⁷ “Athax kue nang to sikangün ang ku chak nwonpu ilaxle nang tsyen mohiman kue laxlaxtox angkya changle. Kue nang a, nang füi tomle nushix dongkya mwotbu mokle hüikya Filistia nokbu chak to koxdaoa.

²⁸ “Mamabu füi nang ang mongzom chimüitsuakkya khoma, nang a Asiria nok füito azuile zik. Nang a hwom jipnui ang achangle ngo, ikoxlechu hwome chuwüi nang mongzom amüi ang chitho.

²⁹ Nang a thalex nok Babilon nok füichu tsangtsa hangkya mixcha ang ngole hüi, ikoxle hwome chuwüi nang mongzom amüi ang chitho.”

³⁰ Ija a Jowanpa Khüthak Zang-e akaxkya kax changle: “Nange ibu zakzak chitüikya tsangtsa hangkya mixcha tuita ningle mok.

³¹ Tingjang lomnu lomkua afikle nange chapabu to shwom angkya pombu zai ilaxle ikhato chinunchakkai mwot mok. Ikoxle mama zangjang tsangtsa hangkya mixchabu ningle nange ngun chilom.

³² Nang a ma kakopa dantoxlaxle mixwün füi chinunchakkaile changkya mixcha tuita ningle changpu.

³³ Tsangtsa hangkyabue omün koppu, ikoxle nange a nang füi mongkünkyabu pangwüi ang hingho-chaktwon koxle apaopu ilaxle hwom nang hato nguile nang füi jip angkya hanpakma nange hwom ang otha koxpu.

³⁴ Nang a tsangtsa hangkya mixcha malili sa tuita. Nang iningkya mix ang achang angkya owaechu chiatsang. Ija mwot hanpak ang nange otha chikop! Changle, nang a chix lili sa wüi.”

Jerusalem hato Zang Kaxfün

³⁵ Athax tsangtsa hangkya mixcha ang ngole tüikya Jerusalem nang! Jowanpa zangwün to apalax.

³⁶ Ija a Khüthak Jowanpa zangwün changle: “Nange nang nyizabu sik, ilaxle tsangtsa hangkya mixcha tuita ningle, nang füi mong akünkyabu hia nushix dongkya chapabu chak to ma tsangtsa dan, ilaxle chapabu ang tö koxkya tuita ang nange nang naosombu langle awüt.

³⁷ Ikhoma kue owang pongkya nang mongkünbu pangwüi tomle asox ang tomüi: nange mongkünle tüikya hia nange chikün chiluakyabu pangwüi. Kue ibu pangwüi nang akhople asox ang tomüi, ilaxle kue hwom tunthoma nang nyi-za siküi ilaxle hwome nang ohua ma ngün ang tomüi.

³⁸ Chinunchakkai mwot hia mik amütkya mwot bama kue nang ahaiüi, ilaxle ku küntsik-mongma makhange kue sikangünle nang langüi.

³⁹ Kue nang a hwom janzüi fang ma ngo ang tomüi, ilaxle nange chinunchakkai mwotmok nui hia chapabu to shwomkya onuibu hwome komkaile pünpakle ama ang tomüi. Hwome nang nyizabu hia nang likwünbu tsui paoüi ilaxle nang a ohua tsingtsing ma danle toxüi.

⁴⁰ “Nang to long füi thup angkya khünakbu alaiüi, ilaxle hwome hwom changlobu füi nang a müi ang changle texle akhix toxüi.

⁴¹ Hwome nang hom texle atsunüi ilaxle shekobue ngünle nang to sikangünüi. Nang chinunchakkaile ngokya hia nang mongkün hwom ang hingho koxle ngokya zak ang tomüi.

⁴² Ifüima ku mongtsik zakle changüi, ilaxle ku künsom-mongdangle changüi. Ifüima ku ang mongtsik-mongma chichangba nüfux tamchatle münngoüi.

⁴³ Nang naosom tanto kue nang to chemle humele changdaopuix, ibu nange alakdaoa, ilaxle nange mokkya mwotli pangnu makhange nange ku a mong atsikle. Ikhoma kue nang a ibu pangnu bama tsangthom ang tompu. Nange mokle ngokya nushix dongkya mwotbu khato chinunchakkaikya mwot ngaxchu omalax ang athütlaxpu?” Ija kax Jowanpa Khüthak Zang-e akaxdaoa.

Honu chemlehex, Sachachu ija lailaile

⁴⁴ Jowanpae akax: “Jerusalem, khünaknue ija wanwün-kax a nang hanpak ang twonüi: ‘Honu chemlehex, Sachachu ija lailaile.’

⁴⁵ Nang a hünnu sacha jaojao. She-e ma kakopa hia naosom hwom thua anu. Nang a, ma kakopa hia naosom hwom thua anule changkya nang nanao hwom lailaile. Hünzom tingnu nanao hwom, hünzom honu a Hit nok ilaxle hopa a Amor nokbu changpu.

⁴⁶ “Hünna a, she füikya ting-nokbu füi tomle, shuakuxchi ma tüikya Samaria changle. Hünnao a, she füi tomle tüikya tingkhuabu womle, shuathong angkya Sodom changle.

⁴⁷ Hwom chaman ma tingle aham angkya hia hwome mokle hüikya zakkop mwot thüi ano angkya hünzom nang ang mongzom müipuix nyi? Münchang, jantakya bama wüi nange mokkya pangwüi ibu füi ngaxchu sümale mokle.

⁴⁸ “Ku chemle otsingtsing ozün ma tüikya Zang hex ilailaile hünnao Sodom hia she füi tüile ngokya onokbue nange mokkya ochax mwot münmokle Jowanpa Khüthak Zang-e thüile.

⁴⁹ She hia sacha hwom a mongngamle chemthüikoxle hwom ang sax angkya süt okhonguile tüile ilaxle hwom a tumüi lomkhaole tamchu dangjajale ngole, ikoxlechu hwome mixshix hia zasabu to humele changkya nox müntüi.

⁵⁰ Hwom ang tüle mongngam ilaxle kheba chithüi anaolechu mwot oja thua ku anupuix ija mwot hwome mokle alyet, ikhoma kue hwom oli thupu, ija nange müile tikle ngopu.

⁵¹ “Samaria-e nange lyenkya kha angkya ochax süitex süifi ngaxchu ochax chilyen. She-e mokdaokya to nüile hünzom sisile chisumüikya ochax mwot mokpu. Nange mokle hüikya ochax mwot makhange, apyen koxkoxle nang nanao hwom wüi oma chemchu chitüikya ang ngünle.

⁵² Ilaxle athax a nange mokle hüidaokya chingcha chitüikya mwot bama nang adu angkya wüi changpu. Hünnao hwome mokkya füi nang ochaxbu wüi huanu chang koxle, nang mwot tuto hwom a ojao thaikya chitüile ngünle. Athaxpi thün khisumle nang thünzak adulax, chemthüikoxle nange nang nanao hwom tsaothale ngün ang tomdaoa.”

Sodom hia Samaria a Zingle Achatüi

⁵³ Jowanpae Jerusalem ang thüi: “Kue hwom tamchatle ahak-alua ang tomüi: Sodom hia she tingkhuabu tamchu Samaria hia she tingkhuabu. Changle, kue nang chuwüi ahak-alua ang tomüi.

⁵⁴ Nang a nang thua alüile azaküi, ilaxle nang mongma makhange nang nanao hwom chemtukux müile hüidao puix ija ahole.

⁵⁵ Hwom a tamchatle ahak-aluale changüi, nang ilaxle nang tingkhuabu chuwüi chatle amüile zingüi.

⁵⁶ Nang mongngamle ngopongma nange Sodom bama nyi-jaile changdaicha;

⁵⁷ nange mokkya ochax mwot kotok to angai thoto a? Athax nang a she lailaile: nang to miktsakle tüikya tomzi nok, Edom hia Filistia nokbu zongto nang a chanyit tuita ang changle ngole.

⁵⁸ Nange mokle hüidaokya chichangchizang mwot hia zakkop mwot khoma sikngün angkya wüi changpu.” Jowanpae ija akaxdaoa.

Chiashuktoxle Ngo angkya Tsaotsüt

⁵⁹ Jowanpa Khüthak Zang-e thüile: “Nange chem kopse hex ile kue nang to hwonüi, chemthüikoxle nang kaxtsaobu ahai ilaxle tsaotsüt ama.

⁶⁰ Ikoxlechu nang naosom ma tüitanto nang füi zingkya ku tsaotsüt bama kue achuak-achenle changüi, ilaxle tamchu chiashuk tox angkya tsaotsüt kue nang füi zingüi.

⁶¹ Nange chemle mokdaopuix ija nange texle ataküi, ilaxle chemtue nange hünnao hwom hia hünnao hwom chatle atakle changüihex ipongma nang ija bama azakle changüi. Ija a künyi ba angkya tsaotsüt füikya chichang koxlechu kue hwom a nang zongto sacha hwom ningle chang ang tomüi.

⁶² Kue nang füikya tsaotsüt chatle azünle zingüi, ilaxle nange ku a Jowanpa changpule awan ang kopüi.

⁶³ Nang thaile hüidaokya pangwüi kue pangwüi alaküi, ikoxlechu nange ibu texle ataküi ilaxle nang tun hyen ang huanuma azakle sütüi.” Ija kax Jowanpa Khüthak Zang-e akaxdaoa.