EZEKEL 13 - OTSAO BAIBEL (BSI)

Othai Ajepabu bama Ajekya

¹ Jowanpae ku füi akax.

² Chixe thüi: “Ziün angkya khünak, malualua to ajele ngokya Israel nok ajepabu awütdao. Hwom ang Jowanpa kax to apale chang angkya akaxkox.”

³ Ija a Jowanpa Khüthak Zang-e akaxkya kax changpu: “Ongat ajepabu maxpu! Hwome alüile hwom mongkha tokya zang wünle ilaxle ma mikngünbu zingle alaile.

⁴ Israel khünaknu, hünzom ajebu a tingmax füima tingtam ma ngokya hia janbu laxli chitüikya ningle.

⁵ Hwome atsundaokya katukbu nyepu lechu münchang, chichangba katukbu azünle zingpule chu münchang, ikhoma Jowanpa hanpak nyix zan hüikya thoto azwon ang münthoüi.

⁶ Hwom mikngün a othaibu changle, ilaxle hwome ajekya a othaibu changle. Hwome ku tokhange hüikya kaxho fapule akaxle, ikoxle hwom a kue ahüikya chichang. Ikoxlechu hwome hwom ajekax otsing ang achangle ngaiüile ongle!

⁷ Kue hwom ang thüipu: Hünzome ngünle ngokya mikngünbu a othai changpu, ilaxle hünzome ajele akaxkyabu a othai changle. Hünzome wünkya zangwün a ku kax taile wünkya changpule hünzom thüile ikoxle kue hünzom füi zangwünkya nox matüi!”

⁸ Ikhoma Jowanpa Khüthak Zang-e hwom füi akax: “Hünzom zangwün a othai, ilaxle hünzom mikngün a othai changle. Ku a hünzom zongto zanpa changle.

⁹ Hünzom othai mikngün ngünle ngokya hia othai jekax hole ngokya ajebu, kue hünzom to sikangünüi khakha. Ku khünaknu tsaifün-kaxwünle changkya khama hünzom müntüiüi; hünzom mün a Israel nok nokpubu mün khato müntüiüi; hünzom a hünzom chaxwan to chatle tam-münchat. Ifüima hünzome ku a Jowanpa changle le awanüi.

¹⁰ “Pangwüi haxmüi-zangma tüile le akaxkya hwom zangwün makhange hwome ku khünaknu ochei lom to zunle. Pangwüi haxmüi-zangmale müntüi! Ku khünakbue oshing chimong homtoxle katuk ajongkya to ajebue otok ma pale atsyetle.

¹¹ Ajebu hama hwom katuk tsun angkya changle le akaxkox. Kue thokle-thokle zangwat ajoüi. Ija ding to jun-long düt ang tomüi, ilaxle ija to zangchei füi zongle thu ang tomüi.

¹² Katuk a tsunle paoüi, ilaxle fwotle atsyetkyae chem fün amüile noknusae hünzom ma atüiüi.”

¹³ Athax ija a Jowanpae chem akaxpuix ija changle: “Ku mongtsik füi kue zangchei chongkya ahüiüi, thokle zangwat ang tomüi, ilaxle jun-longbu dütkyae katuk tsun ang tomüi.

¹⁴ Hwome fwotle atsyet thomkya katuk atsun angkya, ija pünle awüt angkya, ilaxle ocha zaile ngaxchu oman chitox angkya kue mongzangwünle tsuakdaoa. Ija nguaküi ilaxle hünzom pangwüi langüi. Ifüima pangnusae ku a Jowanpa changle le awanüi.

¹⁵ “Katuk hia ija to fwotle atsyet thomkya khünakbue ku mongtsik janzüie pokya awanle laxüi. Katuk a tsundaoa ilaxle ija fwotle atsyet thomkyabu maxdaoale kue hünzom ang thüiüi:

¹⁶ chemchu kuimüi-zangmale chitüikya khato Jerusalem a kuimüi-zangmale ngo angkya le akaxkya ajebu a!” Jowanpa Khüthak Zang-e akaxdaoa.

Othai Ajenubu hanpakma Ajekya

¹⁷ Jowanpae akax: “Athax, ziün angkya khünak, hünzom khama füichi hanpak kaxho fale aje ngokya ajenubu to hulax. Ibu awüt toxdao

¹⁸ ilaxle hwom hama Jowanpa Khüthak Zang-e hwom füi akaxle ngokya kax apuale laxkox: “Hünzom shekobu maxdaoa! Mix pangnu to hünzom tsak-zonge ole tsuak angkya kuxmale Khünak noknusae hünzome khun-hing khopsanbu ilaxle noknusae akhang ma asün angkya hanpakma khun-hing khangngüi nyi, ibu zing. Hünzome ma olüi hanpakma twon ang ku khünaknu azangle ngokya hia zikya pangnu thakma hünzom ma tsak-zong tüile ngosele hünzome thüt.

¹⁹ Chakpuix tuita wonglai tsax hia an hidaole kople lax angkya hanpakmale hünzome ku khünaknu tunthoma ku wün ahai. Zise pa chichangkya khünak hünzome langle awüt, ilaxle azangle ngose chichangkya pa hünzom ozün ma thom. Ile hünzome ku khünaknu hama othai zangwün ilaxle hwome hünzom to mongong.”

²⁰ Athax Jowanpa Khüthak Zang-e akaxkya kax a ija changle: “Hünzome ozün hia omang thakma apün angkya hanpakma hünzome twonkya khüfuxbu thua ku anule. Kue hünzom suakto angkya ibu pünle awütüi ilaxle hünzome kople thomkya. Khünakbu dan ang tomüi.

²¹ Kue hünzom nyikhak sikle awütüi ilaxle hünzom tsak-zong fang ma ngokya ku khünakbu othuithui hanpakma tamfang ma azangle pao ang tomüi. Ifüima ku a Jowanpa changpule hünzome tikle laxüi.

²² “Hünzom kaxthai zangwün makhange müikya khünakbu ang hünzome mong ahik. Ibu a kue mong amase lejao chitsukya khünakbu changle. Ochax khünakbue hwom ochaxbu danle toxlaxle khosün atak angkya hünzome abaxle thom.

²³ Athaxpi hünzome othai mikngün ngünle ngokya hia othai ajele ngokya zangwünbu pangwüi kaitox daoa. Kue hünzom chak tokya ku khünakbu sünle koppu, ikoxtix hünzome ku a Jowanpa changle le awan ang kopüi.”